H The Comprehensive Aramaic Lexicon

CAL CODE HELP CLICK HERE
click on the file description for more information

51002: TgO Ex

click on a word for lexical analysis
Click on a red-colored coordinate for comments and/or translations of the line

previous chapter


(1) 10:72 וְתַעְבֵיד יָת מַדבְחָא דְאָעֵי שִטִין חַמֵיש אַמִין אוּרכָא וְחַמֵיש אַמִין פֻתיָא מְרַבַע יְהֵי מַדבְחָא וֻתלָת אַמִין רוּמֵיה׃
(1) 20:72 וְתַעְבֵיד קַרנוֹהִי עַל אַרבַע זָויָתֵיה מִינֵיה יִהוִיָן״יִהוְיָן#3#״ קַרנוֹהִי וְתִחפֵי יָתֵיה נְחָשָא׃
(1) 30:72 וְתַעְבֵיד פְסַכתֵירְוָתֵיה לְמִספֵי קִטמֵיה וֻמַגרוֹפיָתֵיה וֻמִזרְקוֹהִי וְצִנוֹריָתֵיה וֻמַחתִיָתֵיה לְכֹל מָנוֹהִי תַעְבֵיד נְחָשָא׃
(1) 40:72 וְתַעְבֵיד לֵיה סְרָדָא עוֹבָד מְצָדְתָא דִנחָשָא וְתַעְבֵיד עַל מְצָדְתָא אַרבַע עִזקָן דִנחָשָא עַל אַרבְעָה סִטרוֹהִי׃
(1) 50:72 וְתִתֵין יָתַה תְחוֹת סוֹבֵיבָא דְמַדבְחָא מִלְרַע וֻתהֵי מְצָדְתָא עַל פַלגוּת מַדבְחָא׃
(1) 60:72 וְתַעְבֵיד אְרִיחַיָא לְמַדבְחָא אְרִיחֵי דְאָעֵי שִטִין וְתִחפֵי יָתְהוֹן נְחָשָא׃
(1) 70:72 וְתַעֵיל אְרִיחוֹהִי בְעִזקָתָא וִיהוֹן אְרִיחַיָא עַל תְרֵין סִטרֵי מַדבְחָא בְמִיטַל יָתֵיה׃
(1) 80:72 חְלִיל לוּחִין תַעְבֵיד יָתֵיה כְמָא דְאַחזִי יָתָך בְטוּרָא כֵין יַעבְדוּן׃
(1) 90:72 וְתַעְבֵיד יָת דָרַת מַשכְנָא לְרוּחַ עֵיבַר דָרוֹמָא סְרָדֵי לְדָרְתָא דְבוּץ שְזִיר מְאָה אַמִין אוּרכָא לְרוּחָא חְדָא׃
(1) 01:72 וְעַמוּדוֹהִי עַסרִין וְסָמְכֵיהוֹן דִנחָשָא וָוֵי עַמוּדַיָא וְכִבוּשֵיהוֹן כְסַף׃
(1) 11:72 וְכֵן לְרוּחַ צִפוּנָא בְאוּרכָא סְרָדֵי מְאָה אוּרכָא וְעַמוּדוֹהִי עַסרִין וְסָמְכֵיהוֹן עַסרִין דִנחָשָא וָוֵי עַמוּדַיָא וְכִיבוּשֵיהוֹן כְסַף׃
(1) 21:72 וְפוּתיָא דְדָרְתָא לְרוּחַ מַעַרבָא סְרָדֵי חַמשִין אַמִין עַמוּדֵיהוֹן עַסרָה וְסָמְכֵיהוֹן עַסרָה׃
(1) 31:72 וְפוּתיָא דְדָרְתָא לְרוּחַ קִדוּמָא מַדִנחָא חַמשִין אַמִין׃
(1) 41:72 וַחְמֵיש עַסרֵי אַמִין סְרָדֵי לְעִברָא עַמוּדֵיהוֹן תְלָתָה וְסָמְכֵיהוֹן תְלָתָה׃
(1) 51:72 וֻלעִברָא תִניָנָא חַמֵיש עַסרֵי סְרָדִין עַמוּדֵיהוֹן תְלָתָה וְסָמְכֵיהוֹן תְלָתָה׃
(1) 61:72 וְלִתרַע דָרְתָא פְרָסָא עַסרִין אַמִין דְתַכלָא וְאַרגְוָנָא וֻצבַע זְהוֹרִי וְבוּץ שְזִיר עוֹבָד צִיוּר עַמוּדֵיהוֹן אַרבְעָה וְסָמְכֵיהוֹן אַרבְעָה׃
(1) 71:72 כֹל עַמוּדֵי דָרְתָא סחור סחור מְכַבְשִין כְסַף וָוֵיהוֹן כְסַף וְסָמְכֵיהוֹן דִנחָשָא׃
(1) 81:72 אוּרכָא דְדָרְתָא מְאָה אַמִין וְפוּתיָא חַמשִין בְחַמשִין וְרוּמָא חַמֵיש אַמִין דְבוּץ שְזִיר וְסָמְכֵיהוֹן דִנחָשָא׃
(1) 91:72 לְכֹל מָנֵי מַשכְנָא בְכֹל פוּלחָנֵיה וְכֹל סִיכוֹהִי וְכֹל סִכֵי דָרְתָא דִנחָשָא׃
(1) 02:72 וְאַת תְפַקֵיד יָת בְנֵי ישראל וְיִסְבוּן לָך מְשַח זֵיתָא דַכיָא כָתִישָא לְאַנהָרָא לְאַדלָקָא בוֹצִינַיָא תְדִירָא׃
(1) 12:72 בְמַשכַן זִמנָא מִבַרָא לְפָרוּכתָא דְעַל סָהְדוּתָא יְסַדַר יָתֵיה אהרן וֻבנוֹהִי מֵרַמשָא עַד צַפרָא קדם יוי קְיָם עָלַם לְדָרֵיהוֹן מִן בְנֵי ישראל׃

next chapter