10:61 2 בשנת תלתין ושית למלכות אסא סליק בעשא מלכא דישראל על דבית יהודה ובנא ית רמתא מן בגלל דלא למשבק נפיק ועליל לאסא מליך שבטא דבית יהודה׃

20:61 2 ואפיק אסא סימא ודהבא מן תסברי בית מוקדשא דייי ומבית מלכא ושדר לבר הדד מלכא דארם דיתיב בדרמשק למימר׃
30:61 2 קיימא בין מימרי ובין מימרך ובין אבא ובין אבוך הא שדרית לותך סימא ודהבא איזיל אשני קיימך דעם בעשא מלכא דישראל ויסתלק מעלווי׃
40:61 2 וקביל בר הדד מן מלכא אסא ושדר ית רבני חילוותא די ליה לקרוי ישראל ומחו ית עיון וית דן וית אבל ממערבא וית כל בית אוצרין די בקרוי נפתלי׃
50:61 2 והוה כד שמע בעשא ופסק מן למבני ית רמתא ובטיל ית עבידתיה׃
60:61 2 ואסא מלכא דבר ית כל אנש יהודה ונטלו ית אבני רמתא וית קיסייהא די בנה בעשא ובנא בהון ית גבישתא וית סכותא׃
70:61 2 ובעדנא ההיא אתא חנני נביא לות אסא מליך שבטא דבית יהודה ואמר ליה כד אסתמכתא על מלכא דארם ולא אסתמכתא על מימרא דייי אלהך מטול הכנא אשתיזב חיל מלכא דארם מן ידך׃
80:61 2 הלא כושאיי ולובאיי הוו לחיל סגיא לארתכין ולפרשין לסוגי לחדא ובאסתמכותך על מימרא דייי מסרנון בידך׃
90:61 2 ארום ייי עינוהי מסתכלין בכל ארעא לאתקפא עם צדיקיא דלבהון שלים לותיה אסכלתא לא אטפשיתא על דא ארום מבכין אית עמך סדרי קרביא׃
01:61 2 ורגיז אסא על נביא ומנייה בבית אסירי ארום אתנסיס עמיה על דא ושעביד אסא מן עמא בעדנא ההיא׃
11:61 2 והא פתגמי אסא קדמאי ובתראי והא אנון כתיבין על ספר מלכיא דבית יהודה ודבית ישראל׃
21:61 2 ומרע אסא בשנת תלתין ותשע למלכותיה ואתחגר ברגלוי עד לעילא אתגבר מרעיה ואוף כד מרע לא תבע אולפן מן קדם ייי אלהן באסוותא׃
31:61 2 ושכיב אסא עם אבהתוי ומית בשנת חדא וארבעין כד מלך׃
41:61 2 וקברו יתיה בבית קבורתיה די תקין ליה בקרתא דדוד ואשכבוהי במשכבא דמלי בושמין וזיני זיני וריחנין מבסמין בוסמנין עובד אסיא ואוקידו ליה יקידת קיסי בוסמיא רבתא עד לחדא׃