CAL CODE HELP CLICK HERE
click on the file description for more information

81011: TgChron2 24

click on a word for lexical analysis
Click on a red-colored coordinate for comments and/or translations of the line

previous chapter


10:42 2 בר שבע שנין יואש כד מלך וארבעין שנין מלך בירושלם ושום אמיה צביה מבאר שבע׃
20:42 2 ועבד יואש דכשר קדם ייי כל יומיא דיהוידע כהנא׃
30:42 2 ונסיב ליה יהוידע נשין תרתין ואוליד בנין ובנן׃
40:42 2 והוה מן בתר כדין הוה עם לביה דיואש לחדתא ית בית מקדשא דייי׃
50:42 2 וכנש ית כהניא וליואי ואמר להון פוקו לקרוי יהודה וכנושו מן כל ישראל כספא לתקפא ית בית מקדשא דייי אלהכון מסת שנא בשנא ואתון תסרהבון למללא ולא סרהיבו ליואי׃
60:42 2 וקרא מלכא ליהוידע אמרכלא דממנא על רישא ואמר ליה מה דין לא תבעתא על ליואי לאיתאה מיהודה ומירושלם ית משכן זמנא דמשה עבדא דייי וקהלא דישראל עם משכנא דסהדותא׃
70:42 2 ארום עתליה חייבתא ובנהא תרעו ית בית מקדשא דייי ואוף כל קודשי בית מקדשא דייי עבדו לטעוותא׃
80:42 2 ואמר מלכא ועבדו ארונא חד ושיויוהי בתרע בית מקדשא דייי מן לבר׃
90:42 2 ואעברו כרוז ביהודה ובירושלם לאיתאה קדם ייי משכן זמנא דמשה עבדא דייי דעבד לכפרא על בני ישראל במדברא׃
01:42 2 וחדו כל רברביא וכל עמא ואייתיאו נדבתא ורמו בארונא עד לית סוף׃
11:42 2 והוה בעדן דאיתיאו ית ארונא למנוי מלכא בידא דליואי וכד חמון ארום סגא כספא בארונא אתא לבלרא דמלכא וסגן כהנא דממנא לרישא ורוקינו ית ארונא ונטלוהי ואתיבו יתיה לאתריה הכדין עבדו יומא ביומא וכנשו כספא לסוגי׃
21:42 2 ויהב יתיה מלכא ויהוידע לעבדי עבידת פולחן בית מקדשא דייי והוון אגרין מפסלין ונגרין לחדתא ית בית מקדשא דייי ואוף לנגרי פרזלא ונחשא לתקפא ית בית מקדשא דייי׃
31:42 2 ועבדו עבדי עבידתא וסליקת ארכא לעבידתא בידיהון ואקימו ית בית מקדשא דייי על תקוניה ותקפוהי׃
41:42 2 וכד שיציאו איתיאו קדם מלכא ויהוידע ית שאר כספא ועבדו מניא לבית מקדשא דייי מאני שמושא ומגיסיא ובזיכיא ומאני דהבא וכספא והוו מסקין עלוותא בבית מקדשא דייי תדירא כל יומי יהוידע׃
51:42 2 וסיב יהוידע ושבע יומין ומית בר מאה ותלתין שנין הוה כד מית׃
61:42 2 וקברו יתיה בקרתא דדוד עם מלכיא ארום עבד מצוותא בישראל ועם מימרא דייי ובית מקדשיה׃
71:42 2 ובתר דמית יהוידע אתו רברבי יהודה וסגידו למלכא יואש ואטעיוהי בכין קביל מלכא מנהון טעותהון׃
81:42 2 ושבקו ית בית מקדשא דייי אלהא דאבהתהון ופלחו ית אשירתא וית טעותא והוה רגז על אנש יהודה וירושלם מטול סורחנותהון דא׃
91:42 2 ושדר בהון נבייא לאתבותהון לפולחנא דייי ואסהידו בהון ולא אציתו׃

02:42 2 ורוח נבואה מן קדם ייי שרת על זכריה בר יהוידע כהנא כד חמא ית סורחנות מלכא ועמא דמסקין קטרת לפסלא בבית מקדשא דייי על מדבחא ביומא דכפוריא ומבטלין כהניא דייי מלמעבד עלוותא ונכסתא וקרבן יומא ומוספייה הי כמה דכתיב בספר אוריתא דמשה וקם מעל לעמא ואמר להון כדנן אמר ייי למא אתון עברין ית פקודיא דייי ולא תצלחון ארום שבקתון ית פולחנא דייי וישבוק יתכון׃

12:42 2 ומרדו עלוהי ואטלו יתיה באבנין הי כתפקידתא דמלכא בדרת בית מקדשא דייי׃
22:42 2 ולא דכר יואש מלכא ית חסדא די עבד יהוידע אבוי עמיה וקטל ית בריה וכד מטא לממת אמר יתגלי קדם ייי ויתפרע ויתבע׃
32:42 2 והוה לסופא דשתא סליקו עלוהי חילוות ארמאי ואתו ליהודה ולירושלם וקטלו ית כל רבני עמא מן עמא וכל עדאיהון שדרו למלכא דרמשק׃
42:42 2 ארום בצבחר גוברין אתו חילוות ארמאי וייי מסר בידיהון חילא לסוגי לחדא ארום שבקו ית דחלתא דייי אלהא דאבהתהון ועם יועש עבדו דינין׃
52:42 2 ובמזליהון מן לותיה ארום שבקו יתיה במרעין בישין סגיעין מרדו עלוהי עבדוהי מן בגלל לאתפרעא דמי בני יהוידע כהנא וקטלוהי על ערשיה ומית וקברוהי בקרתא דדוד ולא קברוהי בקברי מלכיא׃
62:42 2 ואלין דמרדו עלוהי זבד בר שמעת עמוניתא ויהוזבד בר שמרית מואביתא׃
72:42 2 ובנוי רמו מסקין מסין על דבית יהודה כד הוה מייסד בית מקדשא דייי ממימר מלכא וכהניא ואתקטלו בקרבא מטול חובי אבוהון והאנון כתיבין על פרשגן ספר מלכיא ומליך אמציה בריה באתרוהי׃


next chapter