The Comprehensive Aramaic Lexicon

10:60	ܒܬܪ ܗܠܝܢ܂ ܐܙܠ ܝܫܘܥ ܠܥܒܪܐ ܕܝܡܬܐ ܕܓܠܝܠܐ ܕܛܒܪܝܘܣ܂
20:60	ܘܐܙܠ ܒܬܪܗ ܟܢܫܐ ܣܓܝܐܐ܂ ܡܛܠ ܕܚܙܝܢ ܗܘܘ ܐ̈ܬܘܬܐ ܕܥܒܕ ܗܘܐ ܥܠ ܟܪܝ̈ܗܐ܂
30:60	ܘܣܠܩ ܗܘܐ ܝܫܘܥ ܠܛܘܪܐ܂ ܘܬܡܢ ܝܬܒ ܗܘܐ ܥܡ ܬܠܡ̈ܝܕܘܗܝ܂
40:60	ܘܩܪܝܒܐ ܗܘܬ ܦܣܟ ܥܕܥܕܐ ܕܝܗ̈ܘܕܝܐ܂
50:60	ܘܐܪܝܡ ܥܝ̈ܢܘܗܝ ܝܫܘܥ ܘܚܙܐ ܟܢ̈ܫܐ ܣܓ̈ܝܐܐ ܕܐܬܝܢ ܠܘܬܗ܂ ܘܐܡܪ ܠܦܝܠܝܦܘܣ ܐܝܡܟܐ ܢܙܒܢ ܠܚܡܐ ܕܢܐܟܠܘܢ ܗܠܝܢ ܐܢܫܐ܂
60:60	ܗܘ ܕܝܢ ܐܝܟ ܡܢܣܐ ܠܗ ܫܐܠܗ܂ ܗܘ ܓܝܪ ܝܕܥ ܗܘܐ ܡܢܐ ܥܬܝܕ ܠܡܥܒܕ܂
70:60	ܐܡܪ ܠܗ ܦܝܠܝܦܘܣ܂ ܕܡ̈ܐܬܝܢ ܕܝ̈ܢܪܝܢ ܠܚܡܐ ܠܐ ܣܦܩ ܠܗܘܢ ܟܕ ܩܠܝܠ ܩܠܝܠ ܢܐܟܠܘܢ܂
80:60	ܐܡܪ ܠܗ ܚܕ ܡܢ ܬܠܡ̈ܝܕܘܗܝ܂ ܐܢܕܪܝܘܣ ܫܡܗ ܗܘܐ܂ ܐܚܘܗܝ ܕܫܡܥܘܢ ܟܐܦܐ܂
90:60	ܐܝܬ ܬܢܢ ܛܠܝܐ ܘܐܝܬ ܥܠܘܗܝ ܚܡ̈ܫ ܓܪ̈ܝܨܢ ܕܣ̈ܥܪܐ܂ ܘܬ̈ܪܝܢ ܢܘ̈ܢܝܢ܂ ܐܠܐ ܗܠܝܢ ܡܢܐ ܥܒ̈ܕܢ ܠܗܠܝܢ ܟܠܗܘܢ܂
01:60	ܐܡܪ ܗܘ ܝܫܘܥ܂ ܙܠܘ ܐܣܡܟܘ ܐܢܘܢ ܠܐܢ̈ܫܐ ܣܡ̈ܟܝܢ ܣܡ̈ܟܝܢ܂ ܥܣܒܐ ܕܝܢ ܣܓܝ ܗܘܐ ܒܗܿ ܒܕܘܟܬܐ ܗܝ܂ ܘܐܣܬܡܟܘ ܐܢܫܐ ܡܢܝܢܐ ܚܡ̈ܫܐ ܐ̈ܠܦܝܢ܂
11:60	ܘܫܩܠ ܝܫܘܥ ܠܚ̈ܡܐ ܗܢܘܢ ܘܒܪܟ܂ ܘܝܗܒ ܠܗܢܘܢ ܕܣܡܝܟܝܢ܂ ܘܗܟܢܐ ܘܐܦ ܥܠ ܢܘ̈ܢܐ ܟܡܐ ܕܨܒܘ܂
