H The Comprehensive Aramaic Lexicon

CAL CODE HELP CLICK HERE
click on the file description for more information

81011: TgChron1 15

click on a word for lexical analysis
Click on a red-colored coordinate for comments and/or translations of the line

previous


10:51 1 ועבד ליה בתין בקרתא דדוד ואתקין אתרא לארונא דה׳ ופרס ליה משכנא׃
20:51 1 הא בכין אמר דוד דלא כשרין למטל ית ארונא דה׳ אילהן ליואי ארום בהון אתרעי ה׳ למטל ית ארונא דה׳ ולשמשא יתיה עד עלמא׃
30:51 1 וכנש דוד ית כל ישראל לירושל׳ לאסקא ית ארונא דה׳ לאתריה דזמין ליה׃
40:51 1 וכנש דוד ית בני אהרן וית ליואי׃
50:51 1 לבני קהת ית אוריאל רבנא ואחוהי מאה ועשרין׃
60:51 1 לבני מררי עשיה רבנא ואחוהי מאתן ועשרין׃
70:51 1 לבני גרשם יואל רבנא ואחוהי מאה ועשרין׃
80:51 1 לבני אליצפן שמעי׳ רבנא ואחוהי מאתן׃
90:51 1 לבני חברון אליאל רבנא ואחוהי תמנן׃
01:51 1 לבני עזיאל עמינדב רבנא ואחוהי מאה ותריסר׃
11:51 1 וקרא דוד לצדוק ולאביתר כהניא ולליואי לאוריאל עשיה ויוא׳ ואליאל ועמינדב׃
21:51 1 ואמר להון אתון רישי אבהת לליואי אזדמנו אתון ואחוכון ותסקון ית ארונא דה׳ אלהא דישר׳ לאתרא דזמינית ליה׃
31:51 1 ארום בקדמיתא עד לא הויתון אתון תרע ה׳ אלהנא בנא ארום לא תבענוהו כדחזי׃
41:51 1 ואזדמנו כהניא וליואי לאסקא ית ארונא דה׳ אלהא דישראל׃
51:51 1 ונטלו בני ליואי ית ארונא דה׳ היכמה דפקד משה היכפתגמא דה׳ על כתפיהון באסלוון עלויהון׃
61:51 1 ואמר דוד לרבני ליואי לאסקא ית אחוהון משבחיא במאני תושבחתא נבלין וכנרי׳ וצלצלין משמען לארמא בקלא לחדוה׃
71:51 1 ואוקימו ליואי ית הימן בר יואל ומן קריבוהי אסף בר ברכיהו ומן בני מררי קריביהון איתן בר קושיהו׃
81:51 1 ועמהון אחיהון בתניינות זכריהו בן ויעזיאל ושמירמות ויחיאל וענו אליאב ובניהו ומעשיהו ומתתיהו ואליפלהו ומקניהו ועבד אדם ויעיאל תרעייה׃
91:51 1 ומשבחיה הימן אסף ואיתן בצלצלין דנחשא לאשמעא׃
02:51 1 וזכריהו ועזיאל ושמירמות ויחיאל ועני ואליאב ומעשיהו ובניהו בנבלין על בסימות קלפונין די שבחה׃
12:51 1 ומתתיהו ואליפלהו ומקניהו ועבד אדום ויעיאל ועזזיהו בכנרין על תמנייתא למשבחה׃
22:51 1 וכנניהו רב ליואי במטול מתרברב על נטלי מטולא ארום סוכלתן הוא׃
32:51 1 וברכי׳ ואלקנה תרעייה לפרסא דתמן ארונא׃
42:51 1 ושבניהו ויושפט ונתנאל ועמשי וזכריהו ובניהו ואליעז׳ כהניא מחצצרין בחצצרתא קדם ארונא דה׳ ועבד אדום ויחיה תרעייה לפרסא דתמן ארונא׃
52:51 1 והוה דוד וסבי ישראל ורבני אלפין דאזלין לאסקא ית ארון קיימא דה׳ מן בית עבד אדום בחדוה׃
62:51 1 והוה כד סעוד ה׳ ית ליואי נטלי ארון קיימא דה׳ ודבחו שבעא תורין ושבעא אמרין׃
72:51 1 ודוד הוה מתעטף במנטר דבוץ וכל ליואי דנטלין ית ארונא ומשבחייה וכנניה רב נטלי מטולא דמשבחייה ועל דוד כרדוט דבוץ׃
82:51 1 וכל ישראל מסקין ית ארון קיימא דה׳ ביבבה ובקל שופר׳ ובחצצרתא ובצלצלין משמען בנבלין וכנרין׃
92:51 1 והוה ארון קיימא דה׳ אתי עד קרתא דדוד ומיכל ברת שאול אודיקת מן חרכא וחמת ית מלכא מטפז ומשבח ובסרת עלוי בלבבה׃

next