CAL CODE HELP CLICK HERE
click on the file description for more information

32000: BA Daniel chapter 2

click on a word for lexical analysis
Click on a red-colored coordinate for comments and/or translations of the line

40:2 מַלְכָּא לְעָלְמִין חֱיִי אֱמַר חֶלְמָא לעבדיך״#ק#לְעַבְדָךְ״ וּפִשְרָא נְחַוֵּא׃
50:2 עָנֵה מַלְכָּא וְאָמַר לכשׂדיא״#ק#לְכַשְׂדָּאֵי״ מִלְּתָא מִנִּי אַזְדָּא הֵן לָא תְהוֹדְעוּנַּנִי חֶלְמָא וּפִשְרֵהּ הַדָּמִין תִּתְעַבְדוּן וּבָתֵּיכוֹן נְוָלִי יִתְּשָׂמוּן׃
60:2 וְהֵן חֶלְמָא וּפִשְרֵהּ תְּהַחֲוֹן מַתְּנָן וּנְבִזְבָּה וִיקָר שַׂגִּיא תְּקַבְּלוּן מִן־קֳדָמָי לָהֵן חֶלְמָא וּפִשְרֵהּ הַחֲוֹנִי׃
70:2 עֲנוֹ תִנְיָנוּת וְאָמְרִין מַלְכָּא חֶלְמָא יֵאמַר לְעַבְדוֹהִי וּפִשְרָה נְהַחֲוֵה׃
80:2 עָנֵה מַלְכָּא וְאָמַר מִן יַצִּיב יָדַע אֲנָה דִּי עִדָּנָא אַנְתּוּן זָבְנִין כָּל־קֳבֵל דִּי חֲזֵיתוֹן דִּי אַזְדָּא מִנִּי מִלְּתָא׃
90:2 דִּי הֵן חֶלְמָא לָא תְהוֹדְעֻנַּנִי חֲדָה הִיא דָתְכוֹן וּמִלָּה כִדְבָה וּשְחִיתָה הזמנתון״#ק#הִזְדְמִנְתּוּן״ לְמֵאמַר קָדָמַי עַד דִּי עִדָּנָא יִשְתַּנֵּא לָהֵן חֶלְמָא אֱמַרוּ לִי וְאִנְדַּע דִּי פִשְרֵהּ תְּהַחֲוֻנַּנִי׃
01:2 עֲנוֹ כשׂדיא״#ק#כַשְׂדָּאֵי״ קֳדָם מַלְכָּא וְאָמְרִין לָא אִיתַי אֲנָש עַל יַבֶּשְתָּא דִּי מִלַּת מַלְכָּא יוּכַל לְהַחֲוָיָה כָּל־קֳבֵל דִּי כָּל מֶלֶךְ רַב וְשַלִּיט מִלָּה כִדְנָה לָא שְאֵל לְכָל חַרְטֹם וְאָשַף וְכַשְׂדָּי׃
11:2 וּמִלְּתָא דִי מַלְכָּה שָאֵל יַקִּירָה וְאָחֳרָן לָא אִיתַי דִּי יְחַוִּנַּהּ קֳדָם מַלְכָּא לָהֵן אֱלָהִין דִּי מְדָרְהוֹן עִם בִּשְׂרָא לָא אִיתוֹהִי׃
21:2 כָּל־קֳבֵל דְּנָה מַלְכָּא בְּנַס וּקְצַף שַׂגִּיא וַאֲמַר לְהוֹבָדָה לְכֹל חַכִּימֵי בָבֶל׃
31:2 וְדָתָא נֶפְקַת וְחַכִּימַיָּא מִתְקַטְּלִין וּבְעוֹ דָּנִיֵּאל וְחַבְרוֹהִי לְהִתְקְטָלָה׃
41:2 בֵּאדַיִן דָּנִיֵּאל הֲתִיב עֵטָא וּטְעֵם לְאַרְיוֹךְ רַב טַבָּחַיָּא דִּי מַלְכָּא דִּי נְפַק לְקַטָּלָה לְחַכִּימֵי בָּבֶל׃