21:60	ܘܟܕ ܣܒܥܘ ܐܡܪ ܠܬܠܡ̈ܝܕܘܗܝ܂ ܟܢܫܘ ܩܨ̈ܝܐ ܡܕܡ ܕܝܬܪܘ܂ ܕܠܓܡܪ ܡܕܡ ܠܐ ܢܐܒܕ܂
31:60	ܘܟܢܫܘ ܘܡܠܘ ܬܪܥ̈ܣܪ ܩܘ̈ܦܝܢܝܢ ܕܩ̈ܨܝܐ܂ ܡܢ ܚܡ̈ܫܐ ܠܚ̈ܡܝܢ ܕܣ̈ܥܪܐ܂ ܡܕܡ ܕܝܬܪܘ ܡܢ ܗܢܘܢ ܕܐܟܠܘ
41:60	ܗܢܘܢ ܕܝܢ ܐܢܫܐ ܟܕ ܚܙܘ ܐܬܐ ܗܕܐ ܕܥܒܕ܂ ܐܡܪܝܢ ܗܘܘ܂ ܫܪܝܪܐܝܬ ܗܢܐ ܗܘ ܢܒܝܐ ܕܐܬܐ ܠܥܠܡܐ܂
51:60	ܘܝܕܥ ܗܘܐ ܝܫܘܥ ܕܒܥܝܢ ܗܘܘ ܕܢܚܛܦܘܢܗ ܘܢܥܒܕܘܢܗ ܡܠܟܐ܂ ܫܒܩ ܐܢܘܢ ܘܥܪܩ ܠܗ ܬܘܒ ܠܛܘܪܐ ܒܠܚܘܕܘܗܝ܂
61:60	ܟܕ ܗܘܐ ܕܝܢ ܪܡܫܐ܂ ܢܚܬܘ ܗܘܘ ܬ̈ܠܡܝܕܘܗܝ ܠܝܡܐ܂
71:60	ܘܝܬܒܘ ܒܣܦܝܢܬܐ܂ ܘܐܬܝܢ ܗܘܘ ܠܥܒܪܐ ܕܝܡܬܐ ܕܟܦܪܢܚܘܡ܂ ܘܚܫܟܬ ܗܘܬ ܠܗܿ܂ ܘܠܐ ܐܬܐ ܠܘܬܗܘܢ ܝܫܘܥ܂
81:60	ܘܪܘܚܐ ܩܡܬ ܗܘܬ ܠܗܿ ܥܙܝܙܐܝܬ܂ ܘܐܫܬܓܫܬ ܥܠܝܗܘܢ ܝܡܬܐ܂
91:60	ܘܕܒܪܘܗܿ ܗܘܘ ܠܣܦܝܢܬܐ ܐܣ̈ܛܕܘܬܐ ܥ̈ܣܪܝܢ ܘܚܡܫܐ ܐܘ ܬܠܬܝܢ܂ ܘܚܙܘ ܠܝܫܘܥ ܟܕ ܡܗܠܟ ܥܠ ܡ̈ܝܐ܂ ܘܟܕ ܩܪܒ ܠܘܬ ܣܦܝܢܬܐ܂ ܕܚܠܘ܂
02:60	ܗܘ ܕܝܢ ܝܫܘܥ ܐܡܪ ܠܗܘܢ ܐܢܐ ܐܢܐ܂
12:60	ܘܨܒܝܢ ܗܘܘ ܕܢܩܒܠܘܢܗ ܒܣܦܝܢܬܐ܂ ܘܒܗܿ ܒܫܥܬܐ ܗܝ ܣܦܝܢܬܐ ܩܪܒܬ ܗܘܬ ܠܘܬ ܐܪܥܐ܂ ܗܝ ܕܐܙܠܝܢ ܗܘܘ ܠܗܿ܀
22:60	ܘܠܝܘܡܐ ܐܚܪܢܐ ܗܘ ܟܢܫܐ ܕܒܥܒܪܐ ܗܘܐ ܕܝܡܬܐ܂ ܕܚܙܐ ܕܣܦܝܢܬܐ ܐܚܪܬܐ ܠܝܬ ܗܘܐ ܬܡܢ܂ ܐܠܐ ܐܢ ܚܕܐ ܕܥܒܪܘ ܒܗܿ ܬܠܡ̈ܝܕܘܗܝ ܕܝܫܘܥ܂ ܘܝܫܘܥ ܠܐ ܗܘܐ ܥܡ ܬܠܡ̈ܝܕܘܗܝ ܗܘܐ ܒܣܦܝܢܬܐ܂
