CAL CODE HELP CLICK HERE
click on the file description for more information

81011: TgChron2 26

click on a word for lexical analysis
Click on a red-colored coordinate for comments and/or translations of the line

previous chapter


10:62 2 ודברו כל עמא דבית יהודה ית עזיהו והוא בר שיתסרי שנין ואמליכו יתיה תחות אבוי אמציה׃
20:62 2 הוא בנא ית אילת ואתבה לדבית יהודה בתר דשכיב מלכא עם אבהתוי׃
30:62 2 בר שיתסרי שנין עזיהו כד מלך וחמשין ותרתין שנין מלך בירושלם ושום אמיה יכליה מירושלם׃
40:62 2 ועבד דכשר קדם ייי הי ככל מה דעבד אמציה אבוי׃
50:62 2 והוה למתבע אולפן מן קדם ייי ביומי זכריה דמליף בדחלתא דייי וביומיא דתבע אולפן מן קדם ייי אצלחיה ייי׃
60:62 2 ונפק ואגיח קרבא בפלשתאי ותרע ית שורא דגת וית שורא דעזה וית שורא דאשדוד ובנא קרוין באשדוד ובפלשתאי׃
70:62 2 וסעדיה מימרא דייי על פלשתאי ועל ערבאי דיתבין בגזר ובמישר מעון׃
80:62 2 ויהבו עמינאי תקרובתא לעזיהו ואזל שמיה עד מטי למצרים ארום אתקף עד לעילא׃
90:62 2 ובנא עזיהו מגדליא בירושלם על תרע זויתא ועל תרע חילתא ועל תרע זיוייתא ואתקיפנון׃
01:62 2 ובנא מגדליא במדברא ופסל גובין סגיעין ארום עותר סגי הוה ליה ובשפלתא ובמשריא פלחי חקלין בתוריא וענבי כרמין בטורא ובכרמלא ארום רחים פולחנא דארעא הוה׃
11:62 2 והוו לעזיהו משיריין עבדי קרבא ונפקי חילא למשיריא בסכום מנינהון בידא דיעיאל לבלרא ומעשיה סרכא על ידא דחנניה מן רבני מלכא׃
21:62 2 כל מניין רישי אבהתא לגברי חילא תרין אלפין ושית מאה׃
31:62 2 ועל ידיהון משירית חילא תלת מאה אלפין ושבעת אלפין וחמש מאה עבדי קרבא בגבורת חילא למסעד למלכא על בעלי דבבא׃
41:62 2 ואתקין להון עזיה לכל חילא תריסין ומורנין וקולסין ושרינין וקשתין ולאבני קלעיא׃
51:62 2 ועבד בירושלם אומנותא במחשבתא קושקי חליליא בעובד אומנות אומנא למהוי על מוגדליא ועל זיויתא למפתק בגיררין ולמשדי באבנין רברבן ונפק שמיה עד למרחיק ארום אפריש לאסתייעא עד כדי אתקף׃
61:62 2 וכדי אתקף אתגס לביה עד דאתחבל ושקר במימרא דייי אלהיה ועל להיכלא דייי לאסקא על מדבחא דקטרת בוסמין׃
71:62 2 ועל בתרוי עזריה כהנא ועמיה כהניא דייי תמנן בני חילא׃
81:62 2 וקמו על עזיהו מלכא ואמרו ליה לית לך רשו עזיהו לאסקא קטרת בוסמין קדם ייי ארום לכהניא בני אהרן דמתקדשין לאסקא קטרת בוסמין פוק מן מקדשא ארום שקרתא ולא דילך ליקרא בקטורתא קדם ייי׃
91:62 2 ואתנסיס עזיהו ובידיה מחתיתא לאסקא וכד אתנסיס עם כהניא וסגירותא סגיית בבית אפוהי קדם כהניא בבית מקדשא דייי מעלוי מדבחא דקטורתא׃
02:62 2 ואתפני לותיה עזריה כהנא די ממנא לרישא וכל כהניא והא הוא סגיר בבית אפוהי וסרהבוהי למפק ואוף הוא סרהיב למפק ארום אייתי עלוהי מימרא דייי מכתשא׃
12:62 2 והוה עזיהו מלכא סגיר עד יום מותיה ויתיב בבית סגירותא בר מירושלם כד סגיר ארום אתפרש מאנש ביתיה על מה דאתגזר עלוי בבית מקדשא דייי ויותם בריה ממנא על בית מלכא דאין ית עמא דארעא׃
22:62 2 ושאר פתגמי עזיהו קדמאי עד לא סרח ואסתגיר ובתראי מן בתר דאסתגיר כתב ישעיהו בר אמוץ נביא׃

32:62 2 ושכיב עזיהו עם אבהתוי וקברו יתיה עם אבהתוי בחקל קבורתא דהות למלכיא ארום אמרו סגיר הוא ומלך יותם בריה תחותוי׃


next chapter