H The Comprehensive Aramaic Lexicon

CAL CODE HELP CLICK HERE
click on the file description for more information

81001: TgPsJon Exod chapter 07

click on a word for lexical analysis
Click on a red-colored coordinate for comments and/or translations of the line

previous


10:70doxE ואמר ייי למשה למא אנת מסתפי חמי דכבר שוית יתך דחילא לפרעה כאילו אלהא דיליה ואהרן אחוך הוי נביא דילך
20:70doxE אנת תמליל לאהרן ית כל דאיפקדינך ואהרן אחוך ימליל לפרעה ויפטור ית בני ישראל מארעיה
30:70doxE ואנא אקשי ית יצרא דליבא דפרעה ואסגי ית אתוותיי וית תימהיי בארעא דמצרים
40:70doxE יקבל מנכון פרעה ואיגרי בהון גירין דקטול ואיתין מחת גבורת ידי במצרים ואפיק ית עמי בני ישראל פריקין מארעא דמצרים בדינין רברבין
50:70doxE וינדעון מצראי ארום אנא הוא ייי כד ארים ית מחת גבורתי על מצרים ואנפיק ית בני ישראל פריקין מביניהון
60:70doxE ועבד משה ואהרן היכמא דפקיד ייי יתהון היכדין עבדו
70:70doxE ומשה בר תמנן שנין ואהרן בר תמנן ותלת שנין במלילתהון עם פרעה
80:70doxE ואמר ייי למשה ולאהרן למימר
90:70doxE ארום ימלל עמכון פרעה למימר הבו לכון תימהא ותימר לאהרן סב ית חוטרך וטלוק יתיה קדם פרעה יהי לחוי חורמן ארום עתידין כל דיירי ארעא למשמע קל ציווחתהון דמצרים בתברותי יתהון היכמא דשמעו כל בירייתא ית קל ציווחת חיויא כד איתערטל מן שירויא
01:70doxE ואעל משה ואהרן לות פרעה ועבדו היכדין היכמא דפקד ייי וטלק אהרן ית חוטריה קדם מיחמי פרעה וקדם מיחמי עבדוי והוה לחורמנא
11:70doxE וקרא לחוד פרעה לחכימייא ולחרשייא ועבדו לחוד הינון יניס וימבריס חרשין דבמצרים בלחשי קוסמיהון היכדין
21:70doxE וטלקון אינש חוטריה והוו לחורמנין ומן יד איתהפיכו למיהוי כמ{ר}<י>ן שירויא ובלע חוטרא דאהרן ית חוטריהון
31:70doxE ואיתקף יצרא דלבא דפרעה ולא קביל מנהון היכמא ייי
41:70doxE ואמר ייי למשה איתקף יצרא דלבה דפרעה מסרב למפטור ית עמא
51:70doxE איזל לות פרעה בצפרא הא נפיק למפטור קוסמין עילוי מיא הי כאמגושא ותיתעתד לקדמותיה על גיף נהרא וברם חוטרא דאהרן דאיתהפיך לחיוי תיסב לידך
61:70doxE ותימר ליה ייי אלקא דיהודאי שדרני לוותך למימר פטור ית עמי ויפלחון קדמי במדברא והא לא קבילת עד כדון
71:70doxE כדנא אמר ייי בדא סימנא תינדע ארום אנא ייי הא אנא מחי בחוטרא דבידי על מוי די בנהרא ויתהפכון לאדמא
81:70doxE ונוני דיבנהרא ימותון ויסרי נהרא וישתלהון מצראי למישתי מוי מן נהרא
91:70doxE ואמר ייי למשה אימר לאהרן סב חוטרך וארים ידך על מוי דמצראי על נהריהון על ביציהון על שיקייאון ועל כל בית כנישות מימיהון ויהון דמא ויהי דמא בכל ארע דמצרים ובמני אעא ובמני אבנא
02:70doxE ועבדו היכדין משה ואהרן היכמא דפקיד ייי וארים בחוטרא ומחא ית מוי דבנהרא לאחמי פרעה ולאחמי עבדוי ואיתהפיכו כל מוי דבנהרא לאדמא
12:70doxE ונוני די בנהרא מיתו וסרי נהרא ולא יכילו מצראי למישתי מוי מן נהרא והות מחת דמא בכל ארעא דמצרים
22:70doxE ועבדו היכדין איצטיגנוני מצרים בלחשיהון והפיכו מן מיא דגושן לאדמא ואיתקף יצרא דליבא דפרעה ולא קביל מיניהון היכמא דמליל ייי
32:70doxE ועבד פרעה צורכיה ועאל לביתיה ולא שוי ליביה לחוד למחתא הדא
42:70doxE וחפרו מצראי חזרנות נהרא מוי למישתי ולא אשכחו צלילן ארום לא יכילו למשתי מן מוי דבנהרא
52:70doxE ושלימו שובעא יומין מן בתר די מחא ייי ית נהרא ומבתר כן אסי מימרא דייי ית נהרא
62:70doxE ואמר ייי למשה עול לות פרעה ותימר ליה כדנא אמר ייי פטור ית עמי ויפלחון קדמי
72:70doxE ואין מסרב אנת למפטור הא אנא מחי ית כל תחומך בעורדענייא
82:70doxE וירבי נהרא עורדעניא ויסקון ויעלון בביתך ובקיטון בי דמכך ועילוי דרגשך ובבית עבדך ובעמך ובתנורך ובאצוותך
92:70doxE ובגופך ובגופי עמך ובכל עבדך ישלטון עורדעניא

next