32:60	ܘܟܕ ܐܬܝ ܣ̈ܦܝܢܐ ܐ̈ܚܪܢܝܬܐ ܡܢ ܛܒܪܝܘܣ ܠܐܬܪ ܕܐܟܠܘ ܠܚܡܐ܂
42:60	ܘܚܙܘ ܕܠܐ ܗܘܐ ܬܡܢ ܝܫܘܥ ܘܐܦ ܠܐ ܬܠܡ̈ܝܕܘܗܝ܂ ܢܚܬܘ ܠܗܘܢ ܠܣܦܝܢܬܐ܂ ܘܐܬܘ ܗܘܘ ܠܟܦܪܢܚܘܡ ܘܒܥܝܢ ܗܘܘ ܠܗ ܠܝܫܘܥ܂
52:60	ܘܟܕ ܕܝܢ ܐܫܟܚܘܗܝ ܒܥܒܪܐ ܕܝܡܬܐ܂ ܐܡܪܝܢ ܠܗ ܪܒܢ ܐܡܬܝ ܐܬܝܬ ܠܟܐ܂
62:60	ܐܡܪ ܠܗܘܢ ܝܫܘܥ܂ ܐܡܝܢ ܐܡܝܢ ܐܡܪܢܐ ܠܟܘܢ܂ ܕܠܐ ܗܘܐ ܡܛܠ ܕܚܙܝܬܘܢ ܐ̈ܬܘܬܐ ܒܥܝܬܘܢܢܝ܂ ܐܠܐ ܡܛܠ ܕܐܟܠܬܘܢ ܠܚܡܐ ܘܣܒܥܬܘܢ܂
72:60	ܠܐ ܬܦܠܚܘܢ ܡܟܘܠܬܐ ܕܐܒܕܐ܂ ܐܠܐ ܦܠܘܚܘ ܡܐܟܘܠܬܐ ܕܡܩܘܝܐ ܠܚ̈ܝܐ ܕܠܥܠܡ܂ ܐܝܕܐ ܕܒܪܗ ܕܐܢܫܐ ܝܗܒ ܠܟܘܢ܂ ܠܗܢܐ ܓܝܪ ܚܬܡ ܐܠܗܐ ܐܒܐ܂
82:60	ܐܡܪܝܢ ܠܗ ܡܢܐ ܢܥܒܕ ܕܢܦܠܘܚ ܥܒ̈ܕܐ ܕܐܠܗܐ܂
92:60	ܐܡܪ ܠܗܘܢ ܝܫܘܥ܂ ܗܢܐ ܗܘ ܥܒܕܐ ܕܐܠܗܐ܂ ܕܬܗܝܡܢܘܢ ܒܡܢ ܕܫܕܪ ܗܘ܂
03:60	ܐܡܪܝܢ ܠܗ ܡܢܐ ܗܟܝܠ ܐܬܐ ܥܒܕ ܐܢܬ ܕܢܚܙܐ ܘܢܗܝܡܢ ܒܟ ܡܢܐ ܦܠܚ ܐܢܬ
13:60	ܐܒ̈ܗܝܢ ܡܢܢܐ ܐܟܠܘ ܒܡܕܒܪܐ ܐܝܟ ܕܟܬܝܒ ܕܠܚܡܐ ܡܢ ܫܡܝܐ ܝܗܒ ܠܗܘܢ ܠܡܐܟܠ
23:60	ܐܡܪ ܠܗܘܢ ܝܫܘܥ ܐܡܝܢ ܐܡܝܢ ܐܡܪܢܐ ܠܟܘܢ ܕܠܐ ܗܘܐ ܡܘܫܐ ܝܗܒ ܠܟܘܢ ܠܚܡܐ ܡܢ ܫܡܝܐ ܐܠܐ ܐܒܐ ܢܬܠ ܠܟܘܢ ܠܚܡܐ ܕܩܘܫܬܐ ܡܢ ܫܡܝܐ
33:60	ܠܚܡܗ ܓܝܪ ܕܐܠܗܐ ܢܚܬ ܡܢ ܫܡܝܐ ܘܚܝ ܗܘ ܘܡܬܝܗܒ ܠܥܠܡܐ
43:60	ܐܡܪܝܢ ܠܗ ܡܪܢ ܒܟܠ ܙܒܢ ܗܒ ܠܢ ܠܚܡܐ ܗܢܐ
