The Comprehensive Aramaic Lexicon

10:22neG והוה בתר פיתגמיא האילין מן דינצו יצחק וישמעאל ישמעאל הוה אמר לי חמי למירות ית אבא דאנא בריה בוכרייא ויצחק הוה אמר לי חמי למירות ית אבא דאנא בר שרה אינתתיה ואנת בר הגר אמתא דאימי עני ישמעאל ואמר אנא זכאי יתיר מינך דאנא איתגזרית לתלסירי שנין ואין הוה צבותי למעכבא לא הוינא מסר נפשי לאתגזרא ואנת אתגזרת בר תמניא יומין אילו הוה בך מנדעא דילמא לא הוית מסר נפשך לאתגזרא מתיב יצחק ואמר האנא יומנא בר תלתין ושב שנין ואילו בעי קודשא בריך הוא לכולי איבריי לא הויתי מעכב מן יד אישתמעו פיתגמיא האילין קדם מרי עלמא ומן יד מימרא דייי נסי ית אברהם ואמר ליה אברהם ואמר ליה האנא
20:22neG ואמר דבר כדון ית ברך ית יחידך דאת רחים ית יצחק ואיזל לך לארע פולחנא ואסיקהי תמן לעלתא על חד מן טוורייא דאימר לך
30:22neG ואקדים אברהם בצפרא וזריז ית חמריה ודבר ית תרין טלייוי ית אליעזר וית ישמעאל עימיה וית יצחק בריה וקטע קיסין דזיתא ותאנתא ודיקלא דחזיין לעלתא וקם ואזל לאתרא דאמר ליה ייי
40:22neG ביומא תליתאה וזקף אברהם ית עינוי וחמא ענן איקרא קטיר על טוורא ואשתמודעיה מן רחיק
50:22neG ואמר אברהם לעולימוי אוריכ{ן}<ו> לכון הכא עם חמרא ואנא ועולימא נתמטי עד כא לבחוני אין יתקיים מה דאתבשרית כדין יהון בנך ונסגוד למרי עלמא ונתוב לוותכון
60:22neG ונסיב אברהם ית קיסי דעלתא ושוי עילוי יצחק בריה ונסיב בידיה ית אישתא וית סכינא ואזלו תרוויהום כחדא
70:22neG ואמר יצחק לאברהם אבוי ואמר אבא ואמר האנא ואמר הא אישתא וקיסין והאן אימרא לעלתא
80:22neG ואמר אברהם ייי יבחר ליה אימרא לעלתא ברי ואזלו תרויהום בלב שלים כחדא
90:22neG ואתו לאתרא דאמר ליה ייי ובנא תמן אברהם ית מדבחא דבנא אדם ואיתפכר במוי דטובענא ותב נח ובנייה ואיתפכר בדרא דפלוגתא וסדר ע{י}לוי ית קיסיא וכפת ית יצחק בריה ושוי יתיה על מדבחא לעיל מן קיסין׃
01:22neG ופשט אברהם ית ידיה ונסיב׳<י>ת סכינא למיכס ית בריה עני ואמר יצחק לאבוי כפת יתי יאות דלא נפרכס מן צערא דנפשי ונדחי לגובא דחבלא וישתכח פסולא בקרבנך עיינויי דאברהם מסתכלן בעינויי דיצחק ועיינויי דיצחק מסתכלן למלאכי מרומא יצחק הוה חמי יתהום ואברהם לא חמי יתהום עניין מלאכי מרומא איתון חמון תרין יחידאין דאית בעלמא חד נכיס וחד מתנכיס דנכיס לא מעכב ודמתנכיס פשיט צווריה
11:22neG וקרא ליה מלאכא דייי מן שמיא ואמר ליה אברהם אברהם ואמר האנא
21:22neG ואמר אל תושיט ידך לטלייא ולא תעביד ליה מידעם ביש ארום כדון גלי קדמי ארום דחלא דייי אנת ולא עכיבתא ית ברך ית יחידך מיני
31:22neG וזקף אברהם ית עינוי וחזא והא דיכרא חד דאיתברי ביני שימשתא דשכלול עלמא אחיד ברחישותא דאילנא בקרנוי ואזל אברהם ונסיב יתיה ואסיקהי לעלתא חולף בריה
41:22neG ואודי וצלי אברהם תמן באתרא ההוא ואמר בבעו ברחמין מן קדמך ייי גלי קדמך דלא הוה בלבבי עוקמא ובעית למיעבד גזירתך בחדווא כדין כד יהון בנוי דיצחק ברי עליין לשעת אניקי תהוי מידכר להום ועני תהום ופריק יתהום ועתידין הינון כל דריא דקימון למהוי אמרין בטוורא הדין כפת אברהם ית יצחק בריה ותמן איתגליית עילוי שכינתא דייי
51:22neG וקרא מלאכא דייי לאברהם תניינות מן שמיא
61:22neG ואמר במימרי קיימית אמר ייי חולף דעבדת ית פיתגמא הדין ולא מנעת ית ברך ית יחידך
71:22neG ארום ברכא אברכינך ואסגא אסגי ית בנך ככוכבי שמיא והי כחלא דעל כיף ימא ויירתון בנך ית קוריי שנאיהון
81:22neG ויתברכון בגין זכוות בנך כל עממי ארעא חולף דקבילתא במימרי
91:22neG ודברו מלאכי מרומא ית יצחק ואובלוהי לבי מדרשא דשם רבא והוה תמן תלת שנין ובההוא יומא תב אברהם לות עולימוי וקמו ואזלו כחדא לבירא דשבע ויתיב אברהם בבירא דשבע
02:22neG והוה בתר פתגמיא האילין מן בתר דיכפת אברהם ית יצחק ואזל סטנא ותני לות שרה דאברהם נכס ית יצחק וקמת שרה ופגנת ואשתנקת ומיתת מן אניקא ואתא אברהם ובת באורחא ותניאו לאברהם למימר הא ילידת מילכה אף היא אתרווחת בזכותא דאחתה למילד בנין לנחור אחוך
12:22neG ית עוץ בוכריה וית בוז אחוי וית קמואל רב קסומיא דארמאי
22:22neG וית כשד וית חזו וית פלדש וית ידלף וית בתואל

32:22neG ובתואל אוליד ית רבקה תמניא אילין ילידת מלכה לנחור אחוי דאברהם

42:22neG ו{ת}פלקתיה ושמה ראומה וילידת אוף היא ית טבח וית גחם וית תחש וית מעכה