The Comprehensive Aramaic Lexicon

CAL CODE HELP CLICK HERE

click on the file description for more information

click on a word for lexical analysis
Click on a red-colored coordinate for comments and/or translations of the line

previous chapter

10:50 והוה ביומא תליתאה ולבשת אסתר לבושי מלכותא וקמת בדרתא דבבית מלכא גואה כל קביל בית מלכא ומלכא הוה יתב על כרסי מלכותיה בבית מלכותא כל קביל תרע ביתא
20:50 והוה כד חזא מלכא ית אסתר מלכתא קימא בדרתא אטעינת רחמין ואושיט מלכא לאסתר ית תגרא דדהבא דהוה נקט בידיה וקרבת אסתר ומטת בידהא ואחדת ברישא דתגרא
30:50 ואמר לה מלכא מה צרוך אית ליך אסתר מלכתא ומה בעותיך עד פלגות מלכותא ויתיהב ליך
40:50 ואמרת אסתר אין על מלכא ישפר יעול מלכא והמן יומא דין למשתיא דעבדת לה
50:50 ואמר מלכא אוחיו להמן למעבד ית פתגם אסתר ועאל מלכא והמן למשתיא דעבדת אסתר
60:50 ואמר מלכא לאסתר במשתיא דחמרא מה שאלתיך אסתר מלכתא ומה בעותיך עד פלגות מלכותא ותתעבד
70:50 ואתבת אסתר ואמרת שאלתי ובעותי
80:50 אין אשכחת רחמין בעיני מלכא ואין על מלכא ישפר למתן ית שאלתי ולמעבד ית בעותי יעול מלכא והמן למשתיא דאעבד להון ולמחר אנא עבדא כפתגמא גזרת מלכא
90:50 ונפק המן מלות מלכא ביומא ההוא חדי ובדח לבא וכד חזא המן ית מרדכי בתרע מלכא ולא קם ולא רתת מנה ואתמלי המן עלוי מרדכי רתחא
01:50 ואזדרז המן ועאל לביתה ושדר וקרא לרחמוי ולזרש אנתתה
11:50 ואשתעי להון המן ית יקר עתרה וסגיאות בנוי וית דרבי יתה מלכא וית דזקפה עלוי כל רברבניא ועבדי מלכא
21:50 ואמר המן ברם לא הנעלת אסתר מלכתא למשתיא דעבדת אלהן יתי ואף לעדן מחר אנא מזמן לותה למסעוד עם מלכא
31:50 וכל דא ליתה טימי לותי בכל עדן דאנא חזי ית מרדכי יהודאה יתב בתרע פלטרין דמלכא

41:50 ואמרת לה זרש אנתתה וכל רחמוי יעבדו אע זקיף חמשין אמין ובצפרא אמר למלכא ויצלבון ית מרדכי עלווי ומן בתר כן עול קדם מלכא לבית משתיא בחדוה ושפר פתגמא קדם המן ועבד קיסא