H The Comprehensive Aramaic Lexicon

CAL CODE HELP CLICK HERE
click on the file description for more information

81002: TgPs (Targum Psalms)

click on a word for lexical analysis
Click on a red-colored coordinate for comments and/or translations of the line

previous chapter


100:201 צלותא על מסכינא ארום מישתלהי וקדם יהוה יימר צלותיה׃
200:201 יהוה קבל צלותי ופגינתי לקדמך תיעול׃
300:201 לא תסליק שכינתך מיני ביום עקתי אצלי לותי אודנך ביומא דאקרי סרהיב עני יתי׃
400:201 ארום אישתיציאו היך תננא יומי ואיברי היך תפיא חררן׃
500:201 לקא היך עסבא \״ויתיביש#1#״ ליבי ארום איתנשיתי אורית אולפני׃
600:201 מן קל תנחתי אידבק גרמי לבסרי׃
700:201 אידמית לקקתא דמדברא הוית היך קיפופא די בארעא נגובתא׃
800:201 שקדית כל ליליא והויתי היך ציפר דפרח ונייד בלחודיה על איגרא׃
900:201 כל יומא יחסדון לי בעלי דבבי מתלעבי במימרי קיימו מגן׃
010:201 ארום אפרא היך מזונא סעדית ושקיותי בבכותא מזגית׃
110:201 מן קדם רוגזך וקיצפך ארום נטלתני וטלקתני׃
210:201 יומי היך טולא דיצלי ואנא היך עסבא איבש׃
310:201 ואת יהוה מדורך לעלם בשמיא תיתב״מתיתיב#1#״ ודכרנך לדר ודר׃
410:201 את תקום תרחם ציון ארום עידן למיחוס עלה ארום אתא זימנא׃
510:201 ארום רעו עבדך ית אבנהא״אבנייהא#1#״ וית עפרהא יחייסון׃
610:201 וידחלון עמיא״עממיא#1#״ ית שמא דיהוה וכל מלכיא דארעא ית יקרך׃
710:201 ארום איתבני במימרא דיהוה קרתא דציון אתגלי ביקרא׃
810:201 אתפני לות צלותיה דמצטדייאן ולא בסר ית צלותיהון׃
910:201 תתכתיב צלותא דא לדר בתראי ועמא דעתיד לאיתבראה ישבח יה״אלהא#1#״׃
020:201 ארום אודיק משמי מרומא דקודשיה יהוה מן שמיא לארעא אסתכל׃
120:201 למשמע אניקותא דאסיריא למשרי בניא דמסירין למיתותא׃
220:201 למישתעי בציון שמא דיהוה ותושבחיה בירושלם׃
320:201 באיתכנשות עמין״עממין#1#״ כחדא ומלכוותא למיפלח קדם יהוה׃
420:201 איסתגיף מן טורח דאורח גלותא חילי איתקצרון יומי׃
520:201 אימר קדם אלהי לא תסלקינני מן עלמא \״הדין#1#״ בפלגות יומי אתי יתי לעלמא דאתי מטול די בדרי דריא שנתך׃
620:201 מן שירויא דאיתברי כל בירייתא ארעא יסדתא ועובדי ידך״אידייך#1#״ שמיא׃
720:201 הינון יהובדון ואת תקום וכולהון היך לבושא יתבליין היך איצטלי תחליפינון ויתחלפן׃
820:201 ואת הוא די בריתינון ושנתך לא מישתלמן׃
920:201 בני עבדך ישרון ארעא וזרעיתהון קדמך יתקנון׃

next chapter