60:02 2 ואמר ייי אלהא דאבהתנא הלא את הוא ייי דשכנתך בשמיא ואת שליט בכל מלכוותא דעממיא ובידך חילא וגבורתא ולית בר מנך ולית יכולתא לכל מלכא למקום לקבלך׃

70:02 2 הלא את במימרך אלהנא תרכתא ית יתבי ארעא הדא מן קדם עמך ישראל ויהבתה לבני אברהם רחמך לעלם׃
80:02 2 ויתיבו בה ובנו לך בה בית מקדשא לשום מימרך למימר׃
90:02 2 כד תיתי עלנא בישתא קטלין דחרבא ומותנא ואוצלנא נצלי קדם בית מקדשא הדין וקדמך ארום שכנתך בביתא הדין ונצוח לותך מעיקתנא ותקבל צלותנא ותפרקיננא׃
01:02 2 וכדון הא בני עמון ומואב וטוורא דגבלא די לא ארשיתא לבית ישראל למיתי לאגחא קרבא בהון במיתיהון מארעא דמצרים ארום סטו מלותהון ולא שיציאונון׃
11:02 2 והא אנון פרעין לנא בישתא למיתי לתרכותנא מאחסנתנא די אחסינתא יתנא׃
21:02 2 אלהנא הלא תתפרע מנהון ארום לית בנא חילא למקום קדם ריכפת עמא סגי הדין דאתא עלנא ואנחנא לית אנחנא ידעין מה נעביד ארום לותך תלינן עינינן׃
31:02 2 וכלהון דבית יהודה קיימין קדם ייי אוף טפלהון אוף נשיהון ובניהון׃
41:02 2 ויחזיאל בר זכריה בר בניה בר יעיאל בר מתניה ליואה מן בני אסף שרת עלוי רוח נבואה מן קדם ייי במצע קהלא׃
51:02 2 ואמר אציתו כל אנש יהודה ויתבי ירושלם ומלכא יהושפט כדנן אמר ייי לכון אתון לא תדחלון ולא תתברון מן קדם ריכפת עמא סגי הדין ארום לא לכון סדרי קרבא אלהן קדם ייי׃
61:02 2 יומא אחרא חותו עליהון האנון סלקין במסקנא דאודיקות כלילא ותשכחון יתהון בשילהי נחלא באפי מדברא דירואל׃
71:02 2 לא דלכון לאגחא קרבא בדא אתעתדו קומו וחמון ית פורקנא דייי עמכון יהודה וירושלם לא תדחלון ולא תתברון למחר פוקו קדמיהון ומימרא דייי בסעדכון׃
81:02 2 וכרע יהושפט על אפוי על ארעא וכל אנש יהודה ויתבי ירושלם כרעו קדם ייי למסגוד קדם ייי׃
91:02 2 וקמו ליואי מן בני קהת ומן בני קרח לשבחא קדם ייי אלהא דישראל בקלא רמא לעילא׃
02:02 2 ואקדימו בצפרא ונפקו למדבר תקוע ובמפקהון קם יהושפט ואמר קבילו מני אנש יהודה ויתבי ירושלם הימינו במימרא דייי אלהכון והימינו באוריתיה והימינו בנביוהי ותצלחון׃
12:02 2 ומליך לעמא ואקים משבחיא קדם ייי ומשבחין בשבהורא דקודשא במפקא קומי מזרזא ואמרין שבחו קדם ייי ארום לעלם טוביה׃
22:02 2 ובעדן דשריאו בתושבחתא ומשבחין מני מימרא דייי כמנין על בני עמון ומואב וטוורא דגבלא דארכון לאגחא קרבא עם יהודה ואתברו׃
32:02 2 וקמו בני עמון ומואב על יתבי טוורא דגבלא לגמרא ולשיצאה וכד שיציאו ביתבי דגבלא מתגריין אנש בחבריה לחבלא׃
42:02 2 ואנש יהודה עלו על סכותא למדברא ואתפניאו לריכפת חילוותא והא אנון גושמין רמיין קטילין על ארעא ולית שיזבותא׃
52:02 2 ואתא יהושפט וקם למבוז עדאיהון ואשכחו בהון נכסין סגיעין וקניינא וגושמין קטילין ומאני רגרוגין ורוקנון להון עד דלא יכלין לסוברא והוון יומין תלתא בזזין ית עדאיהון ארום סגיא הוא׃
62:02 2 וביומא רביעאה אתכנשו למישר ברכתא ארום תמן בריכו ית ייי מטול הכנא קרו ית שמא דאתרא ההוא מישר ברכתא עד יומא הדין׃
72:02 2 ותבו כל אנש יהודה וירושלם ויהושפט ממנא ברישיהון למתוב לירושלם בחדווא ארום אחדיאנון מימרא דייי מן בעלי דבביהון׃
82:02 2 ואתו לירושלם בנבלין ובכנרין ובחצצרתא לבית מקדשא דייי׃
92:02 2 והוה דחלתא דייי על כל מלכוות ארעא כד שמעו ארום אגיח קרבא מימרא דייי עם בעלי דבביהון דישראל׃
03:02 2 ושדוכת מלכות יהושפת ואניח ליה מימרא דאלהיה מן חזור חזור׃
13:02 2 ומליך יהושפט על אנש יהודה בר תלתין וחמש שנין כד מלך ועשרין וחמש שנין מלך בירושלם ושום אמיה עזובה בת שלחי׃
23:02 2 והליך באורח אסא אבוהי ולא עדא מנה למעבד דכשר קדם ייי׃
33:02 2 לחוד ית במוסיה לא עטרו ועד כדון עמא לא אתקינו לבהון לדחלתא דאלהא דאבהתהון׃
43:02 2 ושאר פתגמי יהושפט קדמאי ובתראי הא אנון כתיבין בפתגמי יהוא בר חנני דאתמנא ליבלר על ספר דוכרניא למלכיא דבית ישראל׃
53:02 2 ומן בתר כדין אתחבר יהושפט מליך שבטא דבית יהודה עם אחזיה מלכא דבית ישראל דהוא אתחיב למהוי רשיעא׃
63:02 2 וחבריה עמיה למעבד אלפיא למיזל לטורסוס לימא רבא ועבדו אלפיא בכרך תרנגולא׃
73:02 2 ואתנבי אלעזר בר דודיהו דמן מרשה על יהושפט למימר כד אתחברתא עם אחזיהו קלקיל מימרא דייי ית עובדיך ואתברו אלפיא ולא יכילו למיזל לטורסוס׃