20:82 1 וקם דוד מלכ[א] על רגלוי ואמר קבילו מני אחיי ועמי אחי בית ישראל ועמי גיוריא די בקרויהון אנא הוה עם לבבי למבני בית משרי לארון קיימא דייי ולכיבש כורסי יקרא דייי ואתפינית למבני׃

30:82 1 ומימרא דייי אמר לי לא תבני בית מקדשא לשמי ארום גבר עביד קרביא אנת ואדמין שדיתא׃
40:82 1 ואתרעי ייי אלהא דישראל בי מכל בית אבא למהוי מלכא על ישראל לעלם ארום בשיבט יהודה אתרעי לנגודא ובבית יהודה ביתיה דאבא ובבני דאבא בי אתרעי למהוי מלכא על כל ישראל׃
50:82 1 ומן כולהון בניי ארום סגיעין בנין יהב לי ייי ואתרעי בשלמה ברי למתב על כורסי מלכותא דייי לאתמנאה על ישראל׃
60:82 1 ואמר לי שלמה ברך הוא יבנה בית מקדשי ודרתיי מטול דאתרעיתי ביה למרחם יתיה למהוי קדמי חביב הי כברא ואנא אהוי ליה כאבא׃
70:82 1 ואתקין ית מלכותיה עד לעלם אין יתקף למעבד פקודיי ודיני הי כיומא הדין׃
80:82 1 וכדון קדם כל ישראל קהלא דייי וקדם מימרא דייי נטרו ותבעו כל פקודיא דייי אלהכון מן בגלל דתירתון ית ארעא טבתא ותחסנון לבניכון מן בתריכון עד עלמא׃
90:82 1 ואנת שלמה ברי דע ית אלהא דאבוך ופלח קומוי בלב שלים ובנפשא רעיתא ארום כולהון יצריא דלביא תבע ייי וכלהון הרהורי מחשבתא מבין אין תתבעניה ישתכח לך בעדן דתתבע דחלתיה ותתבעניה ואין תשבקניה ירחקנך לעלמא׃
01:82 1 חמי כדון ארום מימרא דייי אתרעי בך למבני ביתא למקדשא אתוקף ועבד׃
11:82 1 ומסר דוד לשלמה בריה ית צורת אולמא וית בתוהי וקורטו<ר>והי ומסקנוהי וקיטונוהי גוואין ובית כפורי׃
21:82 1 וצורת כל דהוה צריך ברוח נבואה דעמיה לדרת בית מקדשא דייי ולכלהון לשכתא חזור חזור לתסברי בית מקדשא דייי ולתסברי קודשיא׃
31:82 1 ולפלוגוות כהניא וליואי ולכל עבידת פולחנא לבית מקדשא דייי ולכל מאני עבידת בית מקדשא דייי׃
41:82 1 לדהבא במתקלא לדהבא לכל מאני פולחנא ופולחנא לכל מאני דכספא במתקלא לכל מאני פולחנא ופולחנא׃
51:82 1 ומתקלא למנרת דהבא ובוציניהון דהבא במתקלא מנרתא ומנרתא ובוצינהא ולמנרת כספא במתקלא למנרתא ובוצינהא הי כעבידת מנריא ומנרתא׃
61:82 1 וית דהבא מתקל לפתוריא דסדוריא לפתורא ופתורא וכספא לפתוריא דכספא׃
71:82 1 ומשילייתא ומזרקיא וקסוותא דדהב דכי ולכפורי דהבא במתקלא לכפורא וכפורא ולכפורי דכספא במתקלא לכפורא וכפורא׃
81:82 1 ולמדבח קטרת בוסמיא דדהבא סנינא במתקלא ולצורת רתיכא הי כצורת כפורתא דתמן צורת כרובין דדהב דפרשין גדפיהון ומטלן על ארון קיימא דייי׃
91:82 1 כולא בכתבא מן ידא דייי הוה עלי לאסתכלא בכל עבידת צורתא׃
02:82 1 ואמר דוד לשלמה בריה תקיף ועלם ועביד לא תדחל ולא תתבר ארום מימרא דייי אלהים אלהי בסעדך לא ישבקנך ולא ירחקנך עד זמן למשלם כל עבידת פולחן בית מקדשא דייי׃
12:82 1 והא פלוגוות כהניא ולואי לכל עבידת בית מקדשא דייי ועמך בכל עבידתא לכל דאתרעי בחכמת[א] לכל פולחנא ורברביא וכל עמא בסעדך לכלהון עסקך׃