The Comprehensive Aramaic Lexicon

(1) 10:14 אַצִיתוּ לְמֵימְרִי נְגָוָון וֻמַלכְוָן יוֹסְפָן חֵיל יִתקָרְבוּן בְכֵין יְמַלְלוּן כַחדָא לְדִינָא נִתקָרַב׃
(1) 20:14 מַן אַיתִי בִגלַי מִמַדנְחָא אַברָהָם בְחִיר צִדקָא בִקשוֹט קָרְבֵיה לְאַתרֵיה מְסַר קְֹדָמוֹהִי עַמְמִין וֻמַלכִין תַבַר רְמָא כְעַפרָא קְטִילִין קְֹדָם חַרבֵיה כְקַשָא רְדַפִנוּן קְֹדָם קַשתֵיה׃
(1) 30:14 רְדַפִינוּן עְדָא שְלָם חִילַת אוֹרַח בְרַגלוֹהִי לָא עְלָת״עַלַת#3#״׃
(1) 40:14 מַן אְמַר אִלֵין קַייָם אָמַר וְעָבֵיד דְסַדַר דָרַיָא מִלְקַדמִין אְנָא יוי בְרֵית עָלְמָא מִבְרֵישִית אַף עָלְמֵי עָלְמַיָא דִילִי אִנוּן וֻבָר מִנִי לֵית אְלָה׃
(1) 50:14 חְזוֹ נְגָוָתָא וְיִדחְלוּן דְבִסיָפֵי אַרעָא יְזוּעוּן יִתקָרְבוּן וְייֵתוֹן׃
(1) 60:14 גְבַר יָת חַברֵיה יְסַעְדוּן וֻלאְחוּהִי יֵימַר תְקַף׃
(1) 70:14 הְלָא יִבַהתוּן בְעוֹבָדֵיהוֹן דִמתַקֵיף נַגָרָא עִם קֵינָאָה מָחֵי בְפַטִישָא עִם דִמטַפַח בְקֻרנָסָא זִמנָא אָמַר עַל דִבקָא תָקֵין הוּא וֻמתַקֵיף לֵיה בְמַסמְרִין דְלָא יִצטְלֵי׃
(1) 80:14 וְאַת ישׂרָאֵל עַבדִי יַעְקֹב דְאִתרְעִיתִי בָך זַרעֵיה דְאַברָהָם רָחְמִי׃
(1) 90:14 דְקָרֵיבתָך מִזַרעְיָת אַרעָא וֻמִמַלכְוָתָא בְחַרתָך וַאְמַרִית לָך עַבדִי אַת אִתרְעִיתִי בָך וְלָא אְרַחְקִינָך׃
(1) 01:14 לָא תִדחַל אְרֵי בְסַעְדָך מֵימְרִי לָא תִיתְבַר אְרֵי אְנָא אְלָהָך אְתַקְפִינָך אַף אְסַעְדִינָך אַף אַחְדִינָך בִימִין קוּשטִי׃
(1) 11:14 הָא יִבַהתוּן וְיִתכַנעוּן כָל עַמְמַיָא דַהְווֹ מִתגָרַן בָך יְהוֹן כְלָמָא וְיֵיבְדוּן אְנָש דִינָך׃
(1) 21:14 תִבעֵינוּן וְלָא תַשכְחִינוּן לַאְנָש מַצוּתָך יְהוֹן כְלָמָא וֻכלָא מִדָעַם גוּברִין דַהְווֹ מִתגָרַן לְמַעְבַד עִמָך קְרָב׃
(1) 31:14 אְרֵי אְנָא יוי אְלָהָך מְתַקֵיף יַמִינָך דַאְמַרִית לָך לָא תִדחַל מֵימְרִי בְסַעְדָך׃
(1) 41:14 לָא תִדחְלוּן שִבטַיָא דְבֵית יַעְקֹב זַרעְיָתָא דְבֵית יִשׂרָאֵל מֵימְרִי בְסַעדְכוֹן אְמַר יוי וֻפָרִיקְכוֹן קַדִישָא דְיִשׂרָאֵל׃
(1) 51:14 הָא שַוִיתְכוֹן לְמוֹרַג תַקִיף חְדַת מְלֵי סַמפֵיריָן תְקַטֵיל בְעַמְמַיָא״עַמְמַיָא#2#״ וֻתשֵיצֵי וֻמַלכְוָותָא כְמוֹצָא תְשַוֵי׃
(1) 61:14 תִדרֵינוּן וְרוּחָא תִטוֹלִנוּן וֻמֵימְרֵיה כְעַלעוּלָא לְקַשָא יְבַדַר יָתְהוֹן וְאַת תְבוּעַ בְמֵימְרָא דַיוי בְקַדִישָא דְיִשׂרָאֵל תִשתַבַח׃
(1) 71:14 עִנוְתָנַיָא וְחַשִיכַיָא דִמחַמְדִין לְאֻלפָנָא הָא כְצָהְיָא לְמַיָא וְלָא מַשכְחִין רוּחְהוֹן בְסִגוּפָא מְשַלהְיָא אְנָא יוי אְקַבֵיל צַלוֹתְהוֹן אְלָהָא דְיִשׂרָאֵל לָא אְרַחֵיקִנוּן׃
(1) 81:14 אְקָרֵיב גָלְוָותְהוֹן מִבֵינֵי עַמְמַיָא וַאְדַבְרִינוּן״וַאְבדְרִינוּן#2#״ בְאוֹרַח תָקְנָא וְאַפתַח לְהוֹן עַל נִגדִין נַהרִין וֻבגוֹ מֵישְרִין מַבוּעִין אְשַוֵי מַדבְרָא לַאְגַמִין דְמַיִין וַאְרַע בֵית צַהוָנָא לְמַבוּעֵי מַיָא׃
(1) 91:14 אַתֵין בְמַדבְרָא אַרזִין שִטִין וַהְדַסִין וְאָעִין דִמשַח אְרַבֵי בְמֵישְרָא בֵירָווָן מוֹרָניָן וְאַשכְרָעִין כַחדָא׃
(1) 02:14 בְדִיל דְיִחזוֹן וְיִדְעוּן וִישַווֹן יָת״#2#״ דַחלְתִי עַל לִיבְהוֹן וְיִסתַכְלוּן כַחדָא אְרֵי גְבוּרְתָא דַיוי עְבַדַת דָא וְקַדִישָא דְיִשׂרָאֵל בְרָא יָתַה׃
(1) 12:14 קָרַבוּ דִינְכוֹן אְמַר יוי אַעִילוּ חָזיָתְכוֹן אְמַר מַלכֵיה דְיַעְקֹב׃
(1) 22:14 יִתקָרְבוּן וִיחַווֹן לַנָא יָת דִיעָרְעִינַנָא קַדמַיָתָא מָא אִנִין חַווֹ וֻנשַוֵי לִבַנָא וְנִידַע סוֹפְהוֹן אוֹ דַעְתִידָן לְמֵיתֵי בַסְרוּנָא׃
(1) 32:14 חַווֹ דְאָתיָן לְסוֹפָא <וְנִידָע#2#> אִם לְטָעְוָון דְאִית בְהֵין צְרוֹך אַתוּן פָלְחִין אִם יָכְלָן אִנִין לְאֵיטָבָא וֻלאַבאָשָא וְנִסתַכַל וֻנדִין כַחדָא׃
(1) 42:14 הָא אַתוּן לָמָא וְעוֹבָדֵיכוֹן לָא מִדָעַם תוֹעֵיבָא דְאִתרְעִיתוּן לְכוֹן׃

