The Comprehensive Aramaic Lexicon

10:92 1 ואמר דוד מלכא לכל קהלא שלמה ברי חד ואתרעי ביה ייי טלי ורכיך ופולחנא סגיעא ארום לא לשום בר נשא פלטירא ארום לשום מימרא דייי אלהים׃
20:92 1 ובכל חילי אתקינית לבית מקדש אלהי דהבא לעובדא דדהבא וכספא לעובדא דכספא ונחשא לעובדא דנחשא ופרזלא לעובדא דפרזלא וקיסין לעובדא דקיסיא אבני בורלא ואשלמותא אזמרגדין וציורין וכל מרגליתא יקירתא ואבני מרמירייה לסוגי׃
30:92 1 ותוב כד אתרעיתי בבית מקדש אלהי אית לי אוצרי דהבא וכספא יהבית לבית מקדש אלהי על כל מה דאתקינית לבית קודשא׃
40:92 1 תלתא אלפין קנטינרין דדהב מן דהב אופיר ושובעא אלפין קנטינרין כספא סנינא למשוע כותלי ביתאיא׃
50:92 1 דהבא לדהבא וכספא לכספא ולכל עבידתא ביד נגריא ומן די יצבי לקרבא קורבניה יומא דין יקרב קדם ייי׃
60:92 1 ואתרעיו רבני אבהתא ורבני שבטיא דישראל ורבני אלפין ומאוותא ולרבני עבידת מלכא׃
70:92 1 ויהבו לעבידת בית מקדשא דייי דהבא קנטינרין חמשא אלפין וזוזין עשרא אלפין וכספא קנטינרין עשרת אלפין ונחשא ריבבתא ותמניא אלפין קנטינרין ופרזלא מאה אלפין קנטינרין׃
80:92 1 ודאשתכח גביה מרגליתא יהבו לקורטור בית מקדש[א] ריבבתא ותמניא אלפין קנטינרין ופרזלא מאה אלפין קנטינרין׃
90:92 1 וחדיאו עמא מטול דאתנדבו ארום בלב שלים אתנדבו קדם ייי ואוף דוד מלכא חדא חדוה רבתא׃
01:92 1 ובריך דוד ית ייי למחמיהון דכל קהלא ואמר דוד בריך אנת ייי אלהא דישראל אבונן מן עלמא הדין ועד עלמא דאתי׃
11:92 1 דילך ייי רבותא דבריתא עלמא בגבורתא רבתא וגבורתא דאפיקתא אבהתנא ממצרים בגבורן רברבן ואעבר תנון ית ימא ואתגליתא על טוורא דסיני בשבהורא עם כתי מלאכיא למתן אוריתא לעמך ועבדתא נצחנין בעמלק ובסיחון ובעוג ובמלכי כנענאי ובזיו יקרך אקימתא שמשא בגבעון וסיהרא במישר אילון עד דאתפרעו עמך בית ישראל מן סנאיהון ארום כלהון עובדי ידך בשמיא ובארעא ואת שליט עליהון וסביל כל מה די בשמיא וכל מה די בארעא דילך ייי מלכותא ברקיעא ומתנטל על כלהון מלאכיא דבשמיא ועל כל דמתמנן לרישין בארעא׃
21:92 1 ועותרא דעתיריא ויקרא דמלכיא ושליטיא מן קדמך מתיהב להון ואנת שליט בכולא ובידך אית חילא וגבורתא ובידך אית יכולתא לרבאה ולתקפא לכולא׃
31:92 1 וכדון אלהנא מודין אנן לך ומשבחין לשום תושבחתך׃
41:92 1 וארום מה אנא ומה עמי דנסגי חילא לאתנדבא כדא ארום מן קדמך מתייהב כולא ומן ברכת ידך יהבו לך׃
51:92 1 ארום דיירין אנן גבך ותותבין הי ככלהון אבהתנא הי כטולא דעופא דפרח באויר שמיא הכדין יומנא על ארעא ולית סיבור לבר נשא דייחי עד עלם׃
61:92 1 ייי אלהנא ככל נכסין סגיאין האלין דאתקיננא למבני לשום יקרך בית מקדשא לשבחא ביה שום קודשך מן ידך הוא ודילך כולא׃
71:92 1 וידעית אלהי ארום אנת בחיר לבא ועובדין כשרין את רעי אנא בקשיטות לבבי אתנדבית כל אלין וכדון עמך דאשתכחו הכא חמית מטול בחדוא אתו לאתנדבא לך׃
81:92 1 ייי אלהא דאברהם יצחק וישראל אבהתנא נטר נדבתא דא לזכותא לעלם לקשטא יצר הרהורי לבבא דעמך ואתקין לבהון למדחל לוותך׃
91:92 1 ולשלמה ברי הב לב שלים למנטר פקודיך סהידוותך וקיימך ולמעבד כולא ולמבני פלטירין די אתקינית׃
02:92 1 ואמר דוד לכל קהלא בריכו כדון ית ייי אלהכון ובריכו כל קהלא קדם ייי אלהא דאבהתהון וגחנו וסגידו קדם ייי וקדם מלכא׃
12:92 1 ודבחו קדם ייי נכסת קודשין ואסיקו עלוון קדם ייי לבתר יומא ההוא תורין אלפא דכרין אלפא אמרין אלפא ונסוכיהון ונכסין לסוגי לכל ישראל׃
22:92 1 ואכלו ושתיאו קדם ייי ביומא ההוא בחדוא רבתא ואמליכו תניינות ית שלמה בר דוד ומשחוהי קדם ייי למלכא ולצדוק לכהנא רבא׃
32:92 1 ויתב שלמה על כורסי מלכותא על פס מימרא דייי למלכא באתר דדוד אבוהי ואצלח וקבילו מניה כל ישראל׃
42:92 1 וכל רברביא וגבריא ואוף כל בני מלכא דוד יהבו ידא תחות שלמה מלכא לסייעא יתיה ולתקפותיה בכל מלכותיה׃
52:92 1 ורבי ייי ית שלמה לעילא קדם כל ישראל ויהב עלוי זיו מלכותא ושבהורא רבא די לא הוה דכמיה על כל מלכא קומוי על כל ישראל׃
62:92 1 ודוד בר ישי מלך על כלהון בית ישראל׃
72:92 1 ויומיא די מליך על ישראל ארבעין שנין בחברון מלך שבע שנין ובירושלם מלך תלתין ותלת שנין׃
82:92 1 ומית דוד בשיבו טבתא סבע יומין בעותרא ויקרא ואמליך שלמה בריה באתרוהי׃

92:92 1 ופתגמי דדוד מלכא קדמאיי ובתראיי הא אנון כתיבין על פתגמי שמואל חזוונא ועל פתגמי נתן נביא ועל פתגמי גד סכואה׃

03:92 1 עם כל מלכותיה וגבורתיה ועבידתיה ועדניא דעברו עלוהי ועל ישראל ועל כלהון מלכוות ארעתא׃