40:12 1 ופתגם מלכא תקיף על יואב ונפק יואב וטייל בכל ישראל ותב לירושלם׃

50:12 1 ומסר יואב ית חושבן מניין עמא לדוד והוו כולהון ישראל אלף ומאה אלפין גבר שלפי סייפא ואנש יהודה ארבע מאה ושובעין אלפין גבר שלפי סייפא׃
60:12 1 ושיבט לוי ושיבט בנימן לא מנא ביניהון ארום מרחקא פתגמא דמלכא על יואב׃
70:12 1 ובאיש קדם ה׳ על פתגמא הדין ומחא ית ישראל׃
80:12 1 ואמר דוד קדם ה׳ חבית לחדא על דעבדית ית פתגמא הדין וכדון שבוק כדון ית חובא דעבדך ארום אטפשית לחדא׃
90:12 1 ומליל ה׳ עם גד נביא דדוד למימר׃
01:12 1 איזיל ותמליל לדוד למימר כדנן אמר ה׳ חדא מן תלת אנא רמי עלך ברור לך חדא מנהון ועאביד לך׃
11:12 1 ואתא גד לדוד ואמר ליה כדנן אמר ה׳ קבל לך׃
21:12 1 אין תלת שנין כפנא ואין תלתה ירחין מפיך ושלהי קדם סנאך וסייפא דבעיל דבבך תהא לך למדבקא ואין תלתא יומין קטלין דחרבא מן קדם ה׳ ומותנא בארעא מחבל בכל תחומא דישראל וכדון חמי מה אתיב למשדר יתי פתגמא׃
31:12 1 ואמר דויד לגד אין אנא בריר ית כפנא ימרון דבית ישראל אוריאיא דדויד מליין עיבורא ולא אכפת ליה אין ימותון עמא בית ישר׳ בכפנא ואין אנא בריר ית קרבא ולמיפך מן קדם דסנאיי ימרון דבית ישראל דוד גברא גברא ומרי קרבא ולא אכפת ליה אין יפלון עמא בית ישראל קטלין בחרבא הא עיק לי לחדא אתמסר כדון ביד מימרא דה׳ ארום סגיעין רחמוהי וביד בני נשא לא אתמסר׃
41:12 1 ויהב ה׳ מותנא בישראל ונפלו מישראל שובעין אלפין גוברין׃
51:12 1 ושדר מימרא דה׳ מלאכא דמותנא״דמותא#1#״ לירושלם לחבלותה ובחבלותיה אסתכל באפרא דעקדתא דיצחק די ביסודא דמדבחא ואדכר קיימיה דעם אברהם דקיים ליה בטוור פולחנא ובית מוקדשא דלעיל דתמן נפשת צדיקיא ואיקונין דיעקב דקביע בכורסי יקרא ותב במימריה על בשתא דאמר למעבד ואמר למלאכא מחבלא מסתייך כדון טול אבישי רבהון מביניהון ופסוק מחתך מן שייר עמא ומלאך שליח מן קדם ה׳ הוה קאים בבית אדרי דארוון יבוסאה׃
61:12 1 וזקף דוד ית עינוהי וחמא ית מלאכא דייי קאים ותליל באוירא בין ארעא ובין שמיא וסייפיה שליפא בידיה רכינא על ירושלם ונפל דוד וספריא וסביא דאסירין ומזרזין בשקיא ואתרכינו על אפיהון׃
71:12 1 ואמר דוד קדם ייי הלא אנא הוא דאמרית לממני ית עמא ואנא הוא דחבית ואבאשא אבאשית ואלין עמא דאנון הי כענא ביד רעיא מה עבדו ייי אלהי תהי כדון מחתך בי ובבית אבא ובעמך לא תהא למותנא׃
81:12 1 ומלאך שליח מן קדם ייי אמר לגד למימר לדוד די יסק דוד לאקמא מדבחא קדם ייי בבית אדרי דארוון יבוסאה׃
91:12 1 וסליק דוד כפתגמא דגד דמליל בשמא דייי׃
02:12 1 ותב ארוון וחמא ית מלאכא וארבעתי בנוי מטמרן מן קדם מלאכא וארוון חביט חטייה׃
12:12 1 ואתא דוד עד ארוון ואסתכי ארוון וחמא ית דוד ונפק מן אדרא וסגיד למלכא על אפוהי על ארעא׃
22:12 1 ואמר דוד לארוון הב לי ית אתר בית אדרא ואבנה ביה מדבחא קדם ייי בכסף שלים הב יתיה לי ותתכלי מותנא מעל עמא׃
32:12 1 ואמר ארוון לדוד סב לך ויעבד רבוני מלכא דכשר קדמוהי חמי יהבית תורין לעלתא וקורקסוותא לצלחא לקיסי סדורא וחנטייה למנחתא כולא יהבית׃
42:12 1 ואמר מלכא דוד לארוון לא ארום מזבן אזבון בכסף שלים ארום לא אסב מן דילך לשמא דייי לאסקא עלתא למגן׃
52:12 1 ויהב דוד לארוון דמין על אתרא סלעין דדהב מתקל שית מאה׃
62:12 1 ובנא תמן דוד מדבחא לשמא דייי ואסיק עלוון ונכסת קודשין וצלי קדם ייי וקביל צלותיה באשא דנחתת מן שמיא על מדבח עלתא׃
72:12 1 ואמר ייי למלאכא מחבלא מסתייך ואתיב סייפיה ללדנה ל׳א לתיקה׃
82:12 1 בעדנא ההיא כד חמא דוד ארום קביל ייי צלותיה באדרי ארוון יבוסאה ודבח תמן׃
92:12 1 ומשכנא דייי דעבד משה במדברא ומדבחא דעלתא בעדנא ההיא במקדש[א] דבגבעון׃
03:12 1 ולא ספיק דוד למיזל קדמוהי למתבע אולפן מן קדם ייי ארום אתבהיל מן קדם סייפא דמלאך שליח מן קדם ייי׃