)3( 42:70 הא כבר איתרחק מבני נשא למידע כל מא דהוה מן יומי עלמא ורז יום מותא ורז יום דייתי מלכא משיחא מאן הוא דישכחיניה בחוכמתיה׃

)3( 52:70 חזרית אנא לחשבא בליבבי ולמידע ולאללא ולמתבע חכמתא וחושבן אגר עובדי צדיקיא ולמידע פורענות חובת שטיא וסוכלתנות חולחולתא דמלכותא׃
)3( 62:70 ואשכחית אנא פתגם דמריר על אנש יתיר מן מרירות יום מותא ית איתתא דהיא עבדת עקין סגיעין לבעלה ומצדתן ותקלן אית בליבבה כפתן ידהא בדיל דלא למפלוח בהון עובידתא תקין קדם ייי גבר די יפטור יתה בגט פיטורין ומשתיזב מינה וחייבא קדם ייי גבר די יסבינה ואיתלכיד בזנותהא׃
)3( 72:70 חמי דין עובדא דאשכחית אמר קהלת דמתקרי שלמה מלכא דישראל כוונית מזליא חדא עם חברתא למשכח חושבן בני נשא מא יהי בסופיהון׃
)3( 82:70 ואית פתגם אוחרן דעוד תבעת נפשי ולא אשכחית גבר שלים וזכאי בלא חבולא מן יומי אדם עד דאיתיליד אברהם צדיקא והישתכח מהימן וזכאי ביני אלף מלכין דאיתכנשו למעבד מוגדלא בבבל ואיתתא בכל אילין נשיהון דמלכיא כשרה לא אשכחית׃
)3( 92:70 לחוד חמי דין אשכחית דעבד ייי ית אדם קדמאה תקין קדמוי וזכאי וחיויא והוה אינון אטעיוהי למיכל מן אילנא דאכלין פירוהי חכמין {{בין}} למידע בין טב לביש וגרמו ואיסתקפא עלוי יום מותא ולכל דרי עלמא ואינון תבעו למשכח חושבנין סגיעין בגין לאיתאה מחתא על דיירי עלמא׃