H The Comprehensive Aramaic Lexicon

CAL CODE HELP CLICK HERE
click on the file description for more information

54001: TN Gen chapter 37

click on a word for lexical analysis
Click on a red-colored coordinate for comments and/or translations of the line

previous


10:73 1 ושרא יעקב בארעא תותבותיה דאבוי בארעא דכנען׃
20:73 1 אלין ייחוס תולדותיה דיעקב יוסף בר שבע עשרה שנה הוה רעי עם אחוי בענה והוא הוה טלי מתרבי עם בנוי דבלהה ועם בנוי דזלפה נשוי דאבוי ואייתי יוסף ית טבהון דאחוי ביש לוות אבוהון׃
30:73 1 וישראל הוה רחים ית יוסף מן כל בנוי ארום בר סיבו הוה ליה ועביד לי פרגוד מצייר׃
40:73 1 וחמון אחוי ארום יתיה הוה רחים אבוהון מן כל אחוי וסנין יתיה ולא יכלין לממללה עמיה מלין דשלם׃
50:73 1 וחלם יוסף חלם ותני לאחוי ואוסיפו תוב למ<<י>>סני׃
60:73 1 ואמר להון שמעו כען חלמא הדין די חלמית׃
70:73 1 והא אנחנא מכרכין כורכוון בגו חקלא והא קמת כורכותי ולחוד אזדקפת והא מתכנשין כורכותכון ושאלו בשלמה דכורכוותי׃
80:73 1 ואמרין ליה אחוי הא ממלך תמלך עלנא אן משלט תשלט בן ואוספו תוב משנא יתיה על חלמוי ועל מלוי׃
90:73 1 וחלם תוב זמן תניינות ותני יתיה לאחוי ואמר הא חלמת חלם תוב והא שמשא וזהרא וחד עשר כוכבין שאלין בשלמיי׃
01:73 1 ותני לאבוי ולאחוי ו{ט}<נז>ף בה אבוי ואמר ליה מה חלמא הדין די חלמת הא מייתי ניתי אנא ואמך ואחך למשאל בשלמך בנימוס ארעא׃
11:73 1 וקנון ביה אחוי ואבוי הוי מנטר ית פתגמא׃
21:73 1 ואזלון אחוי למרע ית ענא דאבוהון בשכם׃
31:73 1 ואמר ישראל ליוסף הלא אחיך רעין בשכם אתא ואשלח יתך לוותהון ואמר ליה הא אנא׃
41:73 1 ואמר לו אזל כען וחמי ית שלמיהון דאחיך וית שלמא דענא ואתיב יתי פתגם ושלח יתיה מן מישרא דחברון ואתא לשכם׃
51:73 1 וארע יתיה מלאך בדמות גבר והא הוא טעי בחקלא ושאל יתיה גברא למימר מה את בעי׃
61:73 1 ואמר ית אחי אנא בעי תני לי כען אן אנון רען׃
71:73 1 ואמר גברא נטלו מן הכא ארום שמעת יתהון אמרין ניזיל לדותינה ואזל יוסף בתר אחוי וארע יתהון בדתן׃
81:73 1 וחמון יתיה מרחיק וקדם עד לא קרב לוותהון ואתחשבו עלוי למקטליה׃
91:73 1 ואמרין גבר לאחוי הא מרי חלמיא האלין אתי׃
02:73 1 וכדון אתו ונקטול יתיה ונטלק יתיה בחד מן גוביא ונימר חיוותא בשתא אכלת יתיה ונחמי מה יהווי בסופהון דחלמוי׃
12:73 1 ושמע ראובן ושזיב יתיה מן ידיהון ואמר לא נקטול יתיה ונתחייב בנפשיה׃
22:73 1 ואמר להון ראובן לא תשפכון אדם זכיי טלקו יתיה לגובא הדין די במדברא וידא דקטולין לא תפש<ט>ון ביה מן בגלל למשיזבא יתיה מן ידיהון למחזרה יתיה לוות אבוי׃
32:73 1 והוה כד אתא יוסף לוות אחוי ואשלחו ית פרגודא מציירה די עלוי׃
42:73 1 ונסבו יתיה וטלקו לגובא וגובא הווה ריק<<ן>> לית ביה מיין׃
52:73 1 ויתבו למיכל לחם ונטלו עייניה<<ו>>ן וחמון והא סיעא דסרקין דסרקע<<ין>> אתיא מן גלעדה וגמלהון טעונין שעווה וקטף ולטום אזלין לנחתה למצרים׃
62:73 1 ואמר יהודה לאחוי מה ממון אנן מתהניין ארום נקטול ית אחונן ונכסי ית אדמיה׃
72:73 1 אתו ונזבן יתיה לסרקעין וידינן לא נפשט ביה ארום אחונן קרב בשרן הוא ושמען ליה אחוי׃
82:73 1 ועברו גברין מדיינין תגרין ודלון ואפקון ית יוסף מן גובא וזבנא ית יוסף לסרקעין בעשרין סלעין דכסף ואובילו ית יוסף מצרימה׃
92:73 1 וחזר ראובן לגובא והא לית יוסף בגו גובא ובזע ית לבושוי׃
03:73 1 וחזר לוות אחוי ואמר טליא לית אנה ידע לאן אנה הכא ואנה לית אנה ידע לאן אנה אזל׃
13:73 1 ונסב<<ו>> ית פרגודא דיוסף ונכסו צפיר בר עזין וצבעו ית פרגודה באדמה׃
23:73 1 ושלחו ית פרגודה מציירה דיוסף ואייתון לוות אבוהון ואמרין דא אשכחנן חכם כען אן פרגודה דבריך היא אי לא׃
33:73 1 וחכם יתה ואמר הדא פרגודא דברי חיוה בישא אכלת יתה קטולין אתקטל יוסף׃
43:73 1 ובזע יעקב לבושוי ושוי שקא תחתוי ואתאבל על בריה יומין סגין׃
53:73 1 <וקמו> כל בנוי וכל בנתיה למנחמה יתיה וסרב למתנחמה ואמר ארום אחות על ברי לשאולה ובכה יתיה אבוי׃
63:73 1 ומדייניי זבינו יתיה למצראי לפוטיפר שליטא דפרעה רב ספקליטוריה׃

next