H The Comprehensive Aramaic Lexicon

CAL CODE HELP CLICK HERE
click on the file description for more information

81001: TgPsJon Lev chapter 10

click on a word for lexical analysis
Click on a red-colored coordinate for comments and/or translations of the line

previous


10:01veL ונסיבו בני אהרן נדב ואביהוא גבר מחתיתיה ויהבו בהון אישתא ושויאו עלה קטורת בוסמין וקריבו קדם ייי אישתא נוכרתא מן תפיין מה דלא פקיד יתהון
20:01veL ונפקת שלהובית אישתא מן קדם ייי ברגז ואיתפליגת לארבעתי חוטין ואעלת בגוא אפיהון ואוקידת ית נשמתהון ברם גופיהון לא איתחרכו ומיתו קדם ייי
30:01veL ואמר משה הוא דמליל ייי עימי בסיני למימר בדיקריבין קדמי אנא מקדש משכנא דאין לא מזדהרין בעיבידת קורבניא אוקידינון בשלהובית אשתא מן קדמוי מטול דעל מיחמי כל עמא איתיקר ושמע אהרן ושתיק וקבל אגר טב על משתוקיה
40:01veL וקרא משה למישאל ולאלצפן בנוי דעוזיאל ליואי חביבא דאהרן ואמר להון קריבו טולו ית אחיכון מן קודשא ותסוברונון למברא למשריתא
50:01veL וקריבו וסוברונון באונקלוון דפרזלא בכיתונהון וקברונון למברא למשריתא היכמא דמליל משה
60:01veL ואמר משה לאהרן ולאלעזר ולאיתמר בנוי רישיכון לא תרבון פרוע ולבושיכון לא תבזעון ולא תמותון ביקידת אישתא ועילוי כל כנישתא יהי רוגזא ברם שתוקו ותזכון ית דינא עליכון ואחיכון כל בית ישראל יבכון ית יקידתא דאוקד ייי
70:01veL ומתרע משכן זימנא לא תיפקון דילמא תמותון ארום משח רבותא דייי עליכון ועבדו הי כפיתגמא דמשה
80:01veL ומליל ייי עם אהרן למימר
90:01veL חמר וכל מידעם מרוי לא תשתי אנת ובנך עימך ביזמן מיעלכון למשכן זימנא היכמה דעבדו בנך דמיתו ביקידת אישתא קים עלם לדריכון
01:01veL ולאפרשא ביני קודשא וביני חולא וביני מסאבא וביני דכיא
11:01veL ולאלפא ית בני ישראל ית כל קיימייא דמליל ייי להון בידא דמשה
21:01veL ומליל משה עם אהרן ועם אלעזר ועם איתמר בנוי דאישתיירו מן יקידתא סיבו ית מנחתא דאישתיירת מקורבנייא דייי ואיכלוה פטיר בסטר מדבחא ארום קודש קודשין היא
31:01veL ותיכלון יתה באתר קדיש ארום חולקך וחולק בנך היא מקרבניא דייי ארום הכדין איתפקדית
41:01veL וית חדיא דארמותא וית שקא דאפרשותא תיכלון באתר דכי אנת ובנך עימך ארום חולקך וחולק בנך איתיהיבו מניכסת קודשיא דבני ישראל
51:01veL שקא דאפרשותא וחדיא דארמותא על קורבני תרביא ייתון לארמא ארמא קדם ייי ויהי לך ולבנך עימך לקיים עלם היכמא דפקיד ייי
61:01veL תלתא צפיריא איתקריבו ביומא ההוא צפירא דריש ירחא וצפירא דחטאתא דלעמא וצפירא דחטאתא דקריב נחשון בר עמינדב לחנוכת מדבחא אזל אהרן ובנוי ואוקידו תלתיהון אתא משה ותבע ית צפירא דחטאתא די לעמא ותבעיה והא איתוקד ורתח על אלעזר ועל איתמר בנוי דאהרן דאישתיירו למימר
71:01veL מדין לא אכלתון ית חטאתא באתר קדיש ארום קודשין היא ויתה יהב לכון למישרי על סורחנות כנישתא לכפרא עליכון קדם ייי
81:01veL הא לא איתעל מן אדמון לות קודשא גוואה מיכל תיכלון יתה בקודשא היכמא דאתפקדית
91:01veL ומליל אהרן עם משה הא יומא דין קריבו בני ישראל ית קרבן חטאתהון ועלוותהון קדם ייי וארע יתי סקול כאילין בתרין בניי הלא מעשרא תניינא איתפקד די לא למיכול אביל מיניה כל דכן קרבן חטאתא ומה אילו אשתליית ואכלית מן קרבן חטאתא יומא דין אוף תרין בניי דאשתיירו הוה להון מן דינא דייתוקדון דלית אפשר דישפר קדם ייי
02:01veL ושמע משה ושפר קודמוי ואפיק כרוזא במשריתא למימר אנא הוא דאתעלמת הילכתא מיני ואהרן אחי אדכר יתיה לי

next