H The Comprehensive Aramaic Lexicon

CAL CODE HELP CLICK HERE
click on the file description for more information

81001: TgPsJon Gen chapter 28

click on a word for lexical analysis
Click on a red-colored coordinate for comments and/or translations of the line

previous


10:82neG וקרא יצחק ליעקב ובריך יתיה ופקדיה ואמר ליה לא תיסב איתא מבנתהום דכנענאי
20:82neG קום איזל לפדן דארם לבית בתואל אבוהא דאימך וסבלך מתמן איתא מבנת לבן אחוהא דאימך
30:82neG ואל שדי יברך יתך בניכסין סגיאין ויפישינך ויסגינך לתריסר שיבטין ותהי זכי לכינשת רבני סנהדרין דסכומהון שובעין כמניינא עממיא
40:82neG ויתן לך ית ברכתא דאברהם לך ולבנך עימך ויתיבינך למירתך ית ארע תותבותך די יהב ייי לאברהם
50:82neG ושדר יצחק ית יעקב ואזל לפדן דארם לות לבן בר בתואל ארמאה אחוהא דרבקה אימא דיעקב ועשו
60:82neG וחמא עשו ארום בריך יצחק ית יעקב ושדר יתיה לפדן דארם למיסב ליה מתמן איתא כד בריך יתיה ופקיד ע{י}לוי למימר לא תיסב איתא מבנתהון דכנענאי
70:82neG וקביל יעקב במימר אבוי ובמימר אימיה ואזל לפדן דארם
80:82neG וחמא עשו ארום בישן בנתהון דכנענאי קדם יצחק אבוי
90:82neG ואזל עשו לות ישמעאל ונסיב ית מחלת היא בשמת בר ישמעאל בר אברהם אחתיה דנביות מן אימיה על נשוי ליה לאינתו
01:82neG חמשא ניסין איתעבידו ליעקב בזמן דנפק מן בירא דשבע ניסא קמאה איתקצרו שעוי דיומא וטמע שימשא בלא אשוניה מן בגלל דהוה דבירא מתחמד למללא עימיה ניסא תניינא ארבעתי אבניא דשוי איסדוי אשכח יתהון בצפרא לאבנא חדא ניסא תליתאה אבנא דהוו כל עדריא מתכנשין ומגלגלין לה מעילוי פם בירא גלגל ית{א}<ה> כחדא מן דרעוי ניסא רביעאה דטפת בירא וסליקו מיא לאנפוי והות טייפא כל יומין דהוה בחרן ניסא חמישאה קפצת ארעא קומוי ובההוא יומא דנפק אזל לחרן
11:82neG וצלי באתר בית מוקדשא ובת תמן ארום טמע שימשא ונסיב ארבעה מאבני אתר קדיש ושוי איסדוי ושכיב באתרא ההוא
21:82neG וחלם והא סולמא קביע בארעא ורישי<ה> מטי עד צית שמייא והא תרין מלאכיא דאזלו לסדום ואיטרדו מן מחיצתהון מן בגלל דגליין מסטירין דמרי עלמא והוו מיטרדין ואזלין עד זמן דנפק יעקב מבית אבוי והינון לוון יתיה בחיסדא עד ביתאל ובההוא יומא סלקון לשמי מרומא עניין ואמרין איתון חמון יעקב חסידא דאיקונין דיליה קביעא בכורסי יקרא והויתון מתחמדין למיחמי יתיה בכין שאר מלאכיא קדישיא דייי נחתין למסתכלא ביה
31:82neG והא יקרא דייי מעתד ע{י}לוי ואמר ליה אנא ייי אלקיה דאברהם אבוך ואלקיה דיצחק ארעא דאנת שכיב עלה לך אתנינה ולבנך
41:82neG ויהון בנך סגיאין הי כעפרא דארעא ותיתקף למערבא ולמדינחא ולציפונא ולדרומא ויתברכון בגין זכוותך כל ייחוסי ארעא ובגין זכוות בנך
51:82neG והא מימרי בסעדך ואיטרינך בכל אתר דתהך ואתיבינך לארעא הדא ארום לא אשבקינך עד זמן די אעביד ית דמלילית לך
61:82neG ואיתער יעקב מדמכיה ואמר בקושטא אית יקר שכינתא דייי שרי באתרא הדין ואנא לא הוית ידע
71:82neG ודחיל ואמר מה דחיל ומשבח אתרא הדין לית דין אתר חול ארום אלהן בית מקדש לשמיה דייי ודין כשר לצל{ן}<ו> מכוון כל קבל תרע שמייא משכלל תחות כורסי יקרא
81:82neG ואקדים יעקב בצפרא ונסיב ית אבנא מן דשוי איסדוי ושוי יתה קמה ואריק מישחא על רישה
91:82neG וקרא שמא דאתרא ההוא ביתאל וברם לוז שמא דקרתא מן קדמת דנא
02:82neG וקיים יעקב קיים למימר אין יהי מימרא דייי בסעדי ויטרינני משפיכות אדם זכאי ופולחנא נוכרא׳ וגילויי ערייתא באורחא הדין דאנא אזיל ויתן לי לחים למיכל וכסו למילבוש
12:82neG ואיתוב בשלם לביתיה דאיבא ויהי ייי לי לאלקא
22:82neG ואבנא הדא דשויתי קמא תהי מסדרא בבי מוקדשא דייי ויהון דריא פלחין עלה לשמא דייי וכל דתיתן לי חד מן עשרא אפרישיניה קדמך

next