51:2 עָנֵה וְאָמַר לְאַרְיוֹךְ שַלִּיטָא דִי מַלְכָּא עַל מָה דָתָא מְהַחְצְפָה מִן־קֳדָם מַלְכָּא אֱדַיִן מִלְתָא הוֹדַע אַרְיוֹךְ לְדָנִיֵּאל׃
61:2 וְדָנִיֵּאל עַל וּבְעָה מִן מַלְכָּא דִּי זְמָן יִנְתֵּן לֵהּ וּפִשְרָא לְהַחֲוָיָה לְמַלְכָּא׃
71:2 אֱדַיִן דָּנִיֵּאל לְבַיְתֵהּ אֲזַל וְלַחֲנַנְיָה מִישָאֵל וַעֲזַרְיָה חַבְרוֹהִי מִלְּתָא הוֹדַע׃
81:2 וְרַחֲמִין לְמִבְעֵא מִן־קֳדָם אֱלָהּ שְמַיָּא עַל רָזָה דְּנָה דִּי לָא יְהֹבְדוּן דָּנִיֵּאל וְחַבְרוֹהִי עִם שְאָר חַכִּימֵי בָבֶל׃
91:2 אֱדַיִן לְדָנִיֵּאל בְּחֶזְוָא דִי לֵילְיָא רָזָה גֲלִי אֱדַיִן דָּנִיֵּאל בָּרִךְ לֶאֱלָהּ שְמַיָּא׃
02:2 עָנֵה דָנִיֵּאל וְאָמַר לֶהֱוֵא שְמֵהּ דִּי אֱלָהָא מְבָרַךְ מִן עָלְמָא וְעַד עָלְמָא דִּי חָכְמְתָא וּגְבוּרְתָא דִּי לֵהּ הִיא׃
12:2 וְהוּא מְהַשְנֵא עִדָּנַיָּא וְזִמְנַיָּא מְהַעְדֵּה מַלְכִין וּמְהָקֵים מַלְכִין יָהֵב חָכְמְתָא לְחַכִּימִין וּמַנְדְּעָא לְיָדְעֵי בִינָה׃
22:2 הוּא גָּלֵא עַמִּיקָתָא וּמְסַתְּרָתָא יָדַע מָה בַחֲשוֹכָא ונהירא״#ק#וּנְהוֹרָא״ עִמֵּהּ שְרֵא׃
32:2 לָךְ אֱלָהּ אֲבָהָתִי מְהוֹדֵא וּמְשַבַּח אֲנָה דִּי חָכְמְתָא וּגְבוּרְתָא יְהַבְתְּ לִי וּכְעַן הוֹדַעְתַּנִי דִּי בְעֵנָא מִנָּךְ דִּי מִלַּת מַלְכָּא הוֹדַעְתֶּנָא׃
42:2 כָּל־קֳבֵל דְּנָה דָּנִיֵּאל עַל עַל אַרְיוֹךְ דִּי מַנִּי מַלְכָּא לְהוֹבָדָה לְחַכִּימֵי בָבֶל אֲזַל וְכֵן אֲמַר לֵהּ לְחַכִּימֵי בָבֶל אַל תְּהוֹבֵד הַעֵלְנִי קֳדָם מַלְכָּא וּפִשְרָא לְמַלְכָּא אֲחַוֵּא׃
52:2 אֱדַיִן אַרְיוֹךְ בְּהִתְבְּהָלָה הַנְעֵל לְדָנִיֵּאל קֳדָם מַלְכָּא וְכֵן אֲמַר לֵהּ דִּי הַשְכַּחַת גְּבַר מִן בְּנֵי גָלוּתָא דִּי יְהוּד דִּי פִשְרָא לְמַלְכָּא יְהוֹדַע׃
62:2 עָנֵה מַלְכָּא וְאָמַר לְדָנִיֵּאל דִּי שְמֵהּ בֵּלְטְשַאצַּר האיתיך״#ק#הַאִיתָךְ״ כָּהֵל לְהוֹדָעֻתַנִי חֶלְמָא דִי חֲזֵית וּפִשְרֵהּ׃
72:2 עָנֵה דָנִיֵּאל קֳדָם מַלְכָּא וְאָמַר רָזָה דִּי מַלְכָּא שָאֵל לָא חַכִּימִין אָשְפִין חַרְטֻמִּין גָּזְרִין יָכְלִין לְהַחֲוָיָה לְמַלְכָּא׃
