H The Comprehensive Aramaic Lexicon

CAL CODE HELP CLICK HERE
click on the file description for more information

51005: TgO Dt

click on a word for lexical analysis
Click on a red-colored coordinate for comments and/or translations of the line

previous chapter


(1) 10:21 אִלֵין קִיָמַיָא וְדִינַיָא דְתִיטְרוּן לְמַעֲבַד בְארעא דִיהַב יוי אֲלָהָא דַאֲבָהָתָך לָך לְמֵירְתַה כֹל יוֹמַיָא דְאַתוּן קַיָמִין עַל ארעא׃
(1) 20:21 אַבָדָא תְאַבְדוּן יָת כֹל אַתרַיָא דִפלַחוּ תַמָן עַמְמַיָא דְאַתוּן יָרְתִין יָתְהוֹן יָת טָעֲוָתְהוֹן עַל טוּרַיָא רָמַיָא וְעַל רָמָתָא וֻתחוֹת כֹל אִילָן עַבוֹף׃
(1) 30:21 וֻתתָרְעוּן יָת אֵיגוֹרֵיהוֹן וֻתתַבְרוּן יָת קָמָתְהוֹן וַאֲשֵירֵיהוֹן תוֹקְדוּן בְנוּרָא וְצִלמֵי טָעֲוָתְהוֹן תְקָצְצוּן וְתוֹבְדוּן יָת שוּמְהוֹן מִן אַתרָא הַהוּא׃
(1) 40:21 לָא תַעבְדוּן כֵין קדם יוי אֲלָהֲכוֹן׃
(1) 50:21 אֲלָהֵין לְאַתרָא דְיִתרְעֵי יוי אֲלָהֲכוֹן מִכָל שִבטֵיכוֹן לְאַשרָאָה שְכִינְתֵיה תַמָן לְבֵית שְכִינְתֵיה תִתבְעוּן וְתֵיתוֹן לְתַמָן׃
(1) 60:21 וְתַיתוֹן לְתַמָן עֲלָוָתְכוֹן וְנִכסַת קוּדשֵיכוֹן וְיָת מַעסְרֵיכוֹן וְיָת אַפרָשוּת יַדכוֹן וְנִדרֵיכוֹן וְנִדבָתְכוֹן וֻבִכוֹרֵי תוֹרֵיכוֹן וְעָנְכוֹן׃
(1) 70:21 וְתֵיכְלוּן תַמָן קְדָם יוי אֲלָהֲכוֹן וְתִחדוֹן בְכֹל אוֹשָטוּת יַדכוֹן אַתוּן וַאֲנָש בָתֵיכוֹן דְבָרְכָך יוי אֲלָהָך׃
(1) 80:21 לָא תַעבְדוּן כְכֹל דַאֲנַחנָא עָבְדִין כָא יוֹמָא דֵין גְבַר כֹל דְכָשַר בְעֵינוֹהִי׃
(1) 90:21 אֲרֵי לָא אֲתֵיתוֹן עַד כְעַן לְבֵית נִיָחָא וֻלאַחסָנְתָא דַיוי אֲלָהָך יָהֵיב לָך׃
(1) 01:21 וְתִעבְרוּן יָת יַרדְנָא וְתִיתְבוּן בְאַרעָא דַיוי אֲלָהֲכוֹן מַחסֵין יָתְכוֹן וִינִיַח לְכוֹן מִכֹל בַעֲלֵי דְבָבֵיכוֹן מִסְחוֹר סְחוֹר וְתִיתְבוּן לְרוּחצָן׃
(1) 11:21 וִיהֵי אַתרָא דְיִתרְעֵי יוי אֲלָהֲכוֹן בֵיה לְאַשרָאָה שְכִינְתֵיה תַמָן לְתַמָן תַיתוֹן יָת כֹל דַאֲנָא מְפַקֵיד יָתְכוֹן עֲלָוָתְכוֹן וְנִכסַת קוּדשֵיכוֹן מַעשְרֵיכוֹן וְאַפרָשוּת יַדכוֹן וְכֹל שְפַר נִדרֵיכוֹן דְתִידְרוּן קדם יוי׃
(1) 21:21 וְתִחדוֹן קדם יוי אֲלָהֲכוֹן אַתוּן וֻבנֵיכוֹן וֻבנָתְכוֹן וְעַבדֵיכוֹן וְאַמהָתְכוֹן וְלֵיוָאָה דִבקִרוֵיכוֹן אֲרֵי לֵית לֵיה חוּלָק וְאַחסָנָא עִמְכוֹן׃
(1) 31:21 אִסתַמַר לָך דִלמָא תַסֵיק עֲלָוָתָך בְכֹל אַתרָא דְתִחזֵי׃
(1) 41:21 אֲלָהֵין בְאַתרָא דְיִתרְעֵי יוי בְחַד מִן שִבטָך תַמָן תַסֵיק עֲלָוָתָך וְתַמָן תַעֲבֵיד כֹל דַאֲנָא מְפַקֵיד לָך׃
