CAL CODE HELP CLICK HERE
click on the file description for more information

81011: TgChron2 18

click on a word for lexical analysis
Click on a red-colored coordinate for comments and/or translations of the line

previous chapter


10:81 2 והוה ליהושפט עותר ויקר לסוגי ואתחתן עם אחאב׃
20:81 2 ונחת לסוף שניא לות אחאב לשמרון ונכס ליה אחאב עאן ותורי לסוגי ולעמא די עמיה ושדליה למסק לרמות גלעד׃
30:81 2 ואמר אחאב מלכא דישראל ליהושפט מליך שבטא דבית יהודה התיזיל עמי לרמת גלעד ואמר ליה אנא דיכמתך ודיכמת עמך עמי מה די ימטי לך ימטי לי בקרבא׃
40:81 2 ואמר יהושפט למלכא דישראל תבע כדון יומא דין ית פתגמא דייי׃
50:81 2 וכנש מלכא דישראל ית נביאי ארבע מאה גוברין ואמר להון הכשר לנא דניסק לרמת גלעד אין אתמנע ואמרו סק וימסור ייי בידא דמלכא׃
60:81 2 ואמר יהושפט האיפשר דלית כא נביא דכשר קדם ייי תוב ונתבע מניה׃
70:81 2 ואמר מלכא דישראל ליהושפט תוב אית גברא חד למתבע פתגמא דייי מניה ואנא רחיקתיה מטול דליתוי מתנבי עלי לטבתא ארום כל יומוי לבישתא הוא מיכיהו בר ימלה ואמר יהושפט לא יימר מלכא היכנא׃
80:81 2 וקרא מלכא דישראל לגוואוה״לגוזאה#1#״ חד ואמר סרהיב למיתי למיכיהו בר ימלה׃
90:81 2 ומלכא דישראל ויהושפט מליך שבטא דבית יהודה לבישין לבושי מלכותא ויתבין מסחרין הי כפלגות אדרא דין תבע מן נביי שקרא ודין תבע אולפן מן קדם ייי ומצלי במעלנא דשמרון וכלהון נביי שקרא מתנבן בשקר קדמיהון׃
01:81 2 ועבד צדקיה בר כנענה נבי שקרא דמות צורתא דקרנין דפרזל ואמר כדנן אמר ייי באלין תקטול ית אנש ארם עד די תשיצנון׃
11:81 2 וכלהון נביי שקרא מתנבן בשקר היכנא למימר סק לרמת גלעד ואצלח וימסור ייי בידא דמלכא׃
21:81 2 ועזגדה די אזל למקרי למיכה מליל לותיה למימר הא פתגמי נביי שקרא ממלל חד שוה ותקין קדם מלכא ויהי כדון פתגמך כחדא מנהון ותמליל פתגמין תקנין׃
31:81 2 ואמר מיכה קיים הוא ייי ארום ית די יימר אלהי יתיה אמליל׃
41:81 2 ואתא לות מלכא ואמר מלכא לותיה מיכה הכשר דנסק לרמת גלעד לאגחא קרבא אין אתמנע ואמר סק ואצלח ויתמסרן בידיכון׃
51:81 2 ואמר ליה מלכא עד כמה זמנין אנא מקיים עלך די לא תתנבי עלי לחוד קושטא בשום מימרא דייי׃
61:81 2 ואמר חמית ית כל ישראל מ{נ}<ב>דרין עלווי טווריא הי כענא די לית להון רעי ואמר ייי לית רבונין לאלין יתובון אנש לבייתיה בשלם׃
71:81 2 ואמר מלכא דישראל ליהושפט הלא אמרית לוותך דלא יתנבי עלי טב ארום אלהן לביש׃
81:81 2 ואמר הא בכין קביל פתגמי נבואתא דייי חמית ית איקר שכנתיה דייי יתיב על כורסי יקריה וכלהון חיילי שמיא קיימין ומשמשין מן ימיניה ומן שמאליה׃
91:81 2 ואמר ייי מן ישרגג ית אחאב מלכא דישראל ויסק ויתרמי קטיל ברמת גלעד ואמר דין יימר בכדין ודין יימר בכדין׃
02:81 2 ונפק רוחא דנבות דמן יזרעאל ממחיצת צדיקיא וקם קדם ייי ואמר אנא אטעניה ואמר ייי ליה במה׃
12:81 2 ואמר אפוק ואיהי לרוח נבואת שקר בפומהון דכלהון נביוהי ואמר תטעי ואוף אית לך יוכלא למטעי יתהון ברם לית לך רשו למתוב למתב ביני צדיקיא מטול דכל מן דממליל שקר לית איפשר ליה דיהוי מדוריה ביני צדיקיא מבכין פוק מן לותי ועביד כן׃
22:81 2 וכדון הא מני ייי רוח נבואת שקר בפומהון די נב{ו}<י>אך אלין ומן קדם ייי אתגזר לאיתאה עלך בישתא׃
32:81 2 וקריב צדקיה בר כנענה ואלקי ית מיכה עלוי ליסתיה ואמר אידא שעתא אסתלקא רוח נבואה מן קדם ייי מני למללא עמך׃
42:81 2 ואמר מיכה הא את חמי ביומא ההוא די תיעול תוון בגוא תוון לאטמרא׃
52:81 2 ואמר מלכא דישראל דברו ית מיכה ואותבוהי גבי אמון רב קרתא וגבי יואש בריה דמלכא׃
62:81 2 ותימרון כדנן אמר מלכא מני ית דין בבית אסירי ואוכלוהי לחים בדחוק ומוי בדחוק עד זמן דאתוב בשלם׃
72:81 2 ואמר מיכה אין מיתב תתוב בשלם לית רעוא דייי בי ולא אתמלל ברוח נבותה עמי ואמר שמעו עממיא כלהון׃
82:81 2 וסליק מלכא דישראל ויהושפט מליך שבטא דבית יהודה לרמת גלעד׃
92:81 2 ואמר מלכא דישראל ליהושפט אנא אשתני ואיעול בקרבא ואנת לבוש לבושך ואשתני מלכא דישראל ועל בקרבא׃
03:81 2 ומלכא דארם פקיד ית רבני ארתיכא די ליה למימר לא תגיחון קרב עם זעירא ועם רבא ארום אלהן עם מלכא דישראל בלחודוי׃
13:81 2 והוה כד חמון רבני ארתיכא ית יהושפט ואנון אמרו מלכא דישראל הוא ואסחרו עלוי לאגחא קרבא וצוח יהושפט ומימרא דייי סייע ליה ורחיקנון ייי מניה׃
23:81 2 והוה כד חמון רבני ארתיכא ארום לא הוה מלכא דישראל ותבו מאחורוהי׃
33:81 2 ונעמן רב חילא דרב מלכא דארם נגד בקשתא לקבליה לאשלמא נבואת אליה דמן תשוב ונבואת מיכה בר ימלה ומחא ית מלכא דישראל ביני לבא וביני חצר כבדא מאתר מדבקייה דשריינא ואמר למן דמרכיב ליה חזור לאחורך ואפיקני מן משירית עבדי קרבא ארום אתמרעית׃

43:81 2 וסליקו עבדי קרבא ביומא ההוא ומלכא דישראל הוה מתקף וקאים בארתיכא כל קביל אנש ארם עד רמשא ומית לעדן מטמע שמשא׃


next chapter