H The Comprehensive Aramaic Lexicon

CAL CODE HELP CLICK HERE
click on the file description for more information

81001: TgPsJon Lev chapter 02

click on a word for lexical analysis
Click on a red-colored coordinate for comments and/or translations of the line

previous


10:20veL ובר נש ארום יקרב קרבן מנחתא קדם ייי קמחא סמידא יהי קורבניה ויריק עלה משחא ויתן עלה לבונתא
20:20veL וייתינ{א}<ה> לות אהרן כהניא ויקמוץ מתמן מלי קומציה מן קמחא סמידא ומן טוב מישחא על כל לבונתא ויסיק כהנא ית שפר אדכרתא למדבחא קרבן דמתקבל ברעוא קדם ייי
30:20veL ומה דמשתייר מן מנחתא יהי לאהרן ולבנוי קודש קודשין מקרבניא דייי
40:20veL וארום תקריב קרבן מנחתא דמתאפי בתנורא סמידא גריצן פתירן ופתיכן במשח וספוגין פטירין דמשיחין במשח
50:20veL ואין מנחתא על מסריתא קרבנך סמידא פתיכא במשח פטיר תהי
60:20veL רסיק יתיה ריסוקין ותריק עלה מישחא מנחתא היא
70:20veL ואין מנחת מרתחא קרבנך סמידא רתח במשח תתעבד
80:20veL ותהנעל ית מנחתא דתתעבד מן סמידא ומישחא האילין לקדם ייי ויקרבינה גברא דמייתי יתה לות כהנא וכהנא ימטינה למדבחא
90:20veL ויפרש כהנא מן מנחתא ית שבח אדכרתא ויסיק למדבחא קרבן דמתקבל ברעוא קדם ייי
01:20veL ומה דמשתייר מן מנחתא יהי לאהרן ולבנוי קדש קודשין מקרבניא דייי
11:20veL כל מנחתא די תקרבון קדם ייי לא תתעבד חמיע ארום כל חמיר וכל דבש לא תקרבון מיניה קרבנא קדם ייי
21:20veL קרבן שירויא תקרבון יתהון קדם ייי דלחם ביכוריא חמיר מתקרב ותמרי בזמן ביכורי איבא עם דובשיה מתקרב ויכלון יתהון כהנייא ברם למדבחא לא יתסקון לאתקבלא ברעוא
31:20veL וכל קרבן מנחתך במלחא תמלח ולא תבטל מלח קיים אלקך מעילוי מנחתך מטול דעשרין וארבע מוהבתא דכהניא איתגזרו בקיים מילחא בגין כן על כל קרבנך תקריב מילחא
41:20veL ואין תקרב מנחת ביכורין קדם ייי מהבהב קלי בנורא קמח קלי ופירוכיין תקרב ית מנחת ביכורך
51:20veL ותיתן עלה משח זיתא ותשוי עלה לבונתא מנחתא היא
61:20veL ויסיק כהנא ית שבח אדכרתה מן פירוכייה ומטוב מישחא על כל לבונתא קורבנא קדם ייי

next