CAL CODE HELP CLICK HERE
click on the file description for more information

81011: TgChron2 08

click on a word for lexical analysis
Click on a red-colored coordinate for comments and/or translations of the line

previous chapter


10:80 2 והוה מסוף עשרין שנין די בנא שלמה ית בית מקדשא דייי וית ביתיה
20:80 2 וקרויא דיהב חורם לשלמה בנא שלמה יתהון ואותיב תמן ית בני ישראל׃
30:80 2 ואזל שלמה לחמתא דצובא ואתקיף ציירא עלה׃
40:80 2 ובנא ית תדמור במדברא וית כל קרוי בית אוצרא די בנא בחמת׃
50:80 2 ובנא ית בית חורון עלאה וית בית חורון ארעא קרוין כריכן מקפן שורן דשין ועברין׃
60:80 2 וית בעלה וית כל קרוי בית אוצרא די הוו לשלמה וית כל קרוי ארתכיה וית קרוי פרשיה וית כל רעות לביה דשלמה די צבא למעבד ולמבני בירושלם ובלבנן ובכל ארע שולטניה׃
70:80 2 כל עמא דאשתייר מן חתאי ואמוראי ופרזאי וחואי ויבוסאי די לא מישראל אנון׃
80:80 2 מן בניהון דאשתיירו בתריהון בארעא די לא שיציאונון בני ישראל ויהבנון שלמה למסקי מסין עד יומא הדין׃
90:80 2 ומן בני ישראל די לא יהב שלמה למהוי פלחין לעבידתיה ארום אנון גברי מגיחי קרבא ורבני גברוי ורבני ארתכיה ופרשוהי׃
01:80 2 ואלין רבני אסטרטיגייה די למלכא שלמה מאתן וחמשין די מכבשין בעמא׃
11:80 2 וית בתיה ברתיה דפרעה אסיק שלמה מקרתא דדוד לפלטירין די בנא לה ארום אמר לא אפשר דתשלוט לי אתתא בבית דוד מלכא דישראל ארום קודשא אנון ולא כשר דתתיב תמן אתתא מן בתר דעל לוותהון ארונא דייי׃
21:80 2 הא בכין יסיק שלמה עלוון קדם ייי על מדבחא דייי די בנא קדם אולמנה׃
31:80 2 ובמסת יומא ביומיה לאסקא קרבן תדירא הי כתפקדתא דמשה ומוספיא לשביא ולרישי ירחיא ולמועדיא תלת זמנין בשתא בחגא דפטיריא ובחגא דשבועיא ובחגא דמטליא׃
41:80 2 ואקים היכמה דפקיד דוד אבוי ית פלוגוות כהניא על עבידתהון ולואי על מטרתהון לשבחא ולשמשא כל קבל כהניא כמסת יומא ביומיה ולתרעייה בפלוגוותהון לכל תרעא ותרעא ארום היכנא תפקדתא דדוד נביא דייי׃
51:80 2 ולא עטרו תפקדתא דמלכא על כהניא וליואי ולכל מדעם ולתסבריא׃
61:80 2 ואתקנת כל עבידת שלמה מן יומא דאתייסד בית מקדשא דייי עד יומא דאשתיצי ושלים בית מקדשא דייי׃
71:80 2 הא בכין הליך שלמה לכרך תרנגולא ולאילות די על כיף ימא בארעא דאדום׃

81:80 2 ושדר ליה חורם בידא דעבדוי אלפיא ועבדין חכימין בימא ואתו עם עבדי שלמה לאופיר ונסיבו מתמן ארבע מאה וחמשין קנטינרין דדהבא ואייתיאו לות מלכא שלמה׃


next chapter