(1) 51:21 לְחוֹד בְכֹל רְעוּת נַפשָך תִיכוֹס וְתֵיכוֹל בִסרָא כְבִרכְתָא דַיוי אֲלָהָך דִיהַב לָך בְכֹל קִרוָך מְסָאֲבָא וְדַכיָא יֵיכְלִינֵיה כִבסַר טַביָא וְאַילָא׃
(1) 61:21 לְחוֹד דְמָא לָא תֵיכְלוּן עַל ארעא תֵישְדִינֵיה כְמַיָא׃
(1) 71:21 לֵית לָך רְשוּ לְמֵיכַל בְקִרוָך מַעסַר עִיבוּרָך חַמרָך ומִשחָך וֻבכוֹרֵי תוֹרָך וְעָנָך וְכֹל נִדרָך דְתִידַר וְנִדבָתָך וְאַפרָשוּת יְדָך׃
(1) 81:21 אֲלָהֵין קדם יוי אֲלָהָך תֵיכְלִינֵיה בְאַתרָא דְיִתרְעֵי יוי אֲלָהָך בֵיה אַת וֻברָך וֻברַתָך וְעַבדָך וְאַמתָך וְלֵיוָאָה דִבקִרוָך וְתִחדֵי קְדָם יוי אֲלָהָך בְכֹל אוֹשָטוּת יְדָך׃
(1) 91:21 אִסתַמַר לָך דִלמָא תִשבוֹק יָת לֵיוָאָה כֹל יוֹמָך עַל אַרעָך׃
(1) 02:21 אֲרֵי יַפתֵי יוי אֲלָהָך יָת תְחוּמָך כְמָא דְמַלֵיל לָך וְתֵימַר אֵיכוֹל בִסרָא אֲרֵי תִתרְעִי נַפשָך לְמֵיכַל בִסרָא בְכֹל רְעוּת נַפשָך תֵיכוֹל בִסרָא׃
(1) 12:21 אֲרֵי יִתרַחַק מִינָך אַתרָא דְיִתרְעֵי יוי אֲלָהָך לְאַשרָאָה שְכִינְתֵיה תַמָן וְתִכוֹס מִתוֹרָך וֻמֵעָנָך דִיהַב יוי לָך כְמָא דְפַקֵידתָך וְתֵיכוֹל בְקִרוָך בְכֹל רְעוּת נַפשָך׃
(1) 22:21 בְרַם כְמָא דְמִתאֲכִיל בְסַר טַביָא וְאַילָא כֵין תֵיכְלִינֵיה מְסָאֲבָא וְדַכיָא כַחדָא יֵיכְלִינֵיה׃
(1) 32:21 לְחוֹד תְקַף בְדִיל דְלָא לְמֵיכַל דְמָא אֲרֵי דְמָא הוּא נַפשָא וְלָא תֵיכוֹל נַפשָא עִם בִסרָא׃
(1) 42:21 לָא תֵיכְלִינֵיה עַל אַרעָא תֵישְדִינֵיה כְמַיָא׃
(1) 52:21 לָא תֵיכְלִינֵיה בְדִיל דְיִיטַב לָך וְלִבנָך בָתְרָך אֲרֵי תַעֲבֵיד דְכָשַר קְדָם יוי׃
(1) 62:21 לְחוֹד קוּדשָך דִיהוֹן לָך וְנִדרָך תִיטוֹל וְתֵיתֵי לְאַתרָא דְיִתרְעֵי יוי׃
(1) 72:21 וְתַעֲבֵיד עֲלָוָתָך בִסרָא וֻדמָא עַל מַדבְחָא דַיוי אֲלָהָך וְדַם נִכסַת קוּדשָך יִשתְפֵיך עַל מַדבְחָא דַיוי אֲלָהָך וֻבִסרָא תֵיכוֹל׃
(1) 82:21 טַר וֻתקַבֵיל יָת כֹל פִתגָמַיָא הָאִלֵין דַאֲנָא מְפַקֵיד לָך בְדִיל דְיִיטַב לָך וְלִבנָך בָתְרָך עַד עָלְמָא אֲרֵי תַעֲבֵיד דְתָקֵין וֻדכָשַר קדם יוי אֲלָהָך׃
(1) 92:21 אֲרֵי יְשֵיצֵי יוי אֲלָהָך יָת עַמְמַיָא דְאַת עָלֵיל לְתַמָן לְמֵירַת יָתְהוֹן מִן קְדָמָך וְתֵירַת יָתְהוֹן וְתִיתֵיב בַאֲרַעהוֹן׃
(1) 03:21 אִסתַמַר לָך דִלמָא תִתְקֵיל בָתְרֵיהוֹן בָתַר דְיִשתֵיצוֹן מִן קְדָמָך וְדִלמָא תִתבַע לְטָעֲוָתְהוֹן לְמֵימַר אֵיכְדֵין פָלְחִין עַמְמַיָא הָאִלֵין יָת טָעֲוָתְהוֹן וְאַעֲבֵיד כֵין אַף אֲנָא׃
(1) 13:21 לָא תַעֲבֵיד כֵין קְדָם יוי אֲלָהָך אֲרֵי כֹל דִמרַחַק קדם יוי דְסָנֵי עָבְדִין לְטָעֲוָתְהוֹן אֲרֵי אַף יָת בְנֵיהוֹן וְיָת בְנָתְהוֹן מוֹקְדִין בְנוּרָא לְטָעֲוָתְהוֹן׃

next chapter