The Comprehensive Aramaic Lexicon

10:82	ܒܿܪܡܫܐ ܕܿܝܢ ܒܿܫܒܿܬܼܐ܂ ܕܿܢܓܼܗ ܚܕܼ ܒܿܫܒܿܐ܃ ܐܬܼܬܼ ܡܪܝܡ ܡܓܼܕܿܠܝܬܿܐ܂ ܘܡܪܝܡ ܐ̱ܚܪܬܼܐ܂ ܕܿܢܚܙܝܢ̈ ܩܒܼܪܐ܂
20:82	ܘܗܐ ܙܘܥܐ ܪܒܿܐ ܗܘܐ܂ ܡܠܐܟܼܐ ܓܿܝܪ ܕܿܡܪܝܐ܂ ܢܚܬܼ ܡܢ ܫܡܝܐ܃ ܘܩܪܒܼ ܥܓܿܠ ܟܿܐܦܼܐ ܡܢ ܬܿܪܥܐ܂ ܘܝܬܼܒܼ ܗ̱ܘܐ ܥܠܝܗ܂
30:82	ܐܝܬܼܘܗ̱ܝ ܗ̱ܘܐ ܕܿܝܢ ܚܙܘܗ܂ ܐܝܟܼ ܒܿܪܩܐ܂ ܘܠܒܼܘܼܫܗ ܚܘܪ ܗ̱ܘܐ܂ ܐܝܟܼ ܬܿܠܓܿܐ܂
40:82	ܘܡܢ ܕܿܚܠܬܼܗ܂ ܐܬܿܬܿܙܝܥܘ ܐܝܠܝܢ ܕܿܢܛܪܝܢ ܗ̱ܘܘ܂ ܘܗܘܘ ܐܝܟܼ ܡܝܬܼܐ̈܀
50:82	ܥܢܐ ܕܿܝܢ ܡܠܐܟܼܐ܂ ܘܐܡܪ ܠܢܫܐ̈܂ ܐܢ̱ܬܿܝܢ ܠܐ ܬܿܕܼܚܠܢ̈܂ ܝܕܼܥ ܐ̱ܢܐ ܓܿܝܪ܂ ܕܿܠܝܫܘܼܥ ܕܿܐܙܕܿܩܦܼ܂ ܒܿܥܝܢ ܐܢ̱ܬܿܝܢ܂
60:82	ܠܐ ܗܘܐ ܬܿܢܢ܂ ܩܡ ܠܗ ܓܿܝܪ܂ ܐܝܟܿܢܐ ܕܿܐܡܪ܂ ܬܿܐܝܝܢ ܚܙܝܝܢ ܕܿܘܼܟܿܬܼܐ܂ ܕܿܣܝܡ ܗ̱ܘܐ ܒܿܗ ܡܪܢ܃
70:82	ܘܙܠܝܢ ܒܿܥܓܼܠ܂ ܐܡܪܝܢ ܠܬܼܠܡܝܕܼܘܗ̱ܝ̈܂ ܕܿܩܡ ܡܢ ܒܿܝܬܼ ܡܝܬܼܐ̈܃ ܘܗܐ ܩܕܼܡ ܠܟܼܘܼܢ܂ ܠܓܼܠܝܠܐ܃ ܬܿܡܢ ܬܿܚܙܘܼܢܝܗ̱ܝ܂ ܗܐ ܐܡܪܬܼ ܠܟܼܝܢ܀
80:82	ܘܐܙܠ ܥܓܼܠ ܡܢ ܩܒܼܪܐ܂ ܒܿܕܼܚܠܬܼܐ܂ ܘܒܼܚܕܼܘܼܬܼܐ ܪܒܿܬܼܐ܂ ܘܪܗܛܢ ܕܿܢܐܡܪܢ̈ ܠܬܼܠܡܝܕܼܘܗ̱ܝ̈܀
90:82	ܘܗܐ ܝܫܘܼܥ ܦܿܓܼܥ ܒܿܗܝܢ܂ ܘܐܡܪ ܠܗܝܢ܂ ܫܠܡ ܠܟܼܝܢ܂ ܗܢܝܢ ܕܿܝܢ ܩܪܒܼ܂ ܐܚܕܼ ܪܓܼܠܘܗ̱ܝ̈܂ ܘܣܓܼܕܼܝܢ ܠܗ܀
01:82	ܗܝܕܿܝܢ ܐܡܪ ܠܗܝܢ ܝܫܘܼܥ܂ ܠܐ ܬܿܕܼܚܠܢ܂ ܐܠܐ ܙܠܝܢ ܐܡܪܝܢ ܠܐܚܝ̈܃ ܕܿܢܐܙܠ̱ܘܢ ܠܓܼܠܝܠܐ܂ ܘܬܼܡܢ ܢܚܙܘܼܢܢܝ܀
