H The Comprehensive Aramaic Lexicon

CAL CODE HELP CLICK HERE
click on the file description for more information

81011: TgChron2 14

click on a word for lexical analysis
Click on a red-colored coordinate for comments and/or translations of the line

previous


10:41 2 ועבד אסא דתקין ודכשר קדם ייי אלהיה׃
20:41 2 ועטר ית אגורי עממין נוכראין ובמסיא ותבר ית קמתא וקציץ ית אשירתא׃
30:41 2 ואמר לדבית יהודה למתבע דחלתא דייי אלהא דאבהתהון ולמעבד אוריתא ותפקידתא׃
40:41 2 ועטר מכל קרוי יהודה ית במסיא וית חנסנסיא ושדוכת מלכותא קדמוי׃
50:41 2 ובנא קרוין כריכן ביהודה ארום שדוכת ארעא דישראל ולית עמיה קרבא בשניא האלין ארום אנח ייי ליה׃
60:41 2 ואמר לדבית יהודה נבני ית קרויא האלין ואקיף שוריא ומוגדליא דשין ועברין עד כדי אתכבישו דיירי ארעא קדמנא ארום תבענא ית דחלתא דייי אלהנא תבענא אולפן מן קדמוי ואנח לנא מחזור חזור ובנו ואצלחו׃
70:41 2 והוה לאסא חילא נטלי עגילין ומורנין מדבית יהודה תלת מאה אלפין ומדבית בנימן נטלי תריסין ונגדי קשתין מאתן ותמנן אלפין כל אלין גברי חילא׃
80:41 2 ונפק לותהון זרח כושאה בחילא אלף אלפין וארתכין תלת מאה ואתא עד מרשה׃
90:41 2 ונפק אסא קדמוי וסדרו קרבא בחילת צפת די למרשה׃
01:41 2 וצלי אסא קדם ייי אלהיה ואמר ייי אלהים לית בר מנך למסעד ביני גברא לביני חלשא סעוד יתנא ייי אלהנא ארום על מימרך אסתמכנא ובשום מימרך אתינא על ריכפת עמא הדין ייי אלהנא אנת לא ישלט עמך בר נש׃
11:41 2 ותבר ייי ית כושאי קדם אסא וקדם בית יהודה ואפכו כושאי׃
21:41 2 ורדפונון אסא ועמא די עמיה עד גרר ונפלו מן כושאי ולא הות להון שיזבותא לאתקיימא ארום אתברו קדם ייי וקדם משיריתיה ונטלו עדאה סגיא לחדא׃
31:41 2 וקטלו ית כל יתבי קרויא דחזור גרר ארום הוה דחילא מן קדם ייי עלהון ובזו ית כל קרויא ארום ביזתא סגיעא הות בהון׃
41:41 2 ואוף משכני גיתיהון מחו ושבו עאן לסוגי וגמלין ותבו לירושלם׃

next