The Comprehensive Aramaic Lexicon

(1) 10:36	\מַן אְמַר אִלֵין ״#2#״ עְתִיד לְאֵיתָאָה מַחָא עַל אְדוֹם פוֹרעָנָא תַקִיפָא עַל בָצרָה לְמַעְבַד פוֹרעָנוּת דִין עַמֵיה כְמָא דְקַיֵים לְהוֹן בְמֵימְרֵיה אְמַר הָאְנָא מִתגְלֵי כְמָא דְמַלֵילִית בְזָכוּ סַגִי קְֹדָמַי חֵיל לְמִפרַק׃
(1) 20:36	מָדֵין יִסמְקוּן טוּרִין מִדַם קְטִילִין וֻמֵישְרִין יְפִיקוּן כַחְמַר בְמַעצְרָא׃
(1) 30:36	הָא כִבעוֹט דְמִתבְעֵיט בְמַעצְרָא כֵין יִסגֵי קְטוֹל בְמַשרְיָת עַמְמַיָא וְלָא יְהֵי לְהוֹן תְקוֹף קְֹדָמַי וַאְקַטֵילִנוּן בְרוּגזִי וַאְדוֹשְשִינוּן בְחִמתִי וְאַתבַר תְקוֹף תַקִיפֵיהוֹן קְֹדָמַי וְכָל חַכִימֵיהוֹן אְסַלעֵים׃
(1) 40:36	אְרֵי יוֹם פוֹרעָנוּתָא קְֹדָמַי וֻשנַת פוּרקַן עַמִי מְטָת׃
(1) 50:36	וֻגלֵי קְֹדָמַי וְלֵית גְבַר דְלֵיה עוּבָדִין טָבִין וִידִיַע קְֹדָמַי וְלֵית אְנָש דִיקוּם וְיִבעֵי עְלֵיהוֹן וֻפרַקתִינוּן בִדרָע תֻקפִי וֻבמֵימַר רְעוּתִי סְעַדתִינוּן׃
(1) 60:36	וַאְקַטֵיל עַמְמַיָא בְרוּגזִי וְאְדוֹשְשִינוּן בְחִמתִי וְאַרמֵי לְאַרעָא אַרעָיתָא קְטִילֵי גִיבָרֵיהוֹן׃
(1) 70:36	אְמַר נְבִיָא טָבוָתָא דַיוי אְנָא מַדכַר תוּשבְחָתָא דַיוי כְעַל כָל דִגמַלנָא יוי וְסַגִי טוּבֵיה לְבֵית יִשרָאֵל דִגמַלִינוּן כְרַחְמוֹהִי וֻכסַגִיאוּת טָבוָתֵיה׃
(1) 80:36	וַאְמַר בְרַם עַמִי אִינוּן בְנַיָא דְלָא״לָא#2#״ יְשַקְרוּן וַהְוָה מֵימְרֵיה לְהוֹן לְפָרִיק׃
(1) 90:36	בְכָל עִדָן דְחָבוּ קְֹדָמוֹהִי לְאֵיתָאָה עְלֵיהוֹן עָקָא לָא אְעִיק לְהוֹן וֻמַלאַך שְלִיַח מִן קְֹדָמוֹהִי פְרַקִינוּן בְרַחמְתֵיה וֻבִמחָסֵיה עְלֵיהוֹן הוּא שֵיזֵיבִנוּן״יְשֵיזֵיבִינוּן#2#״ וְנַטֵילִינוּן וְסוֹבַרִנוּן כָל יוֹמֵי עָלְמָא׃
(1) 01:36	וְאִינוּן סָרִיבוּ וְאַרגִיזוּ עַל מֵימַר נְבִיֵי קֻדשֵיה וְאִתהְפֵיך <מֵימְרֵיה#2#> להוֹן״#2#״ לִבעֵיל דְבָב הוּא אְגִיַח בְהוֹן׃
(1) 11:36	וְחָס עַל יְקָר שְמֵיה בְדִיל דֻכרַן טָבוָתֵיה דְמִן עָלְמָא גְבוּרָן דַעְבַד עַל יְדֵי מֹשַה לְעַמֵיה דִלמָא יֵימְרוּן אָן דְאַסֵיקִנוּן מִיַמָא אָן דְדַבְרִינוּן בְמַדבְרָא כְרָעְיָא לְעָנֵיה אָן דְאַשרִי בֵינֵיהוֹן יָת מֵימַר נְבִיֵי קוּדשֵיה׃
(1) 21:36	דַבַר לְיַמִינָא דְמֹשַה דְרָע תוּשבַחתֵיה בַזַע מֵי יַמָא דְסוּף מִן קְֹדָמֵיהוֹן לְמַעְבַד לֵיה שוּם עָלַם׃
(1) 31:36	דַבְרִינוּן בֵין תְהוֹמַיָא כְסוּסיָא דִבמַדבְרָא לָא מִיתְקֵיל כֵין אַף אִינוּן לָא אִיתְקִילוּ׃
(1) 41:36	כִבעִירָא דִבמֵישְרָא מִידַבְרָא מֵימְרָא דַיוי דַבְרִינוּן כֵין דַבַרתָהִי לְעַמָך לְמַעְבַד לָך שוּם דְתוּשבְחָא״תֻשבְחָא#2#״׃
(1) 51:36	אִסתַכִי מִן שְמַיָא וְאִתגְלִי מִמְדוֹר קֻדשָך וְתֻשבַחתָך אָן פוֹרְעָנוּתָך וְגִיבָרְוָתָך הְמוֹן טָבוָתָך וְסַגִיאוּת רַחֲמַך עְלַנָא יִתחַסְנוּן׃
(1) 61:36	אְרֵי אַת הוּא דְרַחֲמָך עְלַנָא סַגִיאִין מֵאָב עַל בְנִין אְרֵי אַברָהָם לָא אַסְקַנָא מִמִצרַיִם וְיִשרָאֵל לָא עְבַד לַנָא פְרִישָן בְמַדבְרָא אַת יוי דְרַחְמָך עְלַנָא סַגִיאִין מֵאָב עַל בְנִין פָרְקַנָא מֵעָלְמָא שְמָך׃
(1) 71:36	לְמָא תְרַחְקִינַנָא יוי לְמִטעֵי מֵאוֹרחָן דְתָקְנָן קְֹדָמָך כְעַמְמַיָא דְלֵית לְהוֹן חוּלָק בְאֻלפַן אוֹרָיתָך לָא יִתפְנֵי לִבַנָא מִדַחלְתָך אְתֵיב שְכִינְתָך לְעַמָך בְדִיל עַבדָך צַדִיקַיָא דְקַיֵימתָא לְהוֹן בְמֵימְרָך לְמַעְבַד בְנֵיהוֹן״בֵינֵיהוֹן#2#״ שִבטֵי אַחסָנְתָך׃
(1) 81:36	זְעֵיר דִירִיתוּ עַמָא דְקוּדשָך בַעְלֵי דְבָבַנָא דוֹשִישוּ מַקדְשָך׃
(1) 91:36	הָא אְנַחנָא עַמָך דְמִן עָלְמָא לָא לְעַמְמַיָא יְהַבתָא אוֹרָיתָך לָא אִתקְרִי שְמָך עְלֵיהוֹן לָא לְהוֹן אַרכֵינתָא שְמַיָא אִתגְלִיתָא מִן קְֹדָמָך טוֹרַיָא זָעוּ׃

next chapter