80:62neG והוה כד סגו ליה תמן יומיא למשרי ואודיק אבימלך מלכא דפלישתאי מן חרכא וחמא והוה יצחק חאיך עם רבקה אינתתיה

90:62neG וקרא אבימלך ליצחק ואמר ברם הא אינתתך היא והיכדין אמרת אחתי היא ואמר ליה יצחק ארום אמרית בלבבי דילמא אתקטל בגינה
01:62neG ואמר אבימלך מה דא עבדת לנא כזעיר פון שכיב מלכא דמיחד בעמא עם אינתתך ואייתיתא עלינא חובא
11:62neG ופקיד אבימלך ית כל עמא למימר דיקרב לביש בגברא הדין ובאינתתיה איתקטלא יתקטל
21:62neG וזרע יצחק לצדקתא בארעא ההיא ואשכח בשתא ההיא על חד מאה בדשערוי וברכיה ייי
31:62neG ורבא גברא ואזל אזיל ורבי עד די רבא לחדא
41:62neG והוו ליה גיתי עאן וגיתין תורין ופולחנא סגיאה וקניאו יתיה פלישתאי
51:62neG וכל בירין דחפסו עבדי אבוי ביומי אברהם אבוי טמונינון פלישתאי ומלונון עפרא
61:62neG ואמר אבימלך ליצחק איזל מעימנא ארי תקיפתא מיננא בניכסין לחדא
71:62neG ואזל מתמן יצחק ושרא בנחלא דגרר ויתיב תמן
81:62neG ותב יצחק וחפס ית בירן דמוי די חפסו עבדי אבוי ביומי אברהם אבוי וטמונינון פלישתאי בתר דמית אברהם וקרא להון שמהן הי כשמהן די הוה קרי להון אבוי
91:62neG וחפסו עבדי יצחק ביספר נחלא ואשכחו תמן ביר מוי נבעין
02:62neG ונצו רעוותא דיגרר עם רעוותא דיצחק למימר דילנא מיא והות צבו מן שמיא ויבשת ובכן אהדרו יתה ליצחק ונבעת וקרא שמא דבירא עסק ארום אתעסקו עלה עימיה
12:62neG וחפסו ביר אוחרי נצו אוף עלה ויבשת ותו לא נבעת וקרא שמ{א}<ה> סטנא
22:62neG ואיסתלק מתמן וחפס ביר אוחרי ולא נצו עלה הי כקדמאי וקרא שמ{א}<ה> רווחתא ואמר ארום כדון ארווח ייי לנא ויפישיננא בארעא
32:62neG וסליק מתמן לבירא דשבע
42:62neG ואיתגלי ליה ייי בלילייא ההוא ואמר אנא אלקיה דאברהם אבוך לא תידחל ארום בסעדך מימרי ואיבריכינך ואסגי ית בנך בגין זכוותא דאברהם עבדי
52:62neG ובנא תמן מדבחא וצלי בשמא דייי ופרס תמן משכניה וחפסו תמן עבדי יצחק בירא
62:62neG וכד נפק יצחק מגרר איתיבשן ביריהון ואילניהון לא עבדו פירין וארגישו דבגין דתריכו יתיה הוות להון כל דא ואזל אבימלך לוותיה מגרר ואתקיף ברחמוי למיזל עימיה ופיכל רב חיליה
72:62neG ואמר להון יצחק מדין אתיתון לותי דאצלי עליכון ואתון סניתון יתי ותרכתוני מלוותכון
82:62neG ואמרו מחמא חמינא ארום הוה מימרא דייי בסעדך דבזכותך הוות לן כל טבתא וכדו נפקתא מן ארען יבישו בירן ואילננא לא עבדו פירין ואמרנא נהדריניה לותנא ותתקיים כדון מומתא דהות בינן ומבכין תהי בינן ובינך ונגזור קים עמך
92:62neG אם תעבד עימנא בישא היכמא דלא קריבנא בך לביש והיכמה דעבדנא עימך לחוד טב ושלחנך פון בשלם אנת כדון בריכא דייי
03:62neG <٠٠٠٠٠٠>
13:62neG ואקדימו בצפרא וקיימו גבר לאחוי ופסג מתגא דחמריה ויהב פסגא חדא להום לסהדו וצלי עליהום יצחק ואתרווחו ואלוינון יצחק ואזלו מלותיה בשלם
23:62neG והוה ביומא ההוא ואתו עבדי יצחק ותנו ליה על עיסק בירא דחפסו ואמרו ליה אשכחנא מוי
33:62neG וקרא יתה שבעה בגין כן שמא דקרתא ביר שבע עד יומא הדין
43:62neG והוה עשו בר ארבעין שנין ונסיב איתא ית יהודית ברת בארי חיתאה וית בשמת ברת אילון חיתאה
53:62neG והוון מגחנן בפולחנא נוכראה ומתכוונן לאמרדא בעובדיהון בישיא ליצחק ולרבקה