The Comprehensive Aramaic Lexicon

10:23 2 בתר פתגמיא וקושטא האלין דעבד יחזקיהו כד קיים ייי במימריה לאייתאה ית סנחריב מלכא דאתור וית חילוותיה על ארעא דישראל מן בגלל לתברא ית אתוראי בארעא דבית יהודה ולדוששא ית אוכלוסיהון על טווריא דירושלם ולממסר ית כל עדאה ובזתא בידא דחזקיה ועמיה דבירושלם הא בכין אתא סנחריב מלכא דאתור במשריין סגיעין דלית להון מניין ושרא בארע שיבט יהודה ואשרי אוכלוסוהי על קרוי כריכתא ואמר במימריה לשויותהון עמיה׃
20:23 2 וחמא יחזקיהו ארום אתא סנחריב ורעותיה לאגחא קרבא על ירושלם׃
30:23 2 ואתמליך עם רבנוהי וגברוהי למסתם ית מימי עינוון דמן ברא לקרתא וסעדוהי׃
40:23 2 ואתכנשו עם סגיא וסתימו ית כל עינוותא וית נחלא דנגיד במציעות ארעא דישראל למימר למא יהוון אתיין מלכיא דאתור הכא וישכחון מיין סגיעין׃
50:23 2 ואתוקף ובנא ית כל שורא דמתרעא ואסיק עלוהי מוגדליא ומן לברא דשורא שורא חורניתא ותקיף ית מיליתא קרתא דדוד ועבד זיני קרבא לסוגי ותריסין׃
60:23 2 ומני רבני מסדרי קרבא על עמא וכנשנון לותיה לפתאה דתרע קרתא ומליל תנחומין על לבהון למימר׃
70:23 2 אתוקפו ועילמו לא תדחלון ולא תתברון מן קדם מלכא דאתור ומן קדם כל ריכפת גייסא דעמיה ארום בסעדנא סגיעין יתיר מן עמא דעמיה׃
80:23 2 בסעדיה תקוף בשרא ובסעדנא מימרא דייי אלהנא למסעד יתנא ולאגחא סדרי קרבנא ואסתמיכו כל עמא על פתגמי יחזקיהו מליך שבטא דבית יהודה׃
90:23 2 מן בתר כדין שדר סנחריב מלכא דאתור ית עבדוהי לירושלם והוא מעיק על לכיש וכל שלטונוהי עמיה לות יחזקיהו מליך שבטא דבית יהודה ולות כל אנש יהודה די בירושלם למימר׃
01:23 2 כדנן אמר סנחריב מלכא דאתור על מאן אתון רחיצין ויתבין בציירא בירושלם׃
11:23 2 הלא יחזקיהו מטעי יתכון לממסר יתכון לממת באוצלנא ובצחותא למימר ייי אלהנא ישיזבננא מן יד מלכא דאתור׃
21:23 2 הלא הוא יחזקיהו דעטר ית במוסוהי וית אגורוהי ואמר לדבית יהודה ולאנש ירושלם למימר קדם מדבח חד תסגדון ועלוהי תכסון ועלוהי תסקון בוסמין׃
31:23 2 הלא תדעון מה דעבדית אנא ואבהתי לכל עמי ארעתא איפשר דמיכל הוון יכלין טעות עמי ארעתא לשיזבא ית ארעהון מן ידי׃
41:23 2 מן בכל טעות עממיא האלין דגמרו אבהתי דהוה יכיל לשיזבא ית עמיה מן ידי ארום יכיל אלהכון לשיזבא יתכון מן ידי׃
51:23 2 וכדון לא יטעי יתכון יחזקיהו ולא ימליך יתכון כהדא ולא תהימנון במימריה ארום לא יכיל כל טעי וכל עם ומלכו לשיזבא ית עמיה מן ידי ומן יד אבהתי אוף ארום אלהכון לא ישיזיב יתכון מן ידי׃
61:23 2 ותוב מלילו עבדוהי סטיא על מימרא דייי אלהים ועל יחזקיה עבדיה׃
71:23 2 ופטקין כתב לחסדא קדם ייי אלהא דישראל ולמימר סטיא עלוהי למימר הי כטעות עממי ארעתא די לא שיזיבו עמהון מן ידי הכדין לא ישיזיב אלהא דחזקיה ית עמיה מן ידי׃
81:23 2 וקראו בקל רם בלישן בית קודשא לות עמא דבירושלם די על שורא מטול למדחלון ולזעזעותהון מן בגלל דיכבשון ית קרתא׃
91:23 2 ומלילו על ייי אלהא דשכנתיה שריא בירושלם היכמא דמלילו על טעות עממי ארעא עובדי ידי בר נשא׃
02:23 2 וצלי יחזקיהו מלכא וישעיהו בר אמוץ נביא על דא וזעיקו לקביל שמיא׃
12:23 2 ושדר מימרא דייי גבריאל מלאכא ושיצי בלילי פסחא באשא מנתכא ואוקיד נשמתהון בגווהון ושיצי כל גבר חילא וסרכן ורבן במשרית מלכא דאתור ותב בביהות אפיא לארעיה ועל לבית טעותיה ובנוהי דאוליד תמן רמוהי קטיל בחרבא׃

