CAL CODE HELP CLICK HERE
click on the file description for more information

81001: TgPsJon Gen chapter 29

click on a word for lexical analysis
Click on a red-colored coordinate for comments and/or translations of the line

previous chapter


10:92neG ונטל יעקב בקלילותא ריגלוי לטיילא ואזל לארע בני מדינחא
20:92neG וחמא והא בירא בחקלא והא תמן תלתא עדרין דעאן רביעין עלה ארום מן בירא ההיא משקן עדריא ואבנא רבתא מחתא על פם בירא
30:92neG ומתכנשין תמן כל עדריא ומגלגלין ית אבנא מעל פם בירא ומשקן ית ענא ומתיבין ית אבנא על פם בירא לאתרא
40:92neG ואמר להום יעקב אחי מנן אתון ואמרו מחרן אנחנא
50:92neG ואמר להום הידעתון ית לבן בר נחור ואמרו ידענא
60:92neG ואמר השלם ליה ואמרו שלם והא רחל ברתיה אתיה עם ענא
70:92neG ואמר הא עדן יומא סגי לא עידן למיכנוש בעיר אשקו ענא ואיזילו רעו
80:92neG ואמרו לא ניכול עד די יתכנשון כל עדריא ויגלגלון ית אבנא מעל פם בירא ונשקי ענא
90:92neG עד דהוא ממלל עמהון ורחל אתת עם ענא דלאבוהא ארום רעיתא היא בההוא זימנא ארום הוה מחתא דייי בענא דלבן ולא אשתיירו מינהון אלהין קלילין ותריך רעיא דיליה ומה דאשתארו שוי קדם רחל ברתיה
01:92neG והוה כדי חמא יעקב ית רחל ברת לבן אחוהא דאימיה וקריב יעקב וגלגיל ית אבנא בחדא מן אדרעוי מעילוי פם בירא וטפת בירא וסליקו מיא לאנפוי ואשקי ית ענא דלבן אחוהא דאימיה והוות טייפא עשרין שנין
11:92neG ונשק יעקב לרחל וארים ית קליה ובכא
21:92neG ותני יעקב לרחל ארום לאיתותבא עם אבוהא אתא ולמיסב חדא מן ברתוי ענת רחל ואמרת לית איפשר לך למיתב עימיה ארום גבר רמאי הוא אמר לא יעקב אנא רמאי וחכים יתיר מיניה ולית ליה רשו לאבאשא לי ארום מימרא דייי בסעדי וכדי ידעת ארום בר רבקה הוא ורהטת ותניאת לאבוהא
31:92neG והוה כדי שמע לבן ית שמע גבורתיה וחסידותיה דיעקב בר אחתיה היך נסיב ית בכירותא וית סדר ברכתא מן יד אחוי והיך אתגלי ליה ייי בביתאל והיך נדד ית אבנא והיך טפת בירא וסליקת לאנפוי ורהט לקדמותיה וגפיף ליה ונשיק ליה ואעליה לביתיה ותני ללבן ית כל פיתגמיא האילין
41:92neG ואמר ליה לבן ברם קריבי ודמי לי אנת ויתב עימיה ירח יומין
51:92neG ואמר לבן ליעקב המדאחי אנת חשיב ותיפלחינני מגן תני לי מן יהי אגרך
61:92neG וללבן הוון תרתין בנן שום רבתא לאה ושום זעירתא רחל
71:92neG ועיני לאה הוון צירנייתן דבכיא ובעיא מן קדם ייי דלא יזמן לה לעשו רשיעא ורחל הות יאיא בריוא ושפירא בחיזוא
81:92neG ורחם יעקב ית רחל ואמר אפלחינך שב שנין בגין רחל ברתך זעירתא
91:92neG ואמר לבן ברמיו טב דאיתן יתה לך מן דאיתן יתה לגבר אוחרן תיב עימי
02:92neG ופלח יעקב בגין רחל שב שנין והוו דמיין בעינוי כיומין קלילין מדרחים יתה
12:92neG ואמר יעקב ללבן הב ית אינתתי ארום אשלימו יומי פולחני ואיעול לותה
22:92neG וכנש לבן ית כל אינשי אתרא ועבד להון שירו עני ואמר להום הא שב שנין דאתא יעקב לגבן בירן לא חסרו ובית שקיותן סגו וכדון אית{ן}<ו> נתיעט עליה עיטא דרמיו דיימתן לגבן ועבדו ליה עיטא דרמיו לאסאבא ליה לאה חולף רחל
32:92neG והוה ברמשא ודברית לאה ברתיה ואעיל יתה לותיה ועל לותה
42:92neG ויהב לבן ליה ית זלפה ברתיה דילידת ליה פילקתיה ומסרה ללאה ברתיה לאמהו
52:92neG והוה לעידוני צפרא ואיסתכל בה והא היא לאה דכולא לילייא הוה חשיב דרחל היא מן בגלל דמסרת לה רחל כל מליא דמסר לה יעקב וכד חמא כן אמר ללבן מה דא עבדת לי הלא בגין רחל פלחית עימך ולמא שקרת בי
62:92neG ואמר לבן לא מתעביד כדין באתר{י}ן למיתן זעירתא קדם רבתא
72:92neG אשלים כדון שובעתי יומי משתיא דדא וניתן לך אוף ית דא בפולחנא דתיפלח עימי תוב שב שנין אוחרנין
82:92neG ועבד יעקב כדין ואשלים שבעתי יומי משתיא דלאה ויהב ליה ית רחל ברתיה לאינתו
92:92neG ויהב לבן לרחל ברתיה ית בלהה ברתיה דילידת ליה פילקתיה ומסרה לה לאמהו
03:92neG ועל אוף לות רחל ורחים אוף ית רחל מלאה ופלח עימיה בגינה תוב שב שנין אוחרניין
13:92neG וגלי קדם ייי ארום לא הוה לאה רחימתא באנפי יעקב ואמר במימריה למיתן לה בנין ורחל הות עקרה
23:92neG ואיתעברת לאה וילידת בר וקרת ית שמיה ראובן ארום אמרת ארום גלי קדם ייי עולבני ארום כדון ירחמנני בעלי והיכמה דאיתגלי קדם ייי עולבני היכדין יהוי גלי קדמוי עולבנהון דבניי כד יהון משתעבדין בארעא דמצראי
33:92neG ואתעברת תוב וילידת בר ואמרת ארום שמיע קדם ייי ארום שניתא אנא ויהב לי אוף ית דין והכדין ישתמע קדמוי קלהון דבניי כד יהון משתעבדין במצרים וקרת שמיה שמעון
43:92neG ואתעברת תוב וילידת בר ואמרת הדא זימנא יתחבר עימי בעלי ארום ילידית ליה תלתא בנין והיכדין עתידין בנוי למיהויהון מתחברין לשמשא קדם ייי בגין כן קרא שמיה לוי

53:92neG ואיתעברת תוב וילידת בר ואמרת הדא זימנא אודי קדם ייי דמן ברי דין עתיד למיפק מלכין ומיניה יפוק דוד מלכא דעתיד לאודויי קדם ייי בגין כן קרת שמיה יהודה וקמת מלמילד


next chapter