CAL CODE HELP CLICK HERE
click on the file description for more information

81001: TgPsJon Gen chapter 11

click on a word for lexical analysis
Click on a red-colored coordinate for comments and/or translations of the line

previous chapter


10:11neG והוה כל ארעא לישן חד וממלל חד ועיטא חדא בלישן קודשה הוו ממללין דאיתבריא ביה עלמא מן שירויא
20:11neG והוה במיטלהון ממדינחא ואשכחו בקעתא בארעא דבבל ויתיבו תמן
30:11neG ואמרו גבר לחבריה הבו נירמי ליבנין וני{ו}<ז>י יתהון באתונא והות להון לבינתא לאבנא וטינא הוות להום לישיע
40:11neG ואמרו הבו ניבני לנא קרתא ומוגדלא ורישי מטי עד צית שמיא ונעביד לנא סגדו ברישיה ונישוי חרבא בידיה ותהי עבדא לקובלא סידרי קרבא קדם עד לא ניתבדר מעילוי אנפי ארעא
50:11neG ואיתגלי ייי לאיתפרע<א> מנהון על עובד קרתא ומוגדלא דבנו בני נשא
60:11neG ואמר ייי הא עמא חד ולישן חד לכולהום ודא אתחש{ד}<ב>ו למיעבד וכדון לא יתמנע מנהון כל דחשיבו למיעבד
70:11neG אמר ייי לשבעין מלאכיא דקימין קומוי איתון כדון וניחות ונערבבא תמן לישנהום דלא ישמעון אינש לישן חבריה
80:11neG ואיתגליאת מימרא דייי עילוי קרתא ועימיה שובעין מלאכיא כל קבל שו{מ}<ב>עין עממיא וכל חד וחד לישן עממיה ורושם כתביה בידיה ובדרינון מתמן על אנפי כל ארעא לשיבעין לישנין ולא הוה ידע חד מה דיימר חבריה והוו קטלין דין לדין ופסקו מלימיבני קרתא
90:11neG בגין כן קרא שמה בבל ארום תמן ערביב ייי לישן כל דיירי ארעא ומתמן בדרינון ייי על אנפי כל ארעא
01:11neG אילין גניסת שם שם בר מאה שנין כד אוליד ית ארפכשד תרתין שנין בתר טובענא
11:11neG וחיא שם בתר דאוליד ית ארפכשד חמש מאה שנין ואוליד בנין ובנן
21:11neG וארפכשד חיא תלתין וחמש שנין ואוליד ית שלח
31:11neG וחיא ארפכשד בתר דאוליד ית שלח ארבע מאה ותלתין שנין ואוליד בנין ובנן
41:11neG ושלח חיא תלתין שנין ואוליד ית עבר
51:11neG וחיא שלח בתר דאוליד ית עבר ארבע מאה ותלת שנין ואוליד בנין ובנן
61:11neG וחיא עבר תלתין וארבע שנין ואוליד ית פלג
71:11neG וחיא עבר בתר דאוליד ית פלג ארבע מאה ותלתין שנין ואוליד בנין ובנן
81:11neG וחיא פלג תלתין שנין ואולד ית רעו
91:11neG וחיא פלג בתר דאוליד ית רעו מאתן ותשע שנין ואולד בנין ובנן
02:11neG וחיא רעו תלתין ותרתין שנין ואולד ית שרוג
12:11neG וחיא רעו בתר דאוליד ית שרוג מאתן ושבע שנין ואולד בנין ובנן
22:11neG וחיא שרוג תלתין שנין ואולד ית נחור
32:11neG וחיא שרוג בתר דאולד ית נחור מאתן שנין ואולד בנין ובנן
42:11neG וחיא נחור עשרין ותשע שנין ואולד ית תרח
52:11neG וחיא נחור בתר דאולד ית תרח מאה ו<ת>ש{ת}סרי שנין ואולד בנין ובנן
62:11neG וחיא תרח שובעין שנין ואולד ית אברם וית נחור וית הרן
72:11neG ואילין גניסת תרח תרח אולד ית אברם וית נחור וית הרן והרן אולד ית לוט
82:11neG והוה כד רמא נימרוד ית אברם לאתונא דנורא דלא פלח לטעותיה ולא הוה רשותא לנורא למוקדיה ובכין איתפליג ליביה דהרן למימר אילו נצח נימרוד אהי מן סיעתיה ואילו נצח אברם אהי מן סיעתיה וכד חמון כל עממיא דהוו תמן דלא שלטת נורא באברם אמר<ו> בליבהון הלא הרן אחוי דאברם מלא קוסמין וחרשין ואיהו לחש עילוי אישתא דלא למיקד ית אחוי מן יד נפלת אישתא מן שמי מרומא וגמרתיה ומית הרן למיחמי תרח אבוי היך איתוקד בארע ילדותיה באתון נורא דעבדו כשדאי לאברם אחוי

92:11neG ונסיב אברם ונחור להון נשין שום איתת אברם שרי ושום איתת נחור מלכא ברת הרן אבוי דמלכה ואבוי דיסכה היא שרי

03:11neG והות שרי עקרא לית לה וולד
13:11neG ודבר תרת ית אברם בריה וית לוט בר הרן בר בריה וית שרי כלתיה איתת אברם בריה ונפקו עימהון מאורא דכשדאי למיזל לארעא דכנען ואתו עד חרן ויתיבו תמן
23:11neG והוו יומי תרח מאתן וחמש שנין ומית תרח בחרן


next chapter