60:03 2 ואזל רהטוניא בפטקיא מן ידא דמלכא ורבנוי בכל בית ישראל ויהודה ובתפקידתא דמלכא למימר בני ישראל תובו לדחלתא דייי אלהא דאברהם יצחק וישראל ויתיב ית משיזבת דאשתיירת לכון מן ידיהון דמלכיא דאתור׃

70:03 2 ולא תהון הי כאבהתכון והי כאחוכון די שקרו במימרא דייי אלהא דאבהתהון ומסרונון לסנאיהון ויהבנון לצדו הי כמא דאתון חמאן׃
80:03 2 כדון לא תקשון קדלכון הי כאבהתכון אושיטו ידא ותובו לדחלתא דייי ואיתו לבית מוקדשיה די אקדיש לעלם ופלחו קדם ייי אלהכון ויתיב מנכון תקוף רוגזיה׃
90:03 2 ארום כד תתובון לדחלתא דייי אחוכון ובניכון יהב לרחמין קדם דישבי יתהון ויתיב במימריה לאתבותהון לארעא הדא ארום חננא ורחמנא ייי אלהכון לא יסלק שכנתיה מביניכון אין תתובון עד דחלתיה׃
01:03 2 והוון רהטוניא עברין מן קרי לקרי בארעא דבית אפרים ובבית מנשה ועד זבולן והוון מגחכין עליהון ומתלעבין בהון׃
11:03 2 לחוד גוברין משיבט אשר ומשיבט מנשה ומשיבט זבולן אתכנעו ואתו לירושלם׃
21:03 2 אוף בדבית יהודה הות רעוא מן קדם ייי למתן להון לבא חדא למעבד תפקדתא דמלכא ורבניא הי כפתגמא דייי׃
31:03 2 ואתכנישו לירושלם עם סגיא למעבד ית חגא דפטיריא בירחא תניינא קהלא סגיא לחדא׃
41:03 2 וקמו ועטרו ית אגוריא די בירושלם וית כל בתי אסקות בוסמין עטרו לטעותא וטלקו לנחלא דקדרון׃
51:03 2 ונכיסו ית פסחא בארביסרי לירחא תניינא וכהניא וליואי אתכנעו ואתקדשו ואיתיאו עלוון בבית מקדשא דייי׃
61:03 2 וקמו על דוכנהון כדחזי להון הי כאוריתא דמשה נביא דייי כהניא דרקין ית אדמא מן ידיהון דליואי׃
71:03 2 ארום סוגי קהלא לא אתקדשו וליואי הוו ממנן על נכסת אמריא דפסחא לכל גבר דלא אדכי לאתקדשא קדם ייי׃
81:03 2 ארום סוגי עמא ומדבית אפרים ומדבית מנשה ומדבית יששכר ומדבית זבולן לא אדכיו ארום אכלו ית פסחא קדמאה בדלא כתיב ותבו למעבד פסחא תניינא כדכתיב ארום צלי חזקיהו אמטולהון למימר ייי דהוא טב יכפר על עמא דאשתליו׃
91:03 2 ארום לבביה אתקין למתבע דחלתא דאלהא ייי אלהא דאבהתוי ולא יתבע חוביהון דעמא דלא עבדו ית פסחא כדחזי למיכל בדכותא בשר קודשא׃
02:03 2 וקביל ייי צלותיה דחזקיה ואסי ית עמא׃
12:03 2 ועבדו בני ישראל דאשתכחו בירושלם ית חגא דפטיריא שבעא יומין בחדוא רבתא ומשבחין קדם ייי יומא ביומא ליואי וכהניא בזיני תושבחתא קדם ייי׃
22:03 2 ומליל יחזקיהו על לב כל ליואי דאית בהון שכלא טבא קדם ייי ואכלו ית נכסי קודשיא דמועדא שבעא יומין דבחין דבחי נכסת קודשיא ומהודן קדם ייי אלהא דאבהתהון׃
32:03 2 ואתמליכו כל קהלא למעבד בתר פסחא שירותא שבעא יומין חורנין ועבדו שירותא שבע יומין בחדוא׃
42:03 2 ארום חזקיהו מליך שבטא דבית יהודה אפריש לקהלא אלפא תורין ושבעת אלפין עאן ורבניא אפרישו לקהלא תורין אלפא ועאן עשרתי אלפין ואתקדשו כהניא לסוגעא׃
52:03 2 וחדיאו כל קהלא דבית יהודה וכהניא וליואי וכלהון קהלא דאתו מדבית ישראל וגיוריא דאתיין מארעא דישראל ודיתבין ביהודה׃
62:03 2 והות חדוא רבתא בירושלם ארום מן יומי שלמה בר דוד מלכא דישראל לא הות כדא בירושלם׃
72:03 2 וקמו כהניא ליואי ובריכו ית עמא ואתקבלת צלותהון ועלת צלותהון למדור בית שכינת קודשיה לשמיא׃