40:5 כד אתגלי יקרא דה׳ לעמא בית ישראל לא צבן למיחרט ולמותיב לותיה אושיט ית מחת גבורתיה על שבטא דראובן וגד ופלגות שבטא דמנשה דמעברא לירדנא ומסר יתהון ״ביד סנחריב מלכא דאתור ואגלי יתהון״ ללחלח וחבור נהרי גוזן קרוי מדי וכבר דבר מידהון ית עיגל מתכא דשוי ירבעם חייבא בל שם דן דמתקריא פמיאס ביומי פקח בר רמליא וכד שמעית אנא רחמי אתגללו עליהון׃

50:5 וכדו תקיפת עלאי ״מחת״ גבורתא דה׳ תהית על עובדי וכהניא קריבו קרבנא ואסיקו ״קטורת״ בוסמיא ולא אתקבל ברעוא ארי מרי עלמא אחד דשי תיובתא באנפאי׃
60:5 אמרת כנשתא דישראל צביתי למתבע אולפן מן קדם ה׳ ואיהו סליק שכינתיה מבינאי ונפשי תאיבא לקל מלוי תבעית שכינתיה ולא אשכחית צליתי קדמוהי ואיהו טליל שמיא בעננין ולא קביל צלותי׃
70:5 אדבקוני כסדאי דנטרין אורחא ומעיקין חזור חזור על קרתא דירושלם מני קטלו בחרבא ומני אובילו בשביתא נטלו תגא דמלכותא מעל צורא דצדקיא מלכא ״דיהודה״ ואובילוהי לרבלה וסמיו ית עינוהי עמא דבבל דמעיקין על קרתא ונטרין ית שוריא׃
80:5 אמרת כנשתא דישראל אשביעית לכון נבייא בגזירת מימרא דה׳ מא אם יתגלי על ידיכון רחמנא חויאו קדמוהי דמריעתא מן חיבת רחמוהי אנא׃
90:5 ענין נבייא ואמרין לבית ישראל לאידין אלהא אנת בעיא למדחל דהכין קיימת עלנא׃