82:2 בְּרַם אִיתַי אֱלָהּ בִּשְמַיָּא גָּלֵא רָזִין וְהוֹדַע לְמַלְכָּא נְבוּכַדְנֶצַּר מָה דִּי לֶהֱוֵא בְּאַחֲרִית יוֹמַיָּא חֶלְמָךְ וְחֶזְוֵי רֵאשָךְ עַל מִשְכְּבָךְ דְּנָה הוּא׃
92:2 אנתה״#ק#אַנְתְּ״ מַלְכָּא רַעְיוֹנָךְ עַל מִשְכְּבָךְ סְלִקוּ מָה דִּי לֶהֱוֵא אַחֲרֵי דְנָה וְגָלֵא רָזַיָּא הוֹדְעָךְ מָה דִי לֶהֱוֵא׃
03:2 וַאֲנָה לָא בְחָכְמָה דִּי אִיתַי בִּי מִן כָּל חַיַּיָּא רָזָא דְנָה גֱּלִי לִי לָהֵן עַל־דִּבְרַת דִּי פִשְרָא לְמַלְכָּא יְהוֹדְעוּן וְרַעְיוֹנֵי לִבְבָךְ תִּנְדַּע׃
13:2 אנתה״#ק#אַנְתְּ״ מַלְכָּא חָזֵה הֲוַיְתָ וַאֲלוּ צְלֵם חַד שַׂגִּיא צַלְמָא דִּכֵּן רַב וְזִיוֵהּ יַתִּיר קָאֵם לְקָבְלָךְ וְרֵוֵהּ דְּחִיל׃
23:2 הוּא צַלְמָא רֵאשֵהּ דִּי דְהַב טָב חֲדוֹהִי וּדְרָעוֹהִי דִּי כְסַף מְעוֹהִי וְיַרְכָתֵהּ דִּי נְחָש׃
33:2 שָקוֹהִי דִּי פַרְזֶל רַגְלוֹהִי מנהון״#ק#מִנְּהֵין״ דִּי פַרְזֶל ומנהון״#ק#וּמִנְּהֵין״ דִּי חֲסַף׃
43:2 חָזֵה הֲוַיְתָ עַד דִּי הִתְגְּזֶרֶת אֶבֶן דִּי־לָא בִידַיִן וּמְחָת לְצַלְמָא עַל רַגְלוֹהִי דִּי פַרְזְלָא וְחַסְפָּא וְהַדֵּקֶת הִמּוֹן׃
53:2 בֵּאדַיִן דָּקוּ כַחֲדָה פַּרְזְלָא חַסְפָּא נְחָשָא כַּסְפָּא וְדַהֲבָא וַהֲווֹ כְּעוּר מִן אִדְּרֵי קַיִט וּנְשָׂא הִמּוֹן רוּחָא וְכָל אֲתַר לָא הִשְתֲּכַח לְהוֹן וְאַבְנָא דִּי מְחָת לְצַלְמָא הֲוָת לְטוּר רַב וּמְלָת כָּל אַרְעָא׃
63:2 דְּנָה חֶלְמָא וּפִשְרֵהּ נֵאמַר קֳדָם מַלְכָּא׃
73:2 אנתה״#ק#אַנְתְּ״ מַלְכָּא מֶלֶךְ מַלְכַיָּא דִּי אֱלָהּ שְמַיָּא מַלְכוּתָא חִסְנָא וְתָקְפָּא וִיקָרָא יְהַב לָךְ׃
83:2 וּבְכָל דִּי דארין״#ק#דָיְרִין״ בְּנֵי אֲנָשָא חֵיוַת בָּרָא וְעוֹף שְמַיָּא יְהַב בִּידָךְ וְהַשְלְטָךְ בְּכָלְּהוֹן אנתה״#ק#אַנְתְּ״ הוּא רֵאשָא דִּי דַהֲבָא׃

93:2 וּבָתְרָךְ תְּקוּם מַלְכוּ אָחֳרִי אֲרַעא מִנָּךְ וּמַלְכוּ תליתיא״#ק#תְלִיתָאָה״ אָחֳרִי דִּי נְחָשָא דִּי תִשְלַט בְּכָל אַרְעָא׃

