H The Comprehensive Aramaic Lexicon

CAL CODE HELP CLICK HERE
click on the file description for more information

81011: TgChron2 25

click on a word for lexical analysis
Click on a red-colored coordinate for comments and/or translations of the line

previous


10:52 2 בר עשרין וחמש שנין מלך אמציה ועשרין ותשע שנין מלך בירושלם ושום אמיה יהועדן מירושלם׃
20:52 2 ועבד דכשר קדם ייי לחוד לא בלבב שלים׃
30:52 2 והוה כד תקיפת מלכותא עלוהי וקטל ית עבדוהי די קטלו ית מלכא אבוהי׃
40:52 2 וית בניהון לא קטל מן בגלל דכתיב באוריתא בספרא דמשה דפקיד ייי למימר לא ימותון אבהן מטול חובי בנין ובנין לא ימותון מטול חובי אבהן אנש מטול חוביה ימותון׃
50:52 2 וכנש אמציה ית אנש יהודה ואקימנון לבית אבהתא לרבני אלפין ולרבני מאותא לכל אנש יהודה ובנימן ומננון למבר עשרין שנין ולעילא ואשכחנון תלת מאה אלפין עולים נפיק חילא ואחיד מורניתא ועגילא׃
60:52 2 ואגר מישראל מאה אלפין גברי חילא במאה קנטירין דכסף׃
70:52 2 ונביא דייי אתא לותיה למימר מלכא לא ייתי עמך חילא דישראל ארום לית מימרא דייי בסעדהון דישראל כל מלכות שבטא דבית אפרים׃
80:52 2 ארום אין עליל את עם שבטא דבית אפרים יתקלנך ייי קדם בעלי דבבא ארום אית חילא בידא דייי למסעד ולתקלא׃
90:52 2 ואמר אמציה לנביא דייי ומה אית למעבד למאה קנטירין דכסף די יהבית אגר למשרית ישראל ואמר נביא דייי אית חילא קדם ייי למתן לך סגי מן דין׃
01:52 2 ואפרשנון אמציהו למשריתא דאתו לותיה מאפרים וארשיאונון למיזל לאתריהון ותקיף רוגזהון לחדא בדבית יהודה ותבו לאתריהון בתקוף רגז׃
11:52 2 ואמציהו אתקף ודבר ית עמיה ואזל לחילת מלחא ומחא ית בני שעיר עשרתי אלפין׃
21:52 2 ועשרתי אלפין כד חיין שבו בני יהודה ואיתיאונון לריש טנרא וטלקונון מריש טנרא וכלהון אתבזעו׃
31:52 2 ובני משיריא די אתיב אמציה מלמיזל עמיה לקרבא ואתנגידו בקרוי יהודה משמרון ועד בית חורון וקטלו מנהון תלתא אלפין ובזו בזתא רבתא׃
41:52 2 והוה בתר דאתא אמציהו מן למקטל ית אדומאי ואיתיאו ית טעות בני גבל ואקימנון ליה לדחלן וקדמיהון יסגוד וקדמיהון יסיק בוסמין׃
51:52 2 ותקיף רוגזא דייי באמציהו ושדר לותיה נביא ואמר ליה למא תבעתא ית טעות עמא די לא שיזיבו ית עמהון מן ידך׃
61:52 2 והוה במללותיה עמיה ואמר ליה איפשר לממלך למלכא מניאו יתך פסוק לך למא יקטלונך ופסק נביא מלאתנבאה ואמר ידעית ארום מליך ייי לחבלותך מטול דעבדתא דא ולא קבילתא למלכתי׃
71:52 2 ואתמליך אמציה מליך שבטא דבית יהודה ושדר לות יואש בר יהואחז בר יהוא מלכא דישראל למימר איתא ונתחמי אפין באפין בקרבא׃
81:52 2 ושדר יואש מלכא דישראל לות אמציה מלכא דבית יהודה למימר סלווא די בלבנן שדר לות ארזא די בלבנן למימר הב ית ברתך לברי לאנתו ועדת חיות ברא די בלבנן ודושישת ית סלווא הכדין עבדתא בעדן דשדרתא לותי ואגרתא מדבית ישראל מאה אלפין גברי חילא במאה קנטירין דכסף ומן בתר כדין פטרתנון מן למיזל עמך בקרבא ושדרתנון בתקוף רוגזהון ואתנגידו בארע מלכותך וקטלו מנהון תלתא אלפין ובזו בזתא רבתא׃
91:52 2 אמרת במימרך הא קטילית ית אדומאי ואתררם עלך לבך לאתיקרא כדון תיב בביתך למא את מתגרי בבישתא ותפול אנת ואנש יהודה עמך׃
02:52 2 ולא קביל אמציה ארום מן קדם ייי הוא מן בגלל לממסרהון בידיה ארום תבעו ית פולחן דחלן דאדום׃
12:52 2 וסליק יואש מלכא דבית ישראל ואתחמיאו אפין באפין בקרבא הוא ואמציה מליך שבטא דבית יהודה בבית שמש די לשיבט יהודה׃
22:52 2 ואתברו אנש יהודה קדם אנש ישראל ואפכו גבר לקרווהי׃
32:52 2 וית אמציה מליך שבטא דבית יהודה בר יואש בר יהואחז אחד יואש מלכא דבית ישראל בבית שמש ואתייה לירושלם ותרע בשורא דירושלם מתרעא דאפרים עד תרעא זויתא ארבע מאה אמין׃
42:52 2 וכל דהבא וכספא וית כל מניא דאשתכחו בבית מקדשא דייי דאקדיש עבד אדום בעדן די נסיב דוד מן ביתיה ית ארונא דייי כד אתיבו יתיה פלשתאי וברכיה ייי וית תסברי בית מלכא וית בני רברבניא דמתמשכנין גביה ותב לשמרון׃
52:52 2 וחיא אמציה בר יואש מלכא דבית יהודה בתר דמית יואש בר יהואחז מלכא דבית ישראל חמיסרי שנין׃
62:52 2 ושאר פתגמי אמציה קדמאי דהליך בדחלתא דייי ובתראי די סטא מן אורחן דתקנן קדם ייי הלא אנון כתיבין על ספר מלכיא דבית יהודה ודבית ישראל׃
72:52 2 ומן עדן די סטא אמציה מן בתר פולחנא דייי ומרדו עלוי מרדא בירושלם ואפך ללכיש ושדרו בתרוי ללכיש וקטלוהי תמן׃
82:52 2 ונטלוהי על סוסותא וקברו יתיה עם אבהתוי בקרתא דיהודה׃

next