H The Comprehensive Aramaic Lexicon

CAL CODE HELP CLICK HERE
click on the file description for more information

81001: TgPsJon Gen chapter 25

click on a word for lexical analysis
Click on a red-colored coordinate for comments and/or translations of the line

previous


10:52neG ואוסיף אברהם ונסיב איתא ושמא קטורה היא הגר דקטירא ליה מן שירויא
20:52neG וילידת ליה ית זמרן וית יקשן וית מדן וית מדין וית ישבק וית שוח
30:52neG ויקשן אוליד ית שבא וית דדן ובני דדן הוון תגרין ואמפורין ורישי אומין
40:52neG ובני דמדין עיפה ועפר וחנוך ואבידע ואלדעה כל אילין בנהא דקטורא
50:52neG ויהב אברהם במתנה ית כל דליה ליצחק
60:52neG ולבניהום דפלקתין דלאברהם יהב אברהם ניכסין מיטלטלין למתנן ותריכינון מעילוי יצחק בריה עד דהוא בחיי ואזלו למיתב קידומא לארע מדינחא
70:52neG ואילין סכום יומי חיי אברהם דחיא מאה ושובעין וחמש שנין
80:52neG ואתנגיד ומית אברהם בשיבו טבא סיב ושבע כל טובא ברם ישמעאל עבד תתובא ביומוי ובתר כן אתכנש לעמיה
90:52neG וקברו יתיה יצחק וישמעאל בנוי למערת כפילתא לחקיל עפרון בר צחר חיתאה דעל אנפי ממרא
01:52neG חקלא דיזבן אברהם מן בני חיתאה תמן איתקבר אברהם ושרה אינתתיה
11:52neG ומן בגלל דלא אברהם צבי לברכא ית ישמעאל בגין כן לא בריך ית יצחק דאין הוה מבריך ליצחק ולא מבריך לישמעאל הוה נטיר ליה דב<ב>ו ובתר דמית אברהם בריך ייי ית יצחק בריה ויתיב יצחק סמיך לבירא דאתגלי עלוי יקר חי וקיים דחמי ולא מתחמי
21:52neG ואילין תולדת ישמעאל בר אברהם דילידת הגר מצריתא אמתא דשרה לאברהם
31:52neG ואילין שמהת בני ישמעאל בשומהון לתולדתהון בוכרא דישמעאל נבט וערב ואדבאל ומבשם
41:52neG וצאיתא ושתוקא וסוברא
51:52neG חריפא ותימא יטור נפיש וקדמה
61:52neG אילין הינון בנוי דישמעאל ואילין שומהון בכופרניהון ובקסטרוותהון תריסר רברבין לאומתהון
71:52neG ואילין שני חיי ישמעאל מאה ותלתין ושבע שנין והדר בתייובא ואיתנגיד ואתכנש לעמיה
81:52neG ושרו מן הנדקי עד חלוצא דעל אנפי מצרים מעלך לאתור על אנפי כל אחוי שרא באחסנתיה
91:52neG ואילין תולדת יצחק בר אברהם ומן בגלל דהוה איקונין דיצחק מדמיין לאיקונין דאברהם הוון בני נשא אמרין בקושטא אברהם אוליד ית יצחק
02:52neG והוה יצחק בר ארבעין שנין במיסביה ית רבקה ברת בתואל ארמאה דמן פדן ארם אחתיה דלבן ארמאה ליה לאינתו
12:52neG ואזל יצחק לטוור פולחנא אתר דכפתיה אבוי והפך יצחק בצלותיה דעתיה ממה דגזר על אינתתיה ארום עקרא הוות גביה עשרין ותרתין שנין ואתהפיך בגיניה דעתיה ממה דגזר עליה דאף הוא הוה עקר ואתרווח ואיתעברת רבקה אינתתיה
22:52neG ואידחיקו בניא במעהא הי כגיברין עבדי קרבא ואמרת אם כדין הוא צערא דילידתא למה דין לי בנין ואזלת לבי מדרשא דשם רבא למבעי רחמין מן קדם ייי
32:52neG ואמר ייי לה תרין עממין במעייכי ותרין מלכוון ממעייכי יתפרשון ומלכ{ן}<ו> ממלכ{ן}<ו> יהי אלים ורבא יהוי משתעבד לזעירא אם בנוי דזעירא נטרין פיקודייא דאורייתא
42:52neG ושלימו מאתן ושובעין יומי עיבורהא למילד והא תיומין במעהא
52:52neG ונפק קמאה סמוקריי כוליה ככלן״כבילנ#2#״ דשער וקרו שמיה עשו מן בגלל דאתיליד כוליה גמיר בשיער רישא ודיקנא ושינין וככין
62:52neG ובתר כדין נפק אחוי וידיה אחידא בעקיבא דעשו וקרא שמיה יעקב ויצחק בר שיתין שנין כד ילידת יתהום
72:52neG ורביאו טליא והוה עשו גבר נחשירכן למיצוד עופן וחיוון גבר נפיק חקל קטיל נפשן דהוא קטל ית נמרוד וית חנוך בריה ויעקב{ו} גבר שלים בעובדוי משמש בבי מדרשא דעבר תבע אולפן מן קדם ייי
82:52neG ורחים יצחק ית עשו ארום מלי רמייותא בפומיה ורבקה רחימת ית יעקב
92:52neG ובההוא יומא דמית אברהם בשיל יעקב תבשילי דטלופחי ואזל לנחמא לאבוי ואתא עשו מן ברא והוא משלהי ארום חמש עבירן עבר בההוא יומא פלח פולחנא נוכראה שפך אדמא זכיא ועל על עולימתא מארשה וכפר בחיי עלמא דאתי ובזה ית בכירותא
03:52neG ואמר עשו ליעקב אטעם יתי כדון מן תבשילא סמוקא הדין ארום משלהי אנא בגין כן קרא שמיה אדום
13:52neG ואמר יעקב זבון יומנא כיום דאנת עתיד למחסן ית בכירותא לי
23:52neG ואמר עשו הא אנא אזיל לממת ולית אנא חיי תוב בעלם אוחרן ולמה דנן לי בכירותא וחולקא בעלמא דאת אמר
33:52neG ואמר יעקב קיים לי כיום דיהי וקיים ליה וזבין ית בכירותיה ליעקב
43:52neG ויעקב יהב לעשו לחם ותבשיל דטלופחי ואכל ושתי וקם ואזל ושט עשו ית בכירותא וחולק עלמא דאתי

next