The Comprehensive Aramaic Lexicon

10:82 2 בר עשרין שנין אחז כד מלך ושיתסרי שנין מלך בירושלם ולא עבד דכשר קדם ייי הי כדוד אבוי׃
20:82 2 ואזל באורחתהון דמלכיא דבית ישראל ואוף מתכן עבד לבעליא׃
30:82 2 והוא אסיק קטרתא בחילת בר הנם ואעבר ית בנוהי באתרא ושיזיב מימרא דייי מנהון ית חזקיה מן בגלל דגלי קדם ייי דמניה אטימוסין די יפקון תלתא צדיקיא חנניה מישאל ועזריה דאטימוסין דימסרון גרמיהון דיתרמון לגו אתון נורא יקידתא מן בגלל שמא רבא ויקירא ואשתיזיבו מן יקידתא בקדמיתא אשתיזב אברהם מן יקידת אתון נורא דכשדאי דטלקיה תמן נמרוד מן בגלל דלא פלח לטעותיה ובתנייתא אשתיזיבת תמר מן יקידת נורא דבית דיניה דיהודה כד אמר אפקוהא ותתוקד בתליתיתא אשתוזב מן יקידת נורא חזקיהו בר יותם בזמן דטלקיה אבוי בחילת בר הנם בבמסייה דתופת ברביעיתא אשתיזבו חנניה מישאל ועזריה מן אתון נורא יקידתא דנבוכד נצר מלכא דבבל בחמישיתא אשתיזב יהושע בר יהוצדק כהנא רבא כד טלקיה נבוכד נצר רשיעא באתון נורא יקידתא עם אחאב בר קוליה וצדקיה בר מעשיה נביאי שקרא והנון אתוקדו בנורא ויהושע בר יהוצדק אשתיזב מטול זכוותיה ברם אחז ארשע הי כתועבת עממיא דתריך ייי מן קדם בני ישראל׃
40:82 2 ודבח ואסיק בוסמין בבמסיא ועל גלימתא ותחות כל אילן עבוף׃
50:82 2 ומסריה ייי אלהיה בידא דמלכא דארם וקטלו במשרייתיה ושבו מניה שבייתא רבתא ואיתיאו לדרמשק ולחוד ביד מלכא דישראל אתמסר וקטל במשרייתיה קטלא רבתא׃
60:82 2 וקטל פקח בר רמליהו באנש יהודה מאה ועשרין אלפין ביומא חד כולהון בני חילא מן בגלל דשבקו ית דחלתא דייי אלהא דאבהתהון׃
70:82 2 וקטל זכרי גברא דבית אפרים ית מעשיהו בר מלכא וית עזרוקם ארכון דממנא על פלטירין וית אלקנה ארקבטא דמלכא׃
80:82 2 ושבו בני ישראל מאחוהון מאתן אלפין נשין בנין ובנן ואוף עדי סגיא בזו מנהון ואיתיאו ית עדאה לשמרון׃
90:82 2 ותמן הוה נביא דייי עדד שמיה ונפק קדם חילא דאתא לשמרון ואמר להון הא ברוגזא דייי אלהא דאבהתכון על אנש יהודה מסרנון בידיכון וקטילתון בהון ברוגזא דעד צית שמיא מטא׃
01:82 2 וכדון בני יהודה וירושלם אתון אמרין למכבש לעבדין ולאמהן לכון הלא לחוד אתון עמכון קרבן אשמין אתחייביון לקרבא קדם ייי אלהכון׃
11:82 2 וכדון קבילו מני ואתיבו ית שבייתא די שביתון מאחוכון ארום תקיף רוגזא דייי עליכון׃
21:82 2 וקמו גברין מרישי בני אפרים עזריהו בר יהוחנן בר ברכיהו בר משלמות ויחזקיהו בר שלום ועמשא בר חדלי על דאתיין מן חילא׃
31:82 2 ואמרו להון לא תייתון ית שבייתא הכא ארום לחייבא קדם ייי יתנא לאייתא רגוז עלנא אתון אמרין לאוספא עלנא על סורחננא ועל חובתנא ארום סגיאת חובתנא לנא ותקוף רוגזא על ישראל׃
41:82 2 ושבקו מזרזי חילא ית שבייתא וית בזתא קדם רבניא וכל קהלא׃
51:82 2 וקמו גובריא דאתפרשו בשמהן ואתקיפו בשביתא וכל ערטיליהון אלבישו מן עדאה ואלבישונון ואנעילונון ואוכלונון ואשקיאונון ואסחיאונון ודברונון בחמרין לכל דאתקל ואייתיאונון ליריחו קרתא דדקליא קבל אחוהון ותבו לשמרון׃
61:82 2 בעדנא ההיא שדר מלכא אחז למלכא דאתור למסעד ליה׃
71:82 2 ותוב אדומאי אתו וקטלו מן יהודה ושבו שביתא׃
81:82 2 ופלשתאי אתנגידו בקרוי שפילתא ודרומא די לשיבט יהודה וכבשו ית בית שמש וית אילון וית גדרות וית סוכו ופרוילהא וית תמנה וית פרוילהא וית גמזו וית פרוילהא ויתיבו תמן׃
91:82 2 ארום אמאיך ייי ית יהודה מן בגלל אחז מלכא דיהודה ארום אתבטילו דבית יהודה מפולחנא דייי ושקרו שקר במימרא דייי׃
02:82 2 ואמר עלוי תגלת פלנאסר מלכא דאתור ואעיק עלוי ולא תקפיה׃
12:82 2 מטול דפליג אחז ית בית מקדשא דייי וית בית מלכא ורברביא ויהב למלכא דאתור ולא למסעד ליה׃
22:82 2 ובעדן דעאק ליה ואוסיף לשקרא במימרא דייי הוא מלכא אחז׃

32:82 2 ודבח לטעות דרמשק דקטילו בחילוותיה ואמר ארום טעות מלכי ארם אנון מסעדין יתהון להון אדבח ויסעדונני ואנון הוו ליה לתקלותיה ולכל ישראל׃

42:82 2 וכנש אחז ית כל מאני בית מקדשא דייי וקטע ית מאני בית מקדשא דייי ואחד ית דשי בית מקדשא דייי ועבד ליה אגורין בכל זוית בירושלם׃
52:82 2 ובכל קרי וקרי לשיבט יהודה עבד בימוסין לאסקא בוסמין לטעוות עממין נוכראין וארגיז קדם ייי אלהא דאבהתוי׃
62:82 2 ושאר פתגמוי וכל ארחתיה קדמאי ובתראי הא אנון כתיבין על ספר מלכיא דבית יהודה וישראל׃
72:82 2 ושכיב אחז עם אבהתוי וקברוהי בקרתא דירושלם ארום לא איתיוהי לקברי מלכיא דבית ישראל ומלך חזקיה בריה תחותוי׃