H The Comprehensive Aramaic Lexicon

CAL CODE HELP CLICK HERE
click on the file description for more information

51012: TgJ Is

click on a word for lexical analysis
Click on a red-colored coordinate for comments and/or translations of the line

previous chapter


(1) 10:04 נְבִיַיָא אִתנַבוֹ תַנחוּמִין עַל עַמִי אְמַר אְלָהְכוֹן׃
(1) 20:04 מַלוֹ״מלילו#3#״ עַל לִיבַה דִירוּשלַם וְאִתנַבוֹ עְלַה אְרֵי עְתִידָא דְתִתמְלֵי מֵעַם גָלְוָתַהָא אְרֵי אִשתְבִיקוּ לַה חוֹבַהָא אְרֵי קַבֵילַת כָס תַנחוּמִין מִן קְֹדָם יוי כְאִלוּ לְקָת עַל חַד תְרֵין בְכָל חְטָאַהָא׃
(1) 30:04 קָל דְמַכלֵי בְמַדבְרָא פַנוֹ אוֹרחָא קְֹדָם עַמָא דַיוי כְבִישוּ בְמֵישְרָא כִבשִין קְֹדָם כְנִשתָא דַאְלָהַנָא׃
(1) 40:04 כָל חִילַיָא יִראְמוּן וְכָל טוּר וְרָמָא יִמאְכוּן וִיהֵי כָפְלָא לְמֵישְרָא וֻבֵית גִידוּדִין לְבִקעָא׃
(1) 50:04 וְיִתגְלֵי יְקָרָא דַיוי וְיִחזוֹן כָל בְנֵי בִסרָא כַחדָא אְרֵי בְמֵימְרָא דַיוי גְזִיר כֵין׃
(1) 60:04 קָל דְאָמַר אַתנַבֵי וֻמתִיב וְאָמַר מָא אִתנַבִי כָל רַשִיעַיָא כְעִסבָא וְכָל תֻקפְהוֹן כְמוֹצָא דְחַקלָא׃
(1) 70:04 יְבֵיש עִסבָא נְתַר נִצֵיה אְרֵי רוּחָא מִן קְֹדָם יוי נְשַבַת בֵיה בְכֵין כְעִסבָא חְשִיבִין רַשִיעַיָא בְעַמָא׃
(1) 80:04 מִית רַשִיעָא אְבַדוּ עַשתוֹנוֹהִי וֻפִתגָמָא דַאְלָהַנָא קַייָם לְעָלְמִין׃
(1) 90:04 עַל טוּר רָם סַקוּ לְכוֹן נְבִיַיָא דִמבַסְרִין לְצִיוֹן אְרִימוּ בְחֵילָא קָלְכוֹן דִמבַסְרִין לִירוּשלַם אְרִימוּ לָא תִדחְלוּן אֵימַרוּ לְקִרוַיָא דְבֵית יְהוּדָה אִתְגלִיאַת מַלכוּתָא דַאְלָהְכוֹן׃
(1) 01:04 הָא יוי אְלֹהִים בִתקוֹף מִתגְלֵי וֻתקוֹף דְרָע גְבוּרְתֵיה שָלְטָא קְֹדָמוֹהִי הָא אְגַר עָבְדֵי מֵימְרֵיה עַמֵיה דְכָל עוֹבָדֵיהוֹן גְלַן קְֹדָמוֹהִי׃
(1) 11:04 כְרָעְיָא דְעַדרֵיה רָעֵי בִדרָעֵיה מְכַנֵיש אִימְרִין וֻבחַנֵיה מְסוֹבַר רַכִיכִין מֵינְקָתָא בִניָח מְדַבַר׃
(1) 21:04 מַן אְמַר אִלֵין קַייָם אָמַר וְעָבֵיד דְכָל מֵי עָלְמָא חְשִיבִין קְֹדָמוֹהִי כְטִיפָא בִשעוּלָא וֻמִשחָת שְמַיָא כְאִלוּ בְזַרתָא מְתֻקְנִין וְעַפרָא דְאַרעָא כְאִילוּ בִמכִילָא אִיתְכָל וְטוּרַיָא כְאִילוּ מִתקָל תְקִילִין וְרָמָתָא הָא כִיד בְמוֹזְנַיָא׃
(1) 31:04 מַן תַקֵין יָת רוּחַ קוּדשָא בְפוֹם כָל נְבִיַיָא הְלָא יוי וְצַדִיקַיָא עָבְדֵי מֵימְרֵיה פִתגָמֵי רְעוּתֵיה הוֹדַעִינוּן׃
(1) 41:04 לְהוֹן דִבעוֹ מִן קְֹדָמוֹהִי אַסבַר חָכמָא וְאַלֵיפִנוּן אוֹרַח דְדִין וִיהַב לִבנֵיהוֹן אוֹרָיתָא וְאוֹרַח דְסֻכלְתָנוּ לִבנֵי בְנֵיהוֹן הוֹדַעִינוּן׃