11:82	ܟܿܕܼ ܐܙܠܝܢ̈ ܕܿܝܢ܃ ܐܬܼܘ ܐ̱ܢܫܐ̈ ܡܢ ܩܣܛܘܼܢܪܐ̈ ܗܢܘܼܢ ܠܡܕܼܝܢ̱ܬܿܐ܃ ܘܐܡܪܘ ܠܪܒܿܝ̈ ܟܿܗܢܐ̈ ܟܿܠ ܡܕܿܡ ܕܿܗܘܐ܂
21:82	ܘܐܬܼܟܿܢܫܘ ܥܡ ܩܫܝܫܐ̈܂ ܘܢܣܒܼܘ ܡܠܟܿܐ܂ ܘܝܗ̱ܒܼܘ ܟܿܣܦܿܐ ܠܐ ܙܥܘܼܪ ܠܩܣܛܘܼܢܪܐ̈܂
31:82	ܘܐܡܪܝܢ ܠܗܘܼܢ܂ ܐܡܪܘ܃ ܕܿܬܼܠܡܝܕܼܘܗ̱ܝ̈ ܐܬܼܘ ܓܿܢܒܿܘܼܗ̱ܝ ܒܿܠܠܝܐ܂ ܟܿܕܼ ܕܿܡܟܿܝܢ ܚ̱ܢܢ܂
41:82	ܘܐܢ ܐܫܬܿܡܥܬܼ ܗܕܼܐ ܩܕܼܡ ܗܓܼܡܘܼܢܐ܃ ܚܢܢ ܡܦܿܝܣܝܢ ܚ̱ܢܢ ܠܗ܂ ܘܠܟܼܘܼܢ܂ ܕܿܠܐ ܨܦܼܬܼܐ ܥܒܼܕܿܝܢ ܚ̱ܢܢ܂
51:82	ܗܢܘܼܢ ܕܿܝܢ ܟܿܕܼ ܢܣܒܼܘ ܟܿܣܦܿܐ܂ ܥܒܼܕܼܘ ܐܝܟܼ ܕܿܐܠܦܼܘ ܐܢܘܼܢ܂ ܘܢܦܼܩܬܼ ܡܠܬܼܐ ܗܕܼܐ ܒܿܝܬܼ ܝܗܘܼܕܼܝܐ̈܂ ܥܕܼܡܐ ܠܝܘܡܢܐ܀܀
61:82	ܬܿܠܡܝܕܼܐ̈ ܕܿܝܢ ܚܕܼܥܣܪ܂ ܐܙܠܘ ܠܓܼܠܝܠܐ ܠܛܘܼܪܐ܂ ܐܝܟܿܐ ܕܿܘܥܕܼ ܐܢܘܼܢ ܝܫܘܼܥ܂
71:82	ܘܟܼܕܼ ܚܙܐܘܗ̱ܝ܂ ܣܓܼܕܼܘ ܠܗ܂ ܡܢܗܘܼܢ ܕܿܝܢ ܐܬܼܦܿܠܓܼܘ ܗ̱ܘܘ܂
81:82	ܘܩܪܒܼ ܝܫܘܼܥ܂ ܡܠܠ ܥܡܗܘܼܢ܂ ܘܐܡܪ ܠܗܘܼܢ܂ ܐܬܼܝܗܒܼ ܠܝ ܟܿܠ ܫܘܼܠܛܢ܂ ܒܿܫܡܝܐ ܘܒܼܐܪܥܐ܂ ܘܐܝܟܿܢܐ ܕܿܫܕܿܪܢܝ ܐܒܼܝ܂ ܡܫܕܿܪ ܐ̱ܢܐ ܠܟܼܘܼܢ܀
91:82	ܙܠܘ ܗܟܼܝܠ ܬܿܠܡܕܼܘ܂ ܟܿܠܗܘܼܢ ܥܡ̱ܡܐ̈܂ ܘܐܥܡܕܼܘ ܐܢܘܼܢ܂ ܒܿܫܡ ܐܒܼܐ ܘܒܼܪܐ܂ ܘܪܘܼܚܐ ܕܿܩܘܼܕܼܫܐ܂
02:82	ܘܐܠܦܼܘ ܐܢܘܼܢ܂ ܕܿܢܛܪܘܼܢ ܟܿܠ ܡܐ ܕܿܦܼܩܕܿܬܿܟܼܘܼܢ܂ ܘܗܐ ܐܢܐ ܥܡܟܼܘܼܢ ܐ̱ܢܐ ܟܿܠܗܘܼܢ ܝܘܡܬܼܐ̈܂ ܥܕܼܡܐ ܠܫܘܼܠܡܗ ܕܿܥܠܡܐ܂ ܐܡܝܢ