H The Comprehensive Aramaic Lexicon

CAL CODE HELP CLICK HERE
click on the file description for more information

81011: TgChron1 23

click on a word for lexical analysis
Click on a red-colored coordinate for comments and/or translations of the line

previous


10:32 1 ודוד סיב ושבע יומין ואמליך ית שלמה בריה על ישראל׃
20:32 1 וכנש ית כל רברבי ישראל וכהניא וליואי׃
30:32 1 ומנו ליואי מבר תלתין שנין ולעילא והוה מנינהון לגולגלתהון לגובריא תמני ותלתין אלפין׃
40:32 1 מן אלין רבנין על עבידת בית מקדשא דייי ארבעא ועסרין אלפין וסרכיא ודייניא אשתה אלפין׃
50:32 1 וארבעת אלפין תרעיא וארבע[ת] אלפין משבחיא קדם ייי בזיני זמר דעבדין לשבחא׃
60:32 1 ופליגנון דוד פלוגוותא לבני לוי גרשון קהת ומררי׃
70:32 1 לבני גרשון לעדן ושמעי׃
80:32 1 בני לעדן דמתמנא לרישא יחיאל וזתם ויואל תלתא׃
90:32 1 בני שמעי שלמית וחזיאל והרן תלתא אלין רישי אבהתא לבית לעדן׃
01:32 1 ובני שמעי יחת וזינא ויעוש ובריעה אלין בני שמעי ארבעא׃
11:32 1 והוה יחת ממנא לרישא וזיזא תניינא ויעוש ובריעה לא אסגיעו בנין והוו לבית אבא ממנן למטרתא חדא׃
21:32 1 בני קהת עמרם יצהר חברון ועזיאל ארבעא׃
31:32 1 בני עמרם אהרן ומשה ואתפרש אהרן לקדשותיה קדש קודשין הוא ובנוהי עד עלמא לאסקא קטרת בוסמין קדם ייי לשמשותיה ולברכא בשמיה עד עלמא׃
41:32 1 ומשה נביא דייי בנוהי אתקריו על שיבט לוי׃
51:32 1 בני משה גרשם ואליעז[ר]׃
61:32 1 בני גרשם שבואל ממנא לרישא הוא יהונתן דאתמנא נבי שקרא ובסיבותיה עבד תתובא ומני יתיה דוד לרישא על אוצריא׃
71:32 1 והוו בני אליעזר רחבי[ה] ממנא לרישא ולא הוה לאליעזר בנין חורנין ובגין זכותיה דמשה רבו בני רחבי[ה] וסגיעו לעיל מן שתין ריבבן׃
81:32 1 בני יצהר שלמית ממנא לרישא׃
91:32 1 בני חברון יריהו רישא אמריה תנינא יחזיאל תליתאה ויקמעם רביעאה׃
02:32 1 בני עזיא[ל] מיכה רישא וישיה תנינא׃
12:32 1 בני מררי מחלי ומושי בני מחלי אלעזר וקיש׃
22:32 1 ומית אלעזר ולא הוו ליה בנין אלהן בנן ונסיבונון בני קיש אחא דאבוהון׃
32:32 1 בני מושי מחלי ועדר וירמות תלתא׃
42:32 1 אליין בני לוי לבית אבהתהון רישי אבהן למנינהון במניין שמהן לגולגלתהון עבדי עבידתא לפולחן בית מקדשא דייי מבר עסרין שנין ולעילא׃
52:32 1 ארום אמר דוד אניח מימרא דייי אלהא דישראל לעמיה ואשרי שכינתי[ה] בירושלם עד לעלם׃
62:32 1 ולחוד אוף לליואי לא כשר למטל ית משכנא דייי וית כל מנוהי לפולחניה׃
72:32 1 ארום בפתגמי דוד דאתנבי ואמר בחורנית[א] הנון מניין בני לוי מבר עסרין שנין ולעילא׃
82:32 1 ארום אתר משרויהון בסטר בני אהרן לפלחן בית מקדשא דייי על דאראתה ועל לשכייה ועל דכותה לכל קודשא ועבידת פלחן בית מקדשא דייי׃
92:32 1 וללחם סדורה ולסלתה למנחתה ולאספוגין קטירין ולמסריתה ולרביכה ולכל מכילתה ומשחתה׃
03:32 1 ולמקם בצפר בצפר לאודויי ולשבוחי קדם ייי וכדנן לרמשא׃
13:32 1 ולכל עדן דמתסקן עלוון קדם ייי ליומי שביא ולרישי ירחיא ולמועדיא במניינא כד חמי להון תדירא קדם ייי׃
23:32 1 ויטרון ית מטרת משכן זמנא וית מטרת קודשא ומטרת בני אהרן אחוהון לעבידת בית מקדשא דייי׃

next