(1) 51:04 הָא עַמְמַיָא כְטִיפָא מִדוּל וֻכעִיוּל מֹאזְנַיָא חְשִיבִין הָא נְגָווָתָא כְדוּקָא דְפָרַח׃
(1) 61:04 וְאִילָנֵי לִבנָן לָא יְסַפְקוּן לְאַדלָקָא וְחֵיוְתָא״וְחֵיוָתָא#3#״ דְבֵיה לֵית הִיא כְמִסַת לַעְלָא׃
(1) 71:04 כָל עַמְמַיָא כְלָמָא עוֹבָדֵיהוֹן גְמֵירָא וְשֵיצָאָה אִינוּן חְשִיבִין קְֹדָמוֹהִי׃
(1) 81:04 וֻלמַן״וֻלמָא#2#״ אַתוּן תְדַמַן״מְדַמַן#2#״ לִמדָן קְֹדָם אֵל וֻמָא דְמוּת דְאַתוּן מְסַדְרִין קְֹדָמוֹהִי׃
(1) 91:04 הָא צַלמָא נַגָרָא עָבֵיד וְקֵינָאָה בִדהַב מְחַפֵי לֵיה וְשֵישְלָן דִכסַף קֵינָאָה מְאַחֵיד לֵיה׃
(1) 02:04 אוֹרַן בָרֵי אָעָא דְלָא אָחֵיד בֵיה״#2#״ רִקבָא בָחַר נַגָר אוּמָן בָעֵי לֵיה לְאַתקָנָא צֵילַם דְלָא יִצטְלֵי׃
(1) 12:04 הְלָא יְדַעתוּן הְלָא שְמַעתוּן הְלָא אִתחַוַה מִן אַולָא עוֹבָד סִדרֵי בְרֵאשִית לְכוֹן הְלָא תִסתַכְלוּן לְמִדחַל קְֹדָם מַן דִברָא יְסוֹדֵי אַרעָא׃
(1) 22:04 דְאַשרִי בִתקוֹף רוּמָא שְכִינַת יְקָרֵיה וְכָל יָתְבֵי אַרעָא חְשִיבִין קְֹדָמוֹהִי כְקִמצִין דְמָתַח כִזעֵיר שְמַיָא וֻפַרסִינוּן כְמַשכַן יְקָרָא לְבֵית שְכִינתָא״שְכִינְתֵיה#2#״׃
(1) 32:04 דְמָסַר שִלטוֹנִין לְחוּלשָא דַייָנֵי אַרעָא כְלָמָא עָבֵיד׃
(1) 42:04 אַפִלוּ יִפְשוּן אַפִילוּ יִסגוֹן אַפִילוּ יִתרַבוֹן בְאַרעָא בְנֵיהוֹן וְאַף רוּגזֵיה יְשַלַח בְהוֹן וְיִבַהתוּן וֻמֵימְרֵיה כְעַלעוּלָא לְקַשָא יְבַדַר יָתְהוֹן׃
(1) 52:04 וֻלמַן תְדַמַן קְֹדָמַי וְתַשווֹן יֵימַר קַדִישָא׃
(1) 62:04 זְקוּפוּ לְרוּמָא עֵינֵיכוֹן וַחזוֹ לְמִדחַל קְֹדָם מִן״מַן#3#״ דִברָא אִלֵין דְאַפֵיק בְמִניָן חֵילֵי שְמַיָא לְכוּלְהוֹן בִשמָהָן קָרֵי מִסְגֵי גְבוּרָן וֻתקֵיף חֵיל חַד מִסִדרֵיה לָא מִתעַכַב׃
(1) 72:04 לְמָא תֵימַר יַעְקֹב וֻתמַלֵיל יִשׂרָאֵל מִטַמרָא אוֹרחִי מִן קְֹדָם יוי וֻמִן קְֹדָם אְלָהִי דִינִי יִעדֵי׃
(1) 82:04 הְלָא יְדַעתָא אִם לָא שְמַעתָא אְלָה עָלְמָא יוי דִברָא יְסוֹדֵי אַרעָא לָא בַעְמַל וְלָא בְלֵיאוּ לֵית סוֹף לְסֻכלְתָנוּתֵיה׃
(1) 92:04 יָהֵיב לְצַדִיקַיָא דִמשַלהַן לְפִתגָמֵי אוֹרָיתֵיה חָכמָא וְלִדלֵית״וְלֵית#2#״ לְהוֹן תְקוֹף נִכסִין מַסגֵי׃
(1) 03:04 וְיִשתַלהוֹן עוֹלֵימִין חַייָבִין וְיִלאוֹן וְרַווָקֵי רַשִיעַיָא אִתְקָלָא יִתַקלוּן׃
(1) 13:04 וֻדסַבַרוּ לְפֻרקָנָא דַיוי יִתכַנשוּן מִבֵינֵי גָלְוָותְהוֹן וְיֵיספוּן חֵיל וְיִתחַדְתוּן לְעוֹלֵימוּתְהוֹן כְצִימוּח דְסָלֵיק עַל גַדפֵי נִשרִין יִרהְטוּן וְלָא יִלאוֹן יְהָכוּן וְלָא יִשתַלהוֹן׃

next chapter