CAL CODE HELP CLICK HERE
click on the file description for more information

81011: TgChron2 33

click on a word for lexical analysis
Click on a red-colored coordinate for comments and/or translations of the line

previous chapter


10:33 2 בר תרתיסרי שנין מנשה כד מליך וחמשין וחמש שנין מלך בירושלם׃
20:33 2 ועבד דביש קדם ייי הי כתועבת עממיא די תריך ייי מן קדם בני ישראל׃
30:33 2 ותב ובנא ית כל במסיא די תרע יחזקיהו אבוהי ואקים אגוריא לבעליא ועבד אשירתא וסגיד לכל חיילי שמיא ופלח יתהון׃
40:33 2 ובנא אגוריא ואקים פסלא בבית מקדשא דייי די אמר ייי בירושלם אשרי שכנתי לעלם׃
50:33 2 ובנא אגוריא לכל חילי שמיא בתרתין דרוות בית מקדשא דייי׃
60:33 2 והוא אעבר ית בנוהי בנורא בחילת בר הנם ותבע מן מענניא ומן קוסמיא ומן חרשיא ועבד בידין ודכורו אסגי למעבד דביש קדם ייי לארגזא קדמוהי׃
70:33 2 ושוי ית פסל צורתא די עבד בדיוקניה בבית מקדשא דייי די אמר ייי לדוד ולשלמה בריה בביתא הדין ובירושלם דאתרעיתי מכל שבטיא דישראל אשרי ית שכנתי לעלמי עלמיא׃
80:33 2 ולא תסיף לאגלאה ית עמא בית ישראל מעלוי ארעא די אקימית ביד אבהתכון לחוד אין ינטרון למעבד ית כל מא דפקידתנון לכל אוריתא וקימיא ודיניא בידא דמשה׃
90:33 2 ואטעי מנשה ית אנש יהודה ויתבי ירושלם למעבד דביש יתיר מן עממיא די שיצי ייי מן קדם בני ישראל׃
01:33 2 ומליל ייי עם מנשה ועם עמיה ואסהידנון בידא נביא ולא אציתו׃
11:33 2 ואייתי ייי עליהון ית רבני חילא די למלכא דאתור ואחדו ית מנשה בכירומנקייא ואסרוהי בשושלוון דנחשא ואובלוהי לבבל׃
21:33 2 ועבדו כשדאי מולוות נחשא ונקבוהא נקבין נקבין דקיקין וסגרו יתיה בגווה ואציתו נורא חזור חזור ליה וכד עיק ליה תבע מן כולהון טעוותיה דעבד ולא אסתייע ארום לית בהון צרוך והדר וצלי קדם ייי אלהיה ואתכנע לחדא מן קדם ייי אלהא דאבהתוהי׃
31:33 2 וצלי קדמוהי מן יד אזלו כל מלאכיא די ממנן על מעלני תרעי צלותא דבשמיא ואחדו אמטולתיה כל מעלני תרעי צלותא דבשמיא וכלהון כווי וחרכי שמיא מן בגלל דלא תתקבל צלותיה ומן יד אתגוללו רחמי מרי עלמא דימיניה מתיחא לקבלא חייביא דתייבין לדחלתיה ותברין יצרא דלבהון בתתובא ועבד חרכא ומחתרתא בשמיא תחות כורסי יקריה ושמע צלותיה וקבל בעותיה ואזייע עלמא במימריה ואתנפעת מולתא ונפק מתמן ונפקת רוחא מביני כנפי כרוביא ונתביה בגזירת מימרא דייי וחזר לירושלם למלכותיה וידע מנשה ארום ייי הוא אלהא דעבד עמיה אתיא ותמהיא האנון ותב בכל לבביה קדם ייי ושבק כל טעוותא ולא אשתעבד להון׃
41:33 2 ומן בתר כדין בנא שורא ברייתא לקרתא דדוד ממישרא דגיחון בנחלא ולמיעל בתרע מזבני כווריא ואחזר לפלטירין ואגבה יתה עד לחדא ומני רבני חילא בכל קרויא כריכתא דבבית יהודה׃
51:33 2 ועטר ית טעוות עממיא וית צורתא מבית מקדשא דייי וית כל אגוריא די בנא בטוור בית מקדשא דייי ובירושלם וטליק מברא לקרתא׃
61:33 2 ובנא ית מדבחא דייי ודבח עלוהי נכסי נכסת קודשין ותודתא ואמר לדבית יהודה למפלח ית ייי אלהא דישראל׃
71:33 2 ברם עד כדון עמא דבחין בבמסיא לחוד לשום מימרא דייי אלההון׃

81:33 2 ושאר פתגמי מנשה וצלותיה דצלי קדם ייי אלהיה ופתגמי נבייא דממללין עמיה בשום מימרא דייי אלהא דישראל הא אנון כתיבין על פתגמי מלכיא דבית ישראל׃

91:33 2 וצלותיה דצלי קדם ייי והיך קביל ייי צלותיה וכל סורחניה ושקריה ואתריא די בנא בהון במסיא ואקים אשירתא וצלמיא ואתכנעותיה הא אנון כתיבין על פתגמי חוזי׃
02:33 2 ושכיב מנשה עם אבהתוהי וקברוהי בביתיה ומליך אמון בריה תחותוהי׃
12:33 2 בר עשרין ותרתין שנין אמון כד מלך ותרתין שנין מלך בירושלם׃
22:33 2 ועבד דביש קדם ייי הי כמא דעבד מנשה אבוהי ולכל צלמניא דעבד מנשה אבוהי דבח אמון ופלחנון׃
32:33 2 ולא אתכנע מן קדם ייי הי כמא דאתכנע מנשה אבוהי ארום הוא אמון אסגי חובא׃
42:33 2 ומרדו עלוהי עבדוהי וקטלוהי בביתיה׃
52:33 2 וקטלו עמא דארעא ית כל דמרדו על מלכא אמון ואמליכו עמא דארעא ית יאשיהו בריה תחותוהי׃


next chapter