CAL CODE HELP CLICK HERE
click on the file description for more information

81011: TgChron2 04

click on a word for lexical analysis
Click on a red-colored coordinate for comments and/or translations of the line

previous chapter


10:40 2 ועבד ית מדבחא דנחשא עשרין אמין אורכיה ועשרין אמין פותיה ועשר אמין רומיה׃
20:40 2 ועבד ית ימא מתך עשר באמין מן ספתיה לספתיה סגלגל חזור חזור וחמש אמין רומיה וחוט משח תלתין אמין מקף ליה חזור חזור׃
30:40 2 וצורת תורין מלרע ליה חזור חזור מקפין יתיה עשר אמין מקפין ית ימא חזור חזור תרין סדרין דתורי מתכין באתכותיה׃
40:40 2 קאים על תריסר תורין תלתא אפיהון לצפונא ותלתא אפיהון למערבא ותלתא אפיהון לדרומא ותלתא אפיהון למדינחא וימא מתקן עליהון מלעילא וכל אחוריהון לגיו׃
50:40 2 וסומכיה פושכא וספתיה הי כעובד כליד סגלגל לקיט כשושנתא נקיט תלת אלפין בתין ביובש תרין אלפין בתין רוטבא מחסיל׃
60:40 2 ועבד כיורין עשרא ויהב חמשא מן ימינא דכיורא דעבד בצלאל וחמשא מן שמאלא למחלל בהון ית עובד עלתא מדיחין בהון וכיורא דבצלאל לקדוש כהנא רבא וימא לקדוש כהניא ביה׃
70:40 2 ועבד ית מנרתא דדהבא עשרתי כד חמי להון ויהב בהיכלא חמשא מן ימינא וחמשא מן שמאלא׃
80:40 2 ועבד פתורין עשרא ואנח בהיכלא חמשא מן ימינא לפתורא דעבד בצלאל וחמשא מן שמאלא ועבד פיילי דהב מאה׃
90:40 2 ועבד דרתא דכהניא ודרתא רבתא ודשין לדרתא ודשיהון חפא נחשא׃
01:40 2 וית ימא יהב מן עיבר ביתא ימינא לרוח קדומא מדינחא מקביל דרומא׃
11:40 2 ועבד חורם ית כיורא וית מגרופיתא וית פייליא וחסל חורם למעבד ית כל עבידתא דעבד למלכא שלמה בבית מקדשא דייי׃
21:40 2 עמודיא תרין ואגנין וקרונתוון על ריש עמודיא תרתין וסריגיא תרתין לכסאה ית תרתין אגני קרונתוון די על ריש עמודיא׃
31:40 2 וית רמוניא ארבא מאה לתרתין סריגתא תרין סדרין דרמונין לסריגתא חדא לכסאה ית תרתין אגני קרונתוון די על אפי עמודיא׃
41:40 2 וית בסיסיא עבד וית כיוריא עבד על בסיסיא׃
51:40 2 ית ימא חד וית תורי תריסר תחותוהי׃

61:40 2 וית דודיא וית מגרופיתא וית צנוריתא וית כל מניהון עבד חורם רביה למלכא שלמה לבית מקדשא דייי נחש מצהב׃

71:40 2 במישרי יורדנא אתיכנון מלכא בעובי גרגישתא בין סכות ובין צרדת׃
81:40 2 ועבד שלמה ית כל מניא האליין לסוגי לחדא ארום לית סוף למתקל נחשא׃
91:40 2 ועבד שלמה ית כל מניא די בבית מקדשא דייי וית מדבחא דדהבא וית פתוריא דעליהון לחם אפיא׃
02:40 2 וית מנרתא ובוציניהון לאדלקותהון כד חמי קדם בית כפורי דהב טב׃
12:40 2 ושושניא ובוציניא וצביתיא דהב דכי הוא גמיר כולא דדהב׃
22:40 2 ומזמריא ומזרקיא ובזיכיא ומחתיתא דהב טב ותרע ביתא ודשוהי גווייתא לקדש קודשיא ודשי ביתא להיכלא דהבא׃


next chapter