CAL CODE HELP CLICK HERE
click on the file description for more information

81011: TgChron2 35

click on a word for lexical analysis
Click on a red-colored coordinate for comments and/or translations of the line

previous chapter


10:53 2 ועבד יאשיהו בירושלם פסחא קדם ייי ונכיסו פסחא בארביסר לירחא דניסן׃
20:53 2 ואקים כהניא על מטרתהון ותקיפנון לפולחנא דבית מקדשא דייי׃
30:53 2 ואמר לליואי דמלפין ית עמא לכל בית ישראל דאתקדשו לשמא דייי הבו ית ארונא דקודשא בביתא די בנא שלמה בר דוד מלכא דישראל לית לכון רשותא למטל בכתף כדון פלחו ית ייי אלהכון וית עמיה בית ישראל׃
40:53 2 ואתקינו לבית אבהתכון הי כפלגותכון הי כמא דפקיד משה והי כמא די כתב דוד מלכא דישראל והי ככתבא דשלמה בריה׃
50:53 2 וקומו בבית מקדשא לפלוגת בית אבהתא לאחוכון בני עמא ופלוגת בית אבא לליואי׃
60:53 2 וכוסו פסחא ואתקדשו ואתקינו לאחוכון למעבד הי כמא דמליל ייי בידא דמשה׃
70:53 2 ואפרש יאשיה לבני עמא עאן אמריא ובני עזיא כולא לפסחאיא לכל מן דמשתכח למניינא תלתין אלפין ותורי תלתא אלפין לנכסת קודשיא דחגא אלין מקניינא דמלכא׃
80:53 2 ורברבנוי לנסבתא״לנדבתא#1#״ לעמא לכהניא ולליואי אפרישו חלקיה וזכריה ויחיאל סרכי בית מקדשא דייי לכהניא יהבו לפסחיא תרין אלפין ושית מאה ותורי תלת מאה׃
90:53 2 וכונניה ושמעיה ונתנאל אחוהי וחשביה ויעיאל ויוזבד רברבי ליואי אפרישו לליואי לפסחיא עאן חמשא אלפין ותורין חמש מאה׃
01:53 2 ואתקנת עבידתא וקמו כהניא על דוכנהון וליואי על פלוגוותהון הי כתפקידתא דמלכא׃
11:53 2 ונכיסו פסחא ודריקו כהניא ית אדמא מידיהון וליואי משלחין׃
21:53 2 ואעדיאו עלתא במוהבותהון לבית אבהתהון לבני עמא לקרבא קדם ייי הי כמא דכתיב בספרא דמשה והכדין לצפרא׃
31:53 2 וטוו ית פסחא בנורא כדחזי וית נכסת קודשיא בשילו בקדריא ובדודיא ובמילו{מ}<ס>יא ואושיטו לכל בני עמא׃
41:53 2 ומן בתר כדין אתקינו להון ולכהניא ארום כהניא בני אהרן מתעסקין באסקות עלתא ותריביא עד ליליא וליואי אתקינו להון ולכהניא בני אהרן׃
51:53 2 ומשבחיא בני אסף על אתר מוקמתהון הי כתפקידתא דדוד ואסף והימן וידותון נביא דמלכא ותרעיא לתרע ותרע לית להון למעדי מכל פולחנהון ארום אחוהון ליואי אתקינו להון׃
61:53 2 ואתקנת כל עבידת פולחנא דייי ביומא ההוא למעבד פסחא ואסקות עלתא על מדבחא דייי הי כתפקידתא מלכא יאשיהו׃
71:53 2 ועבדו בני ישראל דאשתכחו מהימנין קדם ייי ית פסחא בעדנא ההיא ברמשא וית חגא דפטיריא שבעא יומין׃
81:53 2 ולא אתעביד פסחא דכמתיה בישראל מן יומי שמואל נביא וכל מלכיא דבית ישראל לא עבדו הי כפסחא די עבד יאשיהו וכהניא וליואי וכל אנש יהודה ובית ישראל דאשתכחו בהימנותא ויתבי ירושלם׃
91:53 2 בתמניסרי שנין למלכותא דיאשיהו אתעביד פסחא הדין׃
02:53 2 בתר כל דנא די אתקין יאשיהו ית בית מקדשא דייי סליק פרעה חגירא מלכא דמצרים לאגחא קרבא בכרכמיש דעל פרת ונפק לקדמותיה יאשיהו׃
12:53 2 ושדר לותיה עזגדין למימר מא אית לי עמך מליך שבטא דבית יהודה לא עלך סליק{ו}<י>ת לאגחא קרבא ארום אנת מתגרה יומא דין עמי אלהן לבית קרבא דילי וטעוותי אמר לסרהבותי כדון פסוק לך מני ומן טעוותי דעמי ולא תחבל יתך׃
22:53 2 וכד שמע ית מה דאדכר ית טעותיה לא אסתחר לאחורא ולא אחזר יאשיה ית אפוהי מניה ארום לאגחא קרבא ביה אשתני ואטקס בזיני קרבא ולא קביל לפתגמי חגירא דמליל על עיסק טעותיה ואתא לאגחא קרבא במישר מגדו׃
32:53 2 ומן בגלל דלא תבע יאשיה אולפן מן קדם ייי ואזל לאגחא קרבא במישר מגדו אתפרע מניה מרי עלמא ופרקו ושדו קשוותיא גיררין למלכא יאשיהו ואמר מלכא לעבדוי אעברו יתי ארום מרעיתי לחדא׃
42:53 2 ואעברו יתיה עבדוי מן רתיכא וארכבוהי על רתיכא תנייתא די ליה ואבלוהי לירושלם ומית תמן ואתקבר בקברי אבהתוי וכל אנש יהודה וירושלם מתאבלין על יאשיהו׃
52:53 2 ואלא ירמיהו על יאשיהו איליא רבתא ואמרין עמיה כל רברביא ומטרוניתא והוון מתיבין באילייהון על יאשיהו עד יומא הדין ויהבנון לגזירא שוה על ישראל דיהון ספדין על יאשיהו באילייהון והאנון כתיבין בספרא דכתב ברוך מן פום ירמיהו על אילייתא׃
62:53 2 ושאר פתגמי יאשיהו וכל חסדוהי דעבד הי כמא דכתיב באוריתא דייי׃

72:53 2 ופתגמוהי קדמאין מא דעבד בינקותיה ובתראי מא דעבד בעולימותיה וכל דיניא דדאן מן יומא דמלך בר תמניא שנין דהוה טלי עד שנת תמניסרי דהוה עולים כד שרי לתקפא ית בית מוקדשא דייי כולהון אתיב למארי דינא מן ממוניה והיך דכי ית בית ישראל ויהודה מן כל סואבותא האנון כתיבין על ספר מלכיא דבית ישראל ודבית יהודה׃


next chapter