CAL CODE HELP CLICK HERE
click on the file description for more information

81011: TgChron2 17

click on a word for lexical analysis
Click on a red-colored coordinate for comments and/or translations of the line

previous chapter


10:71 2 ומלך יהושפט בריה בתריה ואתקף על דבית ישראל׃
20:71 2 ומני חילוון בכל קרוי יהודה כריכן ומני אסטרטיגין בארע שבטא דבית יהודה ובקרוי אפרים די כבש אסא אבוהי׃
30:71 2 והוה מימרא דייי בסעדיה דיהושפט ארום הליך באורחתיה דדוד אבוי קדמאי ולא תבע אולפן מן טעוותא׃
40:71 2 מטול די לאלהא דאבוהי תבע ובפקודוי הליך ולא כעובדין בישין דבית ישראל׃
50:71 2 ואתקין ייי ית מלכותא בידיה ויהבו כל דבית יהודה דורון ליהושפט והוה ליה עותרא ונכסין ויקר לסוגי׃
60:71 2 וראים לביה להלכא באורחן דתקנן קדם ייי ותוב עטר ית במוסיא וית אשיריא מדבית יהודה׃
70:71 2 ובשתא תליתיתא למלכותיה שדר לרברבנוי לבן חיל ולעבדיה ולזכריה ולנתנאל ולמיכיהו לאלפא דחלתא דייי בקרוי יהודה׃
80:71 2 ועמהון ליואי שמעיה ונתניה וזבדיה ועשהאל ושמירמות ויהונתן ואדניה וטוביה וטוב אדניה ליואי ועמהון אלישמע ויהורם כהניא׃
90:71 2 ואליפו בדבית יהודה ועמהון ספר אוריתא דייי ואסחרו בכל קרוי יהודה ואליפו בעמא׃
01:71 2 והוה דחילא דייי על כלהון מלכוות ארעתא די חזרנות יהודה ולא אגיחו קרבא עם יהושפט׃
11:71 2 ומן פלשתאי מייתין דורונא ליהושפט וסימא ודהבא תקרובתא אוף ערבאי מייתין ליה עאן דכרין שבעת אלפין ושבע מאה וברחין שבעת אלפין ושבע מאה׃
21:71 2 והוה יהושפט אזיל ורבי עד לעילא ובנא ביהודה בירניותא וקרוי בית אוצרין׃
31:71 2 ופולחנא סגיעא הות ליה בקרוי יהודה וגברי עבדי קרבא בירושלם׃
41:71 2 ואלין מניינהון לבית אבהתהון לשיבט יהודה רבני אלפין עדנה רבא ועמיה גברי חילא תלת מאה אלפין׃
51:71 2 ודשרי סמיך עלוי יהוחנן רבא ועמיה מאתן ותמניא אלפין׃
61:71 2 ודשרי סמיך עלוי עמסיה בר זכרי דאתנדב קדם ייי ועמיה מאתן אלפין גברי חילא׃
71:71 2 ומן שיבט בנימן גברי חילא אלידע ועמיה נגדי קשתא ואחדי תריסין מאתן אלפין׃
81:71 2 ודשרי סמיך עלוי יהוזבד ועמיה מאה ותמניא אלפין מזרזי חילא׃

91:71 2 אליין דמשמשין ית מלכא בר די מסר מלכא בקרוין כריכן בכל קרוי יהודה׃


next chapter