CAL CODE HELP CLICK HERE
click on the file description for more information

81009: TgLam (Sperber)

click on a word for lexical analysis
Click on a red-colored coordinate for comments and/or translations of the line

10:2 אכדין ק{ר}ץ ייי תוקף רגזיה ית בת ציון רמא מן שמיא לארעא תשבחתא דישראל ולא דכר בית מקדשיה דהוה גלוגדקא לרגלוהי ולא חס עלוהי ביום תקוף רוגזיה׃
20:2 שיצי ייי ולא חס ית כל עדית ישראל פגר ברגזיה כרכי בית יהודה אמטי לארעא אחיל מלכותא דרס רברבנהא׃
30:2 קציץ בתקוף רגזיה ית כל יקרא דישראל אתיב אחור ימיניה ולא סייע לעמיה מן קדם בעיל דבבא ואדלק ביעקב כאישתא דמשתלהבא אכלת חזור חזור׃
40:2 מתח קשתיה וזרק עלי גירין כבעיל דבבא אעתד ית ימיניה דנבוכדנצר וסייעיה כמעיק לעמיה בית ישראל וקטיל כל ריגוג לחיזו עינא במשכן כנישת ציון שדא כביעור אשתא רגזיה׃
50:2 הוה ייי דמי לבעיל דבבא שיצי ישראל שיצי פלטורהא חביל כל כרכהא ואסגי בכנשתא דיהודה אנינותא ואבילותא׃

60:2 ושרש כגנתא טלל בית מקדשיה חביל אתר מזומן לכפרא על עמיה נשי ייי בציון מועדא ושבתא ושנא ברגז חמתיה מלכא וכהנא רבא׃

70:2 שבק ייי מדבחיה בעט מקדשיה מסר ביד בעיל דבבא שורי פלטורהא קלא יהבו בבית מקדשא דייי כקל עמא בית ישראל דמצליין בגויה ביומא דפסחא׃
80:2 חשיב ייי לחבלא שור כנשתא דציון סט משקוליתהא לא אתיב יד מלשיצאה ואביל מקפנא ושורא כחדא אתפגרו׃
90:2 טבעו בארעא תרעהא על דנכסו ית חזירא ואובילו מן דמיה עליהון הובד ותבר מזוזתהא מלכה ורברבנהא גלו ביני עממיא על דעברו על פתגמי אוריתא אף נביאהא אתמנע מנהון רוח קדשא לא אשכחו מימרא דייי׃