53:60	ܐܡܪ ܠܗܘܢ ܝܫܘܥ ܐܢܐ ܐܢܐ ܠܚܡܐ ܕܚ̈ܝܐ ܡܢܘ ܕܐܬܐ ܠܘܬܝ ܠܐ ܢܟܦܢ ܘܡܢ ܕܡܗܝܡܢ ܒܝ ܠܐ ܢܨܗܐ ܡܡܬܘܡ
63:60	ܐܠܐ ܐܡܪܬ ܠܟܘܢ ܕܚܙܝܢ ܐܢܬܘܢ ܘܠܐ ܡܗܝܡܢܝܢ ܐܢܬܘܢ
73:60	ܟܠ ܡܢ ܕܝܗܒ ܠܝ ܐܒܝ ܠܘܬܝ ܢܐܬܐ ܘܡܢ ܕܠܘܬܝ ܢܐܬܐ ܠܐ ܐܦܩܝܘܗܝ
83:60	ܕܢܚܬܬ ܡܢ ܫܡܝܐ ܠܐ ܗܘܐ ܕܐܥܒܕ ܨܒܝܢܝ ܐܠܐ ܕܐܥܒܕ ܨܒܝܢܗ ܕܐܒܐ ܕܫܕܪܢܝ
93:60	ܗܢܘ ܕܝܢ ܨܒܝܢܗ ܕܡܢ ܕܫܕܪܢܝ ܕܟܠ ܡܕܡ ܕܝܗܒ ܠܝ ܠܐ ܐܘܒܕ ܡܢܗ ܡܕܡ ܐܠܐ ܐܩܝܡܝܘܗܝ ܒܝܘܡܐ ܐܚܪܝܐ
04:60	ܗܢܘ ܓܝܪ ܨܒܝܢܗ ܕܐܒܝ ܕܟܠ ܐܢܫ ܕܚܙܐ ܠܒܪܐ ܘܡܗܝܡܢ ܒܗ ܐܝܬ ܠܗ ܚܝ̈ܐ ܕܠܥܠܡ ܘܐܢܐ ܐܩܝܡܝܘܗܝ ܒܝܘܡܐ ܐܚܪܝܐ
14:60	ܝܗ̈ܘܕܝܐ ܕܝܢ ܪܛܢܝܢ ܗܘܘ ܥܠܘܗܝ ܕܐܡܪ ܕܐܢܐ ܐܢܐ ܠܚܡܐ ܕܢܚܬ ܡܢ ܫܡܝܐ
24:60	ܘܐܡܪܝܢ ܗܘܘ ܠܐ ܗܘܐ ܗܢܐ ܝܫܘܥ ܒܪܗ ܕܝܘܣܦ ܘܐܢܚܢܢ ܝܕܥܝܢ ܐܢܚܢܢ ܠܐܒܘܗܝ ܐܝܟܢܐ ܐܡܪ ܕܐܢܐ ܡܢ ܫܡܝܐ ܢܚܬܬ
34:60	ܐܡܪ ܠܗܘܢ ܝܫܘܥ ܠܐ ܬܪܛܢܘܢ ܚܕ ܥܡ ܚܕ
44:60	ܠܐ ܓܝܪ ܐܢܫ ܡܫܟܚ ܕܢܐܬܐ ܠܘܬܝ ܐܠܐ ܐܝܢܐ ܕܢܓܕ ܠܗ ܐܒܐ ܕܫܕܪܢܝ ܘܐܢܐ ܐܩܝܡܝܘܗܝ ܒܝܘܡܐ ܐܚܪܝܐ
54:60	ܟܬܝܒ ܓܝܪ ܒܢܒܝܐ ܕܢܗܘܘܢ ܟܠܗܘܢ ܡ̈ܠܦܐ ܕܐܠܗܐ ܟܘܠ ܡܢܗ ܕܫܡܥ ܗܟܝܠ ܡܢ ܐܒܐ ܘܝܠܦ܂ ܐܬܐ ܠܘܬܝ
64:60	ܠܐ ܗܘܐ ܡܛܠ ܕܚܙܐ ܐܢܫ ܠܐܒܐ ܐܠܐ ܡܢ ܕܠܘܬ ܐܠܗܐ ܐܝܬܘܗܝ ܗܘ ܗܘ ܚܙܐ ܠܐܒܐ
