80:63 2 ושאר פתגמי יהויקים וריחוקיה ומא דעבד וסורחנא דאשתכח עלוהי האנון כתיבין על ספר מלכיא דבית ישראל ודבית יהודה ומליך יהויכין בריה תחותוהי׃

90:63 2 בר תמני שנין יהויכין כד מלך ותלתא ירחין ועשרתי יומין מלך בירושלם ועבד דביש קדם ייי׃
01:63 2 ולסופא דשתא שדר מלכא נבוכד נצר ואייתיה לבבל עם כל רוגגת בית מקדשא דייי ואמליך ית צדקיה אחוהי על דבית יהודה וירושלם׃
11:63 2 בר עשרין וחדא שתא צדקיה כד מלך וחדיסרי שנין מלך בירושלם׃
21:63 2 ועבד דביש קדם ייי אלהיה ולא אתכנע מן קדם ירמיהו נביא דאתנבי ליה מן קדם מימרא דייי׃
31:63 2 ואוף במלכא נבוכד נצר מרד די אומי יתיה במימרא דייי ואקשי ית קדליה ותקיף ית יצרא דלביה מן בגלל דלא למתוב לדחלתא דייי אלהא דישראל׃
41:63 2 ולהוד כל רברבי כהניא ועמא אסגיעו לשקרא שקר הי ככל תועבת ריחוק עממיא וסאיבו ית בית מקדשא דייי דאקדיש בירושלם׃
51:63 2 ושדר ייי אלהא דאבהתהון עליהון די יתובון ביד עזגדוהי אקדים ושלחא מטול דחאיס על עמיה ועל מדור בית שכינת קודשיה׃
61:63 2 והוו מגחכין בעזגדיא דייי ומבסרין בפתגמוהי ומתלעבין בנביוהי עד דסליקת רוגזא דייי בעמיה עד דלית אסו׃
71:63 2 ואסיק עליהון ית מלכא דכשדאי וקטל ית עולימיהון בחרבא בבית מוקדשיהון ולא חאס על עולים ובתולתא וסבא וארכונא כולא מסר בידיה׃
81:63 2 וכל מאני בית מקדשא דייי מסר בידיה רברביא וזעיריא ותסברי בית מקדשא דייי ותסברי בית מלכא ורברבנוהי כולא אייתי לבבל׃
91:63 2 ואוקידו ית בית מקדשא דייי ותרעו ית שורא דירושלם וכל פלטירהא אוקידו בנורא וכל מאני רגוגהא לחבלא׃
02:63 2 ואגלי שארא דאשתיירת מן קטלין בחרבא לבבל והוו ליה ולבנוהי לעבדין עד זמן דמליך מלכותא דפרס׃
12:63 2 לאשלמא פתגם נבואה מן קדם ייי מפום ירמיהו עד זמן דאתרעיאת ארעא שמטתהא כל יומין דצדיאת ארעא דישראל שמטת לאשלמא שובעין שנין׃
22:63 2 ובשתא חדא לכרש מלכא דפרס כד שלים פתגם נבואה דייי מפומא דירמיהו אתיהב רוח גבורתא דייי בכרש מלכא דפרס ואעבר כרוזא בכל מלכותיה ואוף באגרתא שדר למימר׃
32:63 2 כדנן אמר כרש מלכא דפרס כל מלכוותא דארעא מסר לי מימרא דייי אלהא דשמיא והוא פקיד עלי למבני ליה בית מקדשא בירושלם די בשיבט יהודה מן בכון דאית ביניה מכל עמיה יהא מימרא דייי בסעדיה ויסק׃