04:2 וּמַלְכוּ רביעיה״#ק#רְבִיעָאָה״ תֶּהֱוֵא תַקִּיפָה כְּפַרְזְלָא כָּל־קֳבֵל דִּי פַרְזְלָא מְהַדֵּק וְחָשֵל כֹּלָּא וּכְפַרְזְלָא דִּי מְרָעַע כָּל אִלֵּין תַּדִּק וְתֵרֹעַ׃
14:2 וְדִי חֲזַיְתָה רַגְלַיָּא וְאֶצְבְּעָתָא מנהון״#ק#מִנְּהֵין״ חֲסַף דִּי פֶחָר ומנהון״#ק#וּמִנְּהֵין״ פַּרְזֶל מַלְכוּ פְלִיגָה תֶּהֱוֵה וּמִן נִצְבְּתָא דִי פַרְזְלָא לֶהֱוֵא בַהּ כָּל־קֳבֵל דִּי חֲזַיְתָה פַּרְזְלָא מְעָרַב בַּחֲסַף טִינָא׃
24:2 וְאֶצְבְּעָת רַגְלַיָּא מנהון״#ק#מִנְּהֵין״ פַּרְזֶל ומנהון״#ק#וּמִנְּהֵין״ חֲסַף מִן קְצָת מַלְכוּתָא תֶּהֱוֵה תַקִּיפָה וּמִנַּהּ תֶּהֱוֵה תְבִירָה׃
34:2 די״#ק#וְדִי״ חֲזַיְתָ פַּרְזְלָא מְעָרַב בַּחֲסַף טִינָא מִתְעָרְבִין לֶהֱוֹן בִּזְרַע אֲנָשָא וְלָא לֶהֱוֹן דָּבְקִין דְּנָה עִם דְּנָה הֵא־כְדִי פַרְזְלָא לָא מִתְעָרַב עִם חַסְפָּא׃
44:2 וּבְיוֹמֵיהוֹן דִּי מַלְכַיָּא אִנּוּן יְקִים אֱלָהּ שְמַיָּא מַלְכוּ דִּי לְעָלְמִין לָא תִתְחַבַּל וּמַלְכוּתָה לְעַם אָחֳרָן לָא תִשְתְּבִק תַּדִּק וְתָסֵיף כָּל אִלֵּין מַלְכְוָתָא וְהִיא תְּקוּם לְעָלְמַיָּא׃
54:2 כָּל־קֳבֵל דִּי חֲזַיְתָ דִּי מִטּוּרָא אִתְגְּזֶרֶת אֶבֶן דִּי־לָא בִידַיִן וְהַדֶּקֶת פַּרְזְלָא נְחָשָא חַסְפָּא כַּסְפָּא וְדַהֲבָא אֱלָהּ רַב הוֹדַע לְמַלְכָּא מָה דִּי לֶהֱוֵא אַחֲרֵי דְנָה וְיַצִּיב חֶלְמָא וּמְהֵימַן פִּשְרֵהּ׃
64:2 בֵּאדַיִן מַלְכָּא נְבוּכַדְנֶצַּר נְפַל עַל אַנְפּוֹהִי וּלְדָנִיֵּאל סְגִד וּמִנְחָה וְנִיחֹחִין אֲמַר לְנַסָּכָה לֵהּ׃
74:2 עָנֵה מַלְכָּא לְדָנִיֵּאל וְאָמַר מִן קְשֹט דִּי אֱלָהֲכוֹן הוּא אֱלָהּ אֱלָהִין וּמָרֵא מַלְכִין וְגָלֵה רָזִין דִּי יְכֵלְתָּ לְמִגְלֵא רָזָה דְנָה׃
84:2 אֱדַיִן מַלְכָּא לְדָנִיֵּאל רַבִּי וּמַתְּנָן רַבְרְבָן שַׂגִּיאָן יְהַב לֵהּ וְהַשְלְטֵהּ עַל כָּל מְדִינַת בָּבֶל וְרַב סִגְנִין עַל כָּל חַכִּימֵי בָבֶל׃
94:2 וְדָנִיֵּאל בְּעָא מִן מַלְכָּא וּמַנִּי עַל עֲבִידְתָּא דִּי מְדִינַת בָּבֶל לְשַדְרַךְ מֵישַךְ וַעֲבֵד נְגוֹ וְדָנִיֵּאל בִּתְרַע מַלְכָּא׃


next chapter