22:23 2 ופרק ייי ית יחזקיהו וית יתבי ירושלם מן ידא דסנחריב מלכא דאתור ומן יד כל עמא ואשרנון לרוחצן חזור חזור׃

32:23 2 וסגיעין אייתן דורונא קדם ייי לירושלם ומגדנין ליחזקיהו מליך שבטא דבית יהודה ואתנטיל קדם כל עממיא מן בתר כדין׃
42:23 2 ביומיא האנון מרע יחזקיהו עד דימטא לממת וצלי קדם ייי ואמר במימריה לאסאה יתיה ולאוספא חמיסרי שנין על יומי חיוהי דאתגזר מן שמיא לאזערא מן יומי חיוהי ותימהא יהב ליה׃
52:23 2 ולא כתושלמת עובדוהי אתיב ייי על יחזקיהו ארום גבה לביה והוה עלוהי רוגזא ועל אנש יהודה וירושלם׃
62:23 2 ואתכנע יחזקיהו מגבהותא דלביה הוא ויתבי ירושלם ולא אתא עליהון רוגזא דייי ביומי יחזקיהו׃
72:23 2 והוו ליחזקיה עותר ויקר סגיא לחדא ותסברין עבד ליה לסימא ולדהבא ולמרגליין יקירתא ולבוסמנין ולתריסין ולכל מאני רגוג׃
82:23 2 ובית אוצרין ואורייאות לעללת עיבור וחמר ומשח ואסטבלוון לכל בעירא ובעירא ועדרין לאסטבלייא׃
92:23 2 וקרוין עבד ליה וגיתי עאן ותורין לסוגי ארום יהב ליה ייי קניינא סגיא לחדא׃
03:23 2 והוא יחזקיה פקק ית מפקנות מוי גיחון עלאה ותקננון ואוביל יתהון במרזבין מלרע למישר קרתא דדוד ואצלח יחזקיהו בכל עובדוהי׃
13:23 2 והיכנא במתורגמי רבני מלכא דבבל דאשתלחון לותיה למתבע תימהא דהוה בארעא למחמי ית תרין לוחי אבניא דהוון בארון קיימיא דייי דאצנע תמן משה עם תרין לוחי אבניא דאתברו על חובי עגלא דעבדו בחרב ארשייה מימרא דייי לאחמיותהון ולא אתנזק מטול לנסיותיה למדע כל מא דהוה בלביה׃
23:23 2 ושאר פתגמי יחזקיהו וחסדוהי הא אנון כתיבין בנבואת ישעיהו בר אמוץ נביא על ספר מלכיא דבית יהודה וישראל׃
33:23 2 ושכיב יחזקיה עם אבהתוהי וקברוהי במסוקית קברי בני דוד ויקר עבדו ליה במותיה כל אנש יהודה ויתבי ירושלם ומלך מנשה בריה תחותוהי׃