10:31 2 בשנת תמניסרי שנין למלכא ירבעם ומלך אביה על דבית יהודה׃

20:31 2 תלת שנין מלך בירושלם ושום אמיה מיכיהו ברת אוריאל מן גבעתא היא הות מעכה ברת אבשלום ואמטול דהות אתא כשירתא אתהפכא למתקרי מיכיהו שמא דמעלי ושום אבוהא אתהפך למתקרי אוריאל דמן גבעתא דלא למדכר שמיה דאבשלום וקרבא הות ביני אביה וביני ירבעם׃
30:31 2 וטקיס אביה ארתכיה וסדר קרבא בחיל גברי עבדי קרבא ארבע מאה אלפין גוברין עולימין וירבעם טקיס עמיה סדרי קרבא בתמני מאה אלפין גוברין גברי חילא׃
40:31 2 וקם אביה מעלוי לטוור צמרים די בטוור שבטא דבית אפרים ואמר קביל מני ירבעם וכלהון בית ישראל׃
50:31 2 הלא לכון למדע ארום ייי אלהא דישראל יהב מלכותא לדוד ואשלטיה על ישראל לעלם ליה ולבנוי קיים מלח היכמה דמוי דימא לית איפשר דמתמתקין לעלם היכדין לית איפשר דתעדי שלטנא מדבית דוד עד עלמא׃
60:31 2 וקם ירבעם בר נבט עבדא דשלמה בר דוד ומרד על רבוניה׃
70:31 2 ואתכנשו לותיה אנשין סריקין בני רשעא ואתעלמון על רחבעם בר שלמה ורחבעם הוה טלי ורכי{ן}<ך> לבא ולא אתוקף קדמיהון׃
80:31 2 וכדון אתון אמרין לאתקפא קדם מלכותא דמן קדם ייי אתיהיבת ביד בנוי דדוד ואתון ריכפת עממין סגיעין ועמכון עגלין דדהבא די עבד לכון ירבעם בר נבט לדחלן׃
90:31 2 הלא תריכתון ית כהניא דייי בני אהרן וליואי ועבדתון לכון כומרין הי כעמי ארעתא כל דאתי לקרבא קורבניה בתור בר תורי ודכרין שבעא ויהי כהין בר מן מימרא דייי׃
01:31 2 ואנחנא מימרא דייי בסעדנא והוא אלהנא לא שבקנא דחלתיה וכהניא דמשמשין קדם ייי בני אהרן וליואי בעבידתא׃
11:31 2 ומסקין קטרת בוסמין קדם ייי עלוון בצפר בצפר וברמש ברמש וקטרת בוסמין וסדור לחמא על פתור דכי ומנורתא דדהבא ובוצינהא לאדלקא ברמש ברמש ארום נטרין אנחנא ית מטרת מימרא דייי אלהנא ואתון שבקתון ית דחלתיה׃
21:31 2 והא עמנא ברישא ייי וכהנוהי וחצוצרת יבבא ליבבא עליכון בני ישראל לא תגיחון קדם ייי אלהא דאבהתכון ארום לא תצלחון׃
31:31 2 וירבעם אסחר ית כמנא למיתי מן בתריהון והוו לאפי דבית יהודה וכמנא מן בתריהון׃
41:31 2 ואסתכיאו דבית יהודה והא להון קרבא מן קדמיהון ומן בתריהון וקבילו קדם ייי וכהניא מחצרין בחצצרתא׃
51:31 2 ויביבו אנש יהודה והוה כד יביבו אנש יהודה ומימרא דייי תבר ית ירבעם וכלהון ישראל קדם אביה ובית יהודה׃
61:31 2 ואפכו בני ישראל מן קדם דבית יהודה ומסרנון ייי בידיהון׃
71:31 2 ומחו בהון אביה ועמיה מחתא רבתא ונפלו קטילין בחרבא מדבית ישראל חמש מאה אלפין גבר עולם׃
81:31 2 ואתברו בני ישראל בעדנא ההיא ואתקפו בני יהודה ארום אסתמיכו על מימרא דייי אלהא דאבהתהון׃
91:31 2 ורדף אביה בתר ירבעם וכבש מניה קרוין ית ביתאל וית כופרנהא וית ישנה וית כופרנהא וית עפרון וכופרנהא׃
02:31 2 ולא הוה חילא בירבעם תוב ביומי אביהו ותבריה ייי ומית׃
12:31 2 ואתוקף אביהו ונסיב ליה נשין ארביסרי ואוליד עשרין ותרין בנין ושיתסרי בנן׃
22:31 2 ושאר פתגמי אביה ואורחתיה ופתגמוי כתיבין במדרשיה דנביא עדו׃
32:31 2 ושכיב אביה עם אבהתוי וקברו יתיה בקרתא דדוד ומלך אסא בריה באתרוי ביומוי שדוכת ארעא דישראל עשרתי שנין׃