30:13 2 וחלק מלכא דיהב מן קניניה לעלוון לעלוות צפרא ורמשא ועלוון למוספי שביא ולרישי ירחיא ולמועדיא הי כמא דכתיב באוריתא דייי׃

40:13 2 ואמר לעמא ליתבי ירושלם למתן חולק כהניא וליואי מן בגלל יתקפון באוריתא דייי׃
50:13 2 וכד אתוקף פתגמא אסגיעו בני ישראל שירוי עיבור חמר ומשח ודובשא דתמריא וכל עללת חקלא ומעשר כולא לסוגעא איתיו׃
60:13 2 ובני ישראל ויהודה דיתבין בקרוי יהודה אוף הנון מעשר תורי ועאן ומעשר קודשיא דמקדשין קדם ייי אלההון אייתיו ויהבו כירוון כירוון׃
70:13 2 בירחא דסיון שריאו כירוון לאתיסדא ובירחא דתשרי פסקו׃
80:13 2 ואתו יחזקיה ורבניא וחמון ית כירוותא ובריכו ית ייי וית עמיה בית ישראל׃
90:13 2 ותבע יחזקיהו על כהניא וליואי על עיסק כירוותא׃
01:13 2 ואמר ליה עזריהו דממנא לרישא על דבית צדוק ואמר מעדן דשריאו לאפרשא אפרשותא לאיתאה לבית מקדשא דייי אכלין ושבעין ומשיירין עד סוגי ארום מימרא דייי בריך ית עמיה ומא דאשתייר הא אית ריכפת טובא הדין׃
11:13 2 ואמר יחזקיה לאתקנא לשכתא בבית מקדשא דייי ואתקינו׃
21:13 2 ואייתיאו ית אפרשותא ומעשרא דקודשיא בהימנותא ועליהון ממנא סרכאן כנניהו ליואה ושמעי אחוהי תניין ליה׃
31:13 2 ויחיאל ועזזיהו ונחת ועשהאל וירמות ויוזבד ואליאל ויסמכיהו ומחת ובניהו ממנן מן יד כנניהו ושמעי אחוהי במנוי יחזקיהו מלכא ועזריהו סרכא בבית מקדשא דייי׃
41:13 2 וקורא בר ימנה ליואה תרעא למדנחא על נדבאתא דמתיין קדם ייי למתן אפרשותא קדם ייי וקודשי קודשיא׃
51:13 2 ועל צטריה עדן ומנימין וישוע ושמעיה אמריה ושכניה בקרוי כהניא בהימנותא למתן לאחוהון בפלוגוותא הי כרבא הי כזעירא׃
61:13 2 בר ממה דאתיחסו לדכרין מבר תלת שנין ולעילא לכל דעליל לבית מקדשא דייי לפתגם יום ביומיה לפולחנהון במטרתהון לפלוגתהון׃
71:13 2 וית דאתיחסו כהניא לבית אבהתהון וליואי מבר עשרין שנין ולעילא במטרתהון בפלוגתהון׃
81:13 2 ולאתיחסא בכל טפלהון נשיהון ובניהון ובנתיהון לכל קהלא מטול דבהימנותהון אתקדשו לקודשא׃
91:13 2 ולבני אהרן כהניא בחקל פרווילי קרויהון בכל קרי וקרי גוברין די אתפרשו בשמהן למתן חולקין לכל דכורא בכהניא ולכל דאתיחסו בליואי׃
02:13 2 ועבד כחדא חזקיהו בכל קרוי יהודה ועבד דתקין ודכשר ודקושטא קדם ייי אלהיה׃
12:13 2 ובכל עובדא דשר{ו}<י> {פולחן} בפולחן בית מקדשא דייי ובאוריתא ובתפקידתא למתבע מן קדם ייי אלהיה בכל לבביה עבד ואצלח׃