74:60	ܐܡܝܢ ܐܡܝܢ ܐܡܪܢܐ ܠܟܘܢ ܕܟܠ ܡܢ ܕܡܗܝܡܢ ܠܐܠܗܐ ܐܝܬ ܠܗ ܚ̈ܝܐ ܕܠܥܠܡ
84:60	ܐܢܐ ܐܢܐ ܠܚܡܐ ܕܚ̈ܝܐ܂ ܕܢܚܬ ܡܢ ܫܡܝܐ
94:60	ܐܒ̈ܗܝܟܘܢ ܐܟܠܘ ܠܚܡܐ ܒܡܕܒܪܐ ܘܡܝܬܘ
05:60	ܗܢܘ ܕܝܢ ܠܚܡܐ ܕܢܚܬ ܡܢ ܫܡܝܐ ܕܢܐܟܘܠ ܐܢܫ ܡܢܗ ܘܢܡܘܬ
15:60	ܐܢܐ ܐܢܐ ܠܚܡܐ ܚܝܐ ܕܢܚܬ ܡܢ ܫܡܝܐ ܕܡܢ ܕܢܐܟܘܠ ܡܢ ܠܚܡܐ ܗܢܐ ܢܚܐ ܠܥܠܡ ܘܠܚܡܐ ܐܝܢܐ ܕܐܢܐ ܐܬܠ ܦܓܪܝ ܗܘ ܕܥܠ ܐ̈ܦܝ ܚܝ̈ܘܗܝ ܕܥܠܡܐ܀
25:60	ܘܢܨܝܢ ܗܘܘ ܝܗ̈ܘܕܝܐ ܚܕ ܥܡ ܚܕ ܘܐܡܪܝܢ ܗܘܘ ܐܝܟܢܐ ܡܫܟܚ ܗܢܐ ܕܢܬܠ ܠܢ ܦܓܪܗ ܠܡܐܟܠ
35:60	ܐܡܪ ܠܗܘܢ ܝܫܘܥ ܐܡܝܢ ܐܡܝܢ ܐܡܪ ܐܢܐ ܠܟܘܢ܂ ܕܐܠܐ ܬܐܟܠܘܢ ܦܓܪܗ ܕܒܪܗ ܕܐܢܫܐ ܘܬܫܬܘܢ ܕܡܗ܂ ܠܝܬ ܠܟܘܢ ܚ̈ܝܐ ܒܟܘܢ܂
45:60	ܘܡܢ ܕܐܟܠ ܦܓܪܝ ܘܫܬܐ ܕܡܝ ܐܝܬ ܠܗ ܚ̈ܝܐ ܕܠܥܠܡ܂ ܘܐܢܐ ܐܩܝܡܝܘܗܝ ܒܝܘܡܐ ܐܚܪܝܐ܂
55:60	ܦܓܪܝ ܫܪܝܪܐܝܬ ܡܟܘܠܬܐ ܗܘ܂ ܘܕܡܝ ܫܪܝܪܐܝܬ ܡܫܬܝܐ ܗܘ܂
65:60	ܡܢܘ ܕܐܟܠ ܦܓܪܝ ܘܫܬܐ ܕܡܝ ܒܝ ܡܩܘܐ ܘܐܢܐ ܒܗ܂
75:60	ܐܝܟܢܐ ܕܫܕܪܢܝ ܐܒܐ ܚܝܐ܂ ܘܐܢܐ ܚܝ ܡܛܠ ܐܒܐ܂ ܡܢ ܕܢܐܟܠܢܝ ܢܗܘܐ ܚܝ ܡܛܘܠܬܝ܂
85:60	ܗܢܐ ܗܘ ܠܚܡܐ ܕܢܚܬ ܡܢ ܫܡܝܐ܂ ܠܐ ܗܘܐ ܐܝܟ ܗܘ ܕܐܟܠܘ ܐܒ̈ܗܝܟܘܢ ܘܡܝܬܘ܂ ܡܢܘ ܕܡܢ ܗܢܐ ܠܚܡܐ ܢܐܟܘܠ ܢܚܐ ܠܥܠܡ܂
95:60	ܗܠܝܢ ܐܡܪ ܒܟܢܘܫܬܐ܂ ܟܕ ܡܠܦ ܒܟܦܪܢܚܘܡ܂