(1) 52:14 אַיתִי בִגלַאי מַלַך דְתַקִיף כְרוּחַ צִיפוּנָא וְיֵיתֵי כְמִפַק שִמשָא בִגבוּרְתֵיה מִמַדנְחָא אְגַבְרִנֵיה בִשמִי וְיֵיתֵי וִידוּש שִלטוֹנֵי עַמְמַיָא כְמָא דְדָיְשִין יָת עַפרָא וֻכפַחָרָא דְעָרֵיך יָת טִינָא׃

(1) 62:14 מַן חַוִי מִן אַולָא וְנִידַע וֻמִלְקַדמִין וְנֵימַר קְשוֹט אַף לֵית דִמחַוֵי אַף לֵית דִמבַסַר אַף לֵית דְשָמַע לְמִלֵיכוֹן׃
(1) 72:14 פִתגָמֵי נַחָמָתָא דְאִתנַבִיוּ נְבִיַיָא מִלְקַדמִין עַל צִיוֹן הָא אְתוֹ וְלִירוּשלַם מְבַסַר אַתֵן׃
(1) 82:14 וֻגלֵי קְֹדָמַי וְלֵית גְבַר דְלֵיה עוּבָדִין טָבִין וֻמֵאִלֵין וְלֵית דְמָלֵיך מֵילַך וֻשאֵילתִינוּן אִם יָתִיבוּן פִתגָם׃
(1) 92:14 הָא כוּלְהוֹן לָמָא וְלָא מִדָעַם עוּבָדֵיהוֹן בִזָא וֻתבָרָא עַשתוֹנֵיהוֹן׃