50:32 2 ותלתא בבית מלכא ותלתא בתרע גברייה הוא תרע בית אולפן סנהדרין וכל עמא בדרת בית מקדשא דייי׃

60:32 2 ולא יעול לבית מקדשא דייי אלהן כהניא ושמשייה ליואי אנון יעלון ארום קודשא אנון וכל עמא ינטרון מטרת בית מקדשא דייי׃
70:32 2 ויקפון ליואי ית מלכא חזור חזור גבר וזייניה בידיה ודיעול לבית מקדשא דייי יתקטל ויהון עם מלכא במיעליה ובמפקיה׃
80:32 2 ועבדו ליואי וכל אנש יהודה הי ככל מה דפקיד יהוידע כהנא ודברו אנש ית גברוהי עללי מטרת שבתא עם נפקי מטרת שבתא ארום לא ארשי יהוידע כהנא ית פלוגוותה׃
90:32 2 ויהב יהוידע כהנא לרבני מאוותא ית מורניהא וית תריסיא וית עגיליא די למלכא דוד ודי בבית מקדשא דייי׃
01:32 2 ואקים ית כל עמא וגבר זייניה בידיה מן עיבר ביתא מן ימינא עד עיבר ביתא מן שמאלא למדבחא ולבית מקדשא על מלכא חזור חזור׃
11:32 2 ואפיקו ית ברא דמלכא ויהבו עלוי ית כלילא דמלכותא די דבר דוד מעל רישא דמלכא דבני עמון ובה אבן טבא שייבה דהוה חקיק ומפרש עלה שמא רבא ויקירא דקבעה תמן דוד ברוח קודשא והוה טימין דידה מתקל קנטינר דדהבא וסהדותא היא לבית דוד דכל מלכא דלא הוה מזרעיה דדוד לא הות מתקבלא על רישיה ולית איפשר דיסובר יתה וכד חמון עמא דאתקבלת על רישיה דיהואש וסובר ית כלילא הימינו דמזרעיה דדוד הוא ומן יד אמליכו יתיה ורביאו יתיה יהוידע ובנוהי ואמרו יצלח מלכא במלכותיה׃
21:32 2 ושמעת עתליהו ית קל עמא דמרננין ומשבחין ית מלכא ואתת לות עמא לבית מקדשא דייי׃
31:32 2 וחמת והא מלכא קאים על אסטווניה במעלנא ורברביא וחצצרתא קדם מלכא וכל עמא דארעא חדאן ותקעין בחצצרתא ומשבחין בזיני תושבחתא ומלפין לשבחא ובזעת עתליה ית לבושהא ואמרת מרדא מרדא׃
41:32 2 ואפיק יהוידע כהנא ית רבני מאוותא די ממנן על חילא ואמר להון אפקוהא לגיו מן סדרי מעלניא ודייעול בתרהא יתקטיל בחרבא ארום אמר כהנא לא תקטלונה הכא דלא תסאיב ית בית מקדשא דייי׃
51:32 2 ושויאו לה אתר מרווח ועלת באורח מעלנא דתרע סוסוותא לבית מלכא וקטלוהא תמן׃
61:32 2 וגזר יהוידע קיים בין מימריה ובין כל עמא ובין מימרא דמלכא למהוי לעם משמש קדם ייי׃
71:32 2 ואתו כל עמא לבית בעלא ותרעו יתיה וית אגורוהי וית צלמוהי תברו וית מתן כומרא דבעלא קטלו קדם אגורייא׃
81:32 2 ומני יהוידע ממנן בבית מקדשא דייי ביד כהניא ליואי די פליג דוד על בית מקדשא דייי לאסקא עלוון קדם ייי היכמה דכתיב באוריתא דמשה בחדווא ובתושבחא על ידא דדוד׃
91:32 2 ואקים תרעיא על תרעי בית מקדשא דייי דלא יעול מסאב לכל מדעם׃
02:32 2 ודבר ית רבני מאוותא וית גבריא וית שליטיא בעמא וית כל עמא דארעא ואחית ית מלכא מבית מקדשא דייי ואתו במצע תרעא עלאה לבית מלכא ואותיבו ית מלכא על כורסי מלכותא׃
12:32 2 וחדו כל עמא דארעא וקרתא שדוכת וית עתליהו קטלו בחרבא׃