H The Comprehensive Aramaic Lexicon

CAL CODE HELP CLICK HERE
click on the file description for more information

51005: TgO Dt

click on a word for lexical analysis
Click on a red-colored coordinate for comments and/or translations of the line

previous chapter


(1) 10:42 אֲרֵי יִסַב גְבַר אִיתְתָא וְיִבעֲלִינַה וִיהֵי אִם לָא תַשכַח רַחמִין בְעֵינוֹהִי אֲרֵי אַשכַח בַה עֲבִירַת פִתגָם וְיִכתוֹב לַה גַט פִיטוּרִין וְיִתֵין בִידַה וְיִפטְרִינַה מִבֵיתֵיה׃
(1) 20:42 וְתִפוֹק מִבֵיתֵיה וֻתהָך וֻתהֵי לִגבַר אוּחרָן׃
(1) 30:42 וְיִסנֵינַה גַברָא בָתְרָאָה וְיִכתוֹב לַה גַט פִיטוּרִין וְיִתֵין בִידַה וְיִפטְרִינַה מִבֵיתֵיה אוֹ אֲרֵי יְמוּת גַברָא בָתְרָאָה דְנִסבַה לֵיה לְאִיתוּ׃
(1) 40:42 לֵית לֵיה רְשוּ לְבַעֲלַה קַדמָאָה דְפַטרַה לִמתָב לְמִסְבַה לְמִהוֵי לֵיה לְאִיתוּ בָתַר דְאִסתָאַבַת אֲרֵי מְרַחֲקָא הִיא קדם יוי וְלָא תְחַיֵיב יָת אַרעָך דַיוי אֲלָהָך יָהֵיב לָך אַחסָנָא׃
(1) 50:42 אֲרֵי יִסַב גְבַר אִיתְתָא חֲדַתָא לָא יִפוֹק בְחֵילָא וְלָא יְעִיבַר עֲלוֹהִי לְכֹל פִתגָם פְנִי יְהֵי לְבֵיתֵיה שַתָא חֲדָא וִיחַדֵי יָת אִיתְתֵיה דִנסִיב׃
(1) 60:42 לָא יִסַב מַשכוֹנָא רִחיָא וְרָכְבַה אֲרֵי בְהוֹן מִתעֲבֵיד מָזוֹן לְכָל נְפַש׃
(1) 70:42 אֲרֵי יִשתְכַח גְבַר גָנֵיב נַפְשָא מֵאֲחוֹהִי מִבְנֵי ישראל וְיִתַגַר בֵיה וִיזַבְנִינֵיה וְיִתקְטִיל גַנָבָא הַהוּא וֻתפַלֵי עָבֵיד דְבִיש מִבֵינָך׃
(1) 80:42 אִסתַמַר בְמַכתָש סְגִירוּ לְמִטַר לַחדָא וֻלמַעֲבַד כְכֹל דְיַלְפוּן יָתְכוֹן כָהֲנַיָא לֵיוָאֵי כְמָא דְפַקֵידתִינוּן תִיטְרוּן לְמַעֲבַד׃
(1) 90:42 הֲוִי דְכִיר יָת דַעֲבַד יוי אֲלָהָך לְמִריָם בְאוֹרחָא בְמִפַקכוֹן מִמִצרָיִם׃
(1) 01:42 אֲרֵי תִרשֵי בְחַברָך רְשוּת מִדָעַם לָא תֵיעוֹל לְבֵיתֵיה לְמִסַב מִשכוֹנֵיה׃
(1) 11:42 בְבָרָא תְקוּם וְגַברָא דְאַת רָשֵי בֵיה יַפֵיק לָך יָת מַשכוֹנָא לְבָרָא׃
(1) 21:42 וְאִם גְבַר מִסכֵין הוּא לָא תִשכוֹב בְמַשכוֹנֵיה׃
(1) 31:42 אָתָבָא תָתִיב לֵיה יָת מַשכוֹנָא כְמֵיעַל שִמשָא וְיִשכוֹב בִכסוּתֵיה וִיבָרְכִינָך וְלָך תְהֵי זָכוּ קדם יוי אֲלָהָך׃
(1) 41:42 לָא תְעִישוֹק אַגִירָא עַניָא וֻמִסכֵינָא מֵאֲחָך אוֹ מִגִיוֹרָך דִבאַרעָך בְקִרוָך׃
(1) 51:42 בְיוֹמֵיה תִתֵין אַגרֵיה וְלָא תֵיעוֹל עֲלוֹהִי שִמשָא אֲרֵי עַניָא הוּא וְלֵיה הוּא מָסַר יָת נַפשֵיה וְלָא יִקרֵי עֲלָך קדם יוי וִיהֵי בָך חוֹבָא׃
(1) 61:42 לָא יְמוּתוּן אֲבָהָן עַל פוֹם בְנִין וֻבנִין לָא יְמוּתוּן עַל פוֹם אֲבָהָן אֲנָש בְחוֹבֵיה יְמוּתוּן׃
(1) 71:42 לָא תִצלֵי דִין גִיוֹר יִתַם וְלָא תִיסַב מַשכוֹנָא כְסוּת אַרמְלָא׃
(1) 81:42 וְתִדכַר אֲרֵי עַבדָא הֲוֵיתָא בְמִצרַיִם וֻפַרקָך יוי אֲלָהָך מִתַמָן עַל כֵין אֲנָא מְפַקֵיד לָך לְמַעֲבַד יָת פִתגָמָא הָדֵין׃
(1) 91:42 אֲרֵי תִחצוּד חֲצָדָך בְחַקלָך וְתִתנְשֵי עוּמרָא בְחַקלָא לָא תְתוּב לְמִסְבֵיה לְגִיוֹרָא לְיַתמָא וֻלאַרמַלתָא יְהֵי בְדִיל דִיבָרְכִינָך יוי אֲלָהָך בְכֹל עוּבָדֵי יְדָך׃
(1) 02:42 אֲרֵי תַחבוֹט זֵיתָך לָא תְפַלֵי בָתְרָך לְגִיוֹרָא לְיַתמָא וֻלאַרמַלתָא יְהֵי׃
(1) 12:42 אֲרֵי תִקטוּף כַרמָך לָא תְעָלֵיל בָתְרָך לְגִיוֹרָא לְיַתמָא וֻלאַרמַלתָא יְהֵי׃
(1) 22:42 וְתִדכַר אֲרֵי עַבדָא הֲוֵיתָא בארעא דְמִצרַיִם עַל כֵין אֲנָא מְפַקֵיד לָך לְמַעֲבַד יָת פִתגָמָא הָדֵין׃

next chapter