CAL CODE HELP CLICK HERE
click on the file description for more information

81005: TgSong

click on a word for lexical analysis
Click on a red-colored coordinate for comments and/or translations of the line

01:1 כד נפקו בית ישראל למדברא אמר ה׳ למשה כמה יאי עמא הדין לאתיהבא להון פתגמי אוריתא ויהון כזממין בליסתהון דלא יעדון מן אורחא טבא היכמא דלא עדי סוסיא דזממא בליסתיה וכמא יאי קדלהון לסוברא ניר פקודי ויהי עלויהון כנירא על קדל תורא דהוא חריש בחקלא ומפרניס יתיה וית מריה׃
11:1 בכין אתאמר למשה סק לרקיעא ואתין לך ית תרין לוחי אבנין חציבין מספיר כורסי יקרי בהיקן כדהב טב מסדרן בשיטין כתיבין באצבעי גליף בהון עשרתי דבירא זקיקין יתיר מן כסף דמזקק שבע זמנין שבעא דסכום ענינין דמתפרשין בהון ארבעין ותשע אפין ואיתינון על ידך לעמא בית ישראל׃
21:1 ועד דהוא משה רבהון ברקיעא לקבלא ית תרין לוחי אבניא ואוריתא וית תפקידתא קמו רשיעי ההוא דרא וערבובין דביניהון ועבדו עיגל דדהב ואסריו עובדיהון ונפק להון שום ביש בעלמא דמן קדמת דנא הוה נדף ריחהון נדיף בכל עלמא ובתר כין סריאו כנרדא דריחיה ביש לחדא ונחת מכתש סגירו על בסרהון׃
31:1 בי הוא זימנא אמר ה׳ למשה איזיל חות ארום חבילו עמא פסק מני ואשיצינון בכין תב משה ובעא רחמין מן קדם ה׳ ודכיר ה׳ להון עקידת יצחק דכפתיה אבוהי בטור מוריה על מדבחא ותב ה׳ מרוגזיה ואשרי שכינתיה ביניהון כמלקדמין׃
41:1 הא בכין נחת משה מן טורא ותרין לוחי אבנין בידיה ובגין חובי ישראל אתיקרו ידוהי ונפלו ואתברו בכין אזל משה ושף ית עגלא ובדר ית עפריה לנחלא ואשקי ית בני ישראל וקטל ית כל מא דאתחיב קטול וסליק זמנא תניאתא לרקיעא וצלי קדם ה׳ וכפר על בני ישראל בכין איתפקד למעבד משכנא וארונא ושוי בארונא ית תרין לוחיא אוחרנין ומני ית בני אהרן כהניא למקרב קורבנא על מדבחא ולנסכא ית חמרא על קורבנא ומנין הוה להון חמרא לנסכא הלא אינון במדברא לא אתר כשר לבית זרע ואף לא תינין וגופנין ורמונין אלא הוו אזלין לכרמי עין גדי ונסבין מתמן אתכלין דענבין ועצרין מנהון חמר ומנסכין יתיה על מדבחא רבעות הינא לאמרא חד׃

51:1 כד עבדין ישראל רעותא דמלכהון הוא במימריה משבח יתהון בפימליא דמלאכיא קדישיא ואמר כמא יאי עובדך ברתי חביבתי כנשתא דישראל בזמן דאנת עבדא רעותי ועסיקא בפתגמי אוריתי וכמה תקנין עובדיך ועיניך כגוזלין בני יונתא דמתכשרין לאתקרבא על מדבחא׃

61:1 אתיבת כנשתא דישראל קדם ריבון עלמא וכין אמרת כמה יאיה שכינת קודשך בעידן דאת שרי ביננא ומקביל ברעוא צלותנא ובעדן דאת משרי בפריאנא חיבתא ובנאנא סגין עלוי ארעא ואנחנא פשין וסגיאן כאילן דנציב על עינא דמיא די עופיה שפיר ואנביה סגי׃
71:1 אמר שלמה בניא כמא יאי בית מקדשא דה׳ דאתבני על ידוי מן קיסי גולמיש אבל יתיר יהא יאי בית מקדשא דעתיד לאתבנאה ביומי מלכא משיחא דכשרוהי יהוין מן ארזין דגינתא דעדן ושירתוהי יהויין מן בראתי וסאגי ושורביני׃