06:60	ܘܣ̈ܓܝܐܐ ܡܢ ܬܠܡ̈ܝܕܘܗܝ ܟܕ ܫܡܥܘ܂ ܐܡܪܝܢ ܗܘܘ ܩܫܝܐ ܗܝ ܡܠܬܐ ܗܕܐ܂ ܡܢܘ ܡܫܟܚ ܠܡܫܡܥܗܿ܂
16:60	ܝܫܘܥ ܕܝܢ ܟܕ ܝܕܥ ܕܪܛܢܝܢ ܬܠܡ̈ܝܕܘܗܝ ܥܠ ܗܕܐ܂ ܐܡܪ ܠܗܘܢ ܗܕܐ ܡܟܫܠܐ ܠܟܘܢ܂
26:60	ܐܢ ܕܝܢ ܬܚܙܘܢܝܗܝ ܠܒܪܗ ܕܐܢܫܐ ܟܕ ܣܠܩ ܠܐܬܪ ܕܐܝܬܘܗܝ ܗܘܐ ܡܢ ܩܕܝܡ܂
36:60	ܪܘܚܐ ܗܝ ܕܡܚܝܐ ܐܘ ܦܓܪܐ ܠܐ ܡܕܡ ܐܗܢܝ܂ ܡ̈ܠܐ ܕܐܢܐ ܡܠܠܬ ܥܡܟܘܢ ܪܘܚܐ ܐܢܝܢ ܘܚ̈ܝܐ ܐܢܝܢ܂
46:60	ܐܠܐ ܐܝܬ ܡܢܟܘܢ ܐܝܠܝܢ ܕܠܐ ܡܗܝܡܢܝܢ܂ ܝܕܥ ܗܘܐ ܓܝܪ ܝܫܘܥ ܡܢ ܩܕܝܡ ܡܢ ܕܡܫܠܡ ܠܗ܂
56:60	ܐܡܪ ܠܗܘܢ ܡܛܠ ܗܢܐ ܐܡܪܬ ܠܟܘܢ܂ ܕܠܐ ܐܢܫ ܡܫܟܚ ܕܢܐܬܐ ܠܘܬܝ ܐܠܐ ܐܢ ܝܗܝܒ ܠܗ ܡܢ ܐܒܐ܂
66:60	ܡܛܠ ܗܕܐ ܣܓ̈ܝܐܐ ܡܢ ܬܠܡ̈ܝܕܘܗܝ ܐܙܠܘ ܠܗܘܢ ܡܢ ܠܘܬܗ܂ ܘܠܐ ܡܗܠܟܝܢ ܗܘܘ ܥܡܗ܂
76:60	ܐܡܪ ܝܫܘܥ ܠܬܪ̈ܥܣܪܬܗ܂ ܕܠܡܐ ܘܐܦ ܐܢܬܘܢ ܨܒܝܢ ܐܢܬܘܢ ܠܡܐܙܠ ܠܟܘܢ܂
86:60	ܐܡܪ ܠܗ ܫܡܥܘܢ ܟܐܦܐ܂ ܡܪܝ ܠܘܬ ܡܢ ܢܐܙܠ܂ ܡܠܬܐ ܕܚ̈ܝܐ ܕܠܥܠܡ ܐܝܬ ܠܟ܂
96:60	ܘܚܢܢ ܗܝܡܢܢ ܘܝܕܥܢ ܕܐܢܬ ܗܘ ܒܪܗ ܕܐܠܗܐ܂
07:60	ܐܡܪ ܠܗܘܢ ܝܫܘܥ܂ ܠܐ ܗܘܐ ܐܢܐ ܓܒܝܬܟܘܢ ܠܟܠܟܘܢ܂ ܘܗܐ ܐܦ ܡܢܟܘܢ ܚܕ ܣܛܢܐ ܗܘ܂
17:60	ܐܡܪ ܗܘܐ ܕܝܢ ܥܠ ܝܗܘܕܐ ܒܪ ܫܡܥܘܢ ܐܣܩܪܝܘܛܐ܂ ܗܘܝܘ ܓܝܪ ܥܬܝܕ ܗܘܐ ܠܡܫܠܡܘܬܗ ܚܕ ܡܢ ܬܪ̈ܥܣܪ܀

next chapter