The Comprehensive Aramaic Lexicon

10:3	אנא הוא גברא דחזי עינייא בחוטרא דרדי ברוגזיה׃
20:3	ויתי דבר ואוביל לחשוכא ולא לנהורא׃
30:3	ברם בי יתוב יגלגל עלי מחתיה כל יומא׃
40:3	עתק בסרי ממכתשין ומשכי מן מחתא תבר גרמי׃
50:3	בנא עלי כרקומין ואקיף קרתא ועקר רישי עמא ושלח אינון׃
60:3	בבית אסירין מחשוכא יתיבני כמיתין דאזלין לעלמא אחרנא׃
70:3	סגר בתרי בדיל דלא אפוק מן איסורי ייקר על רגלי כבלין דנחש׃
80:3	אף ארום אצוח ואצלי אסתתים בית צלותי׃
90:3	סגר אורחי באבנין פסילן שבילי סרך׃
01:3	דיבא מכמן הוא לי אריא דמתעתד בבישא׃
11:3	אורחי סדר ושסעני שויני צדו׃
21:3	מתח קשתיה ועתדני כפלגליסא לגירא׃
31:3	אעיל בכליותי גירי תיקיה׃
41:3	הויתי חוכא לכל פריצי עמי ומזמרן עלי כל יומא׃
51:3	אסבעני מריר חיון ארויני גידין׃
61:3	ורצץ באבנין שני כנעינני באפרא׃
71:3	ושבקת משלמא נפשי אתנשיתי טבתא׃
81:3	ואמרית הובד תוקפי וטובא דהויתי אוריך מן קדם ייי׃
91:3	אידכר עניי נפשי ומה דמרירו בי סנאי ואשקיאו יתי גידין ורישי חיון׃
02:3	מדכר תדכר ותצלי עלי נפשי על סיגופא׃
12:3	דא נחמתא אתיב על לבי בגין כן אוריך׃
22:3	טיבותא דייי ארום לא פסקו ארום לא יתמנעו רחמוהי׃
32:3	נסין חדתין מרחיש לצפריא סגיאה היא הימנותך׃
42:3	חולקי ייי אמרת נפשי בגין כין אוריך ליה׃
52:3	טב הוא ייי לדמסברין לפרקניה לנפשא דתתבע אולפניה׃
62:3	טב הוא לאורכא ולמשתק עד תיתי פורקנא דייי׃
72:3	טב הוא לגברא ארום יליף נפשיה לסוברא ניר פקודיא דייי דמן עולמוי׃
82:3	יתיב בלחודוי וישתוק ויסבול ייסורין דאתין עלוהי בדיל יחוד שמא דייי דמשתלחין לאתפרעא ברחמוהי על חובא קלילא דחב בעלמא הדין עד דיתוב ויטלינון מעילוי׃
92:3	יתין בעפרא פומיה וישתטח קדם רבוניה מא אם אסתבר׃
03:3	יושיט למחוהי ליסתא בגין דחלתא דייי ישבע בקלנא׃
13:3	ארום לא ישבוק עמיה בעקתא לעלם רבונהון ייי׃
23:3	ארום אלהין ברישא יתבר והדר יתוב ויחוס עליהון כסגיאות טיבותיה׃
33:3	ארום בגין דלא עני גבר ית לביה בתעניתא ארום גרם לתברא בני אנשא׃
43:3	למדכא ולמכבשא תחות רגלוהי כל אסירי ארעא׃
53:3	ולמצלי דין גבר מסכין קביל אפי עלאה׃
63:3	לסרבא אנש מסכין במצותיה אפשר דמן קדם ייי לא אתגלי׃
73:3	מן הוא אנשא דאמר והות בשתא מתעבדא בעלמא אלהין בגין דעבדו מא דלא אתפקדו מן קדם ייי׃
83:3	מפום אלהא עלאה לא תיפוק בשתא אלהין על ברת קלא מיתכרזא למהוי בישין על חטופין דאתמליאת ארעא ובעדן די יבעי למגזר טבא בעלמא מפום קדשא נפיק׃
93:3	מא ממון ישכח גבר כד הוא חי על חובוהי דיחוב׃
04:3	נבלוש אורחנא ונבקר ונתוב בתיובתא קדם ייי׃
14:3	נטול לבנא בריר ונדכי ידנא מגזילן ונתוב אל אלהא דמדוריה בשמיא׃
24:3	נחנא מרדנא וסרבנא ועל דלא הדרנא בתיובתא את לא שבקת׃
34:3	טללתא עלנא ברגז ורדפתנא בגלותא קטלתא ולא חסת׃
44:3	טללתא שמיא בענני יקרא דילך בגין לא תעבר לותך צלותא׃
54:3	כניעותא ומאיסותא תשוי יתנא בחובנא ביני עממיא׃
64:3	פתחו עלנא פומהון למגזר עלנא גזירן כל בעלי דבבנא׃
74:3	אימתא וזיע הוה עלנא רתיתא ותברא׃
84:3	היך יבלין דמיא תזלוג עיני דמען על תבר כנשתא דעמי׃
94:3	עיני זלגת דמען ולא תשתוק מלמבכי מדלית פאיג עקתי וממליל תנחומין על לבי׃
05:3	עד דיסתכי ויחזי ייי בעלבני מן שמיא׃
15:3	בכותא דעיני לא אסתקפת למדע על חורבן כל פלכי עמי וניזול בנתא דירושלם קרתי׃
25:3	מכמן כמנו לי כציפרא בעלי דבבי על מגן׃
35:3	עברו בגובא חיי ורגמו אבנא בי׃
45:3	שטו מיא אטיפו על רישי אמרית במימרי אתגזרית מן עלמא׃
55:3	צליתי לשמך ייי מן גוב ארעיתא׃
65:3	צלותי קבילתא בזמנא ההוא וכען לא תכסי אודנך מלקבלא צלותי לרוחתי לבעותי׃
75:3	שלחתא מלאכא לשיזבא יתי ביומא דצליתי קדמך אמרת במימרך לא תדחל׃
85:3	נציתא ייי לעבדין מצותא לנפשי פרקתא חיי׃
95:3	חזיתא ייי סריך דסריכו לי דון דינאי׃
06:3	גלי קדמך כל נקמתהון כל מזימתהון עלי׃
16:3	שמיע קדמך כסופיהון ייי כל מזמתהון עלי׃
26:3	שפות דקיימין עליי ומלוליהון עלי כל יומא׃
36:3	מותבהון וזקיפתהון אסתכל אנא זמריהון׃
46:3	תתיב להון גמילא בישא ייי כעובדי ידיהון׃
56:3	תתין להון תבירות לבא ושלהאותך ישלהי להון׃
66:3	תדליקינון ברגז ותשיצינון מתחות שמיא